عارف بلوچ
اننت ناگ//حکام نے کہا ہے کہ اننت ناگ ضلع کے کوکرناگ میں برینگ ویلی اور وادی چناب کے کشتواڑ ضلع کے درمیان واقع سنتھن ٹاپ پر برف ہٹانے میں مصروف ایک جے سی بی آپریٹر منگل کو برفانی تودے کی زد میں آکر ہلاک ہوگیا۔ یہ واقع منگل کی صبح سنتھن ٹاپ سے اننت ناگ کی طرف تین کلومیٹر کی دور پر پیش آیا۔واضح رہے کہ سنتھن ٹاپ پر دو ہفتے قبل بھاری برفباری ہوئی تھی۔حکام نے بتایا کہ کئی JCBs علاقے میں برف ہٹانے میں مصروف تھے کہ اچانک برفانی تودہ گرنے سے وہ بہہ گئے۔
اس دوران چند آپریٹرز کسی طرح باہر نکلالنے کا راستہ بنانے میں کامیاب ہوئے تاہم کچھ بہہ گئے۔ واقعہ کی اطلاع ملتے ہی فوری طور پر ایس ایچ او لارنو کے ہمراہ تحصیلدار لارنو کی نگرانی میں بڑے پیمانے پر ریسکیو آپریشن شروع کیا گیا۔انہوں نے کہا کہ شام تک ایک جے سی بی آپریٹر کی لاش برآمد ہوئی ہے جبکہ ممکنہ لاپتہ افراد کی تلاش جاری ہے۔انتظامیہ کا کہنا ہے کہ ابتدائی رپورٹوں سے پتہ چلتا ہے کہ برف صاف کرنے میں مصروف افراد میں سے دو افراد لاپتہ ہیں لیکن صحیح تفصیلات کی تصدیق کی جا رہی ہے۔ “ریسکیو آپریشن ابھی بھی جاری ہے اور لاپتہ افراد کو تلاش کرنے کی کوشش کی جارہی ہے۔”دریں اثنا، افسر نے متوفی جے سی بی آپریٹر کی شناخت جاوید احمد زگو (35) ولد عبدالعزیز زگو ساکن لارنو کے طور پر کی ہے۔
