بجٹ میں عوام کے سلگتے مسائل کا حل موجود نہیں

جموں//جموں و کشمیر نیشنل کانفرنس جموں کے صوبائی صدر رتن لال گپتا نے کہا ہے کہ جموں و کشمیر کے بجٹ 2023-24 نے جموں و کشمیر کے لوگوں کو مایوس کیا ہے کیونکہ اس میں جموں و کشمیر کے لیے کوئی نئی چیز نہیں ہے اور نہ ہی اس میں کوئی نئی بات ہے۔ یہ بات انہوں نے محمود پور میں بلاک بشناہ کے نیشنل کانفرنس کے کارکنوں کے اجلاس سے خطاب کرتے ہوئے کہی۔سینئر این سی لیڈر نے کہا کہ جموں و کشمیر کے لوگوں کو اس مرکز کے زیر انتظام علاقے کے لئے فنڈز کی تخصیص پر حکومت سے بہت سی توقعات تھیں اور اس سے بڑھ کر وہ کچھ نئی اسکیموں اور اقدامات کا انتظار کر رہے ہیں جو بے روزگاری سے متعلق سلگتے ہوئے مسائل کو حل کرتے۔ سیاحت، تجارت، تعلیم، صنعتوں کا شعبہ، زراعت اور جموں و کشمیر کے دیگر اہم شہری مسائل ہیں لیکن یہ ایک بڑا فلاپ شو ثابت ہوا جس نے انہیں بالکل مایوس کیا۔جموں و کشمیر کے بجٹ 2023-24 کو ظالمانہ مذاق قرار دیتے ہوئے، رتن لال نے کہا کہ یہ الفاظ کی جادوگری کا ایک عمدہ امتزاج ہے تاکہ یہ عام لوگوں کے لیے ایک اچھا بجٹ معلوم ہو۔ انہوںنے افسوس کا اظہار کرتے ہوئے کہا’’اس سب کو ایک جملے میں خلاصہ کرنے کے لئے جموں و کشمیر کے لئے بجٹ مختص اس بات کو یقینی بناتا ہے کہ غریب غریب تر اور امیر امیر تر ہوتا جائے گا۔ یہ جموں و کشمیر کے لوگوں کی ستم ظریفی ہے‘‘۔دریں اثنا، صوبائی صدر نے ایل جی کی قیادت والی انتظامیہ پر جموں و کشمیر میں بلدیاتی اداروں کے منتخب عوامی نمائندوں سے مشاورت کے بغیر پراپرٹی ٹیکس نافذ کرنے کے آئینی مینڈیٹ پر عمل نہ کرنے پر بھی تنقید کی۔ رتن لال نے جموں و کشمیر انتظامیہ کو بشنہ علاقے میں سرحدی پٹی کے لوگوں کے سلگتے ہوئے مسائل کو حل کرنے میں ناکام رہنے پر بھی تنقید کی۔