بلال فرقانی
سرینگر//ڈائریکٹر سکول ایجوکیشن نے جمعرات کو کہا کہ نئے تعلیمی سیشن کا آغاز بورڈ کے سالانہ امتحانات کے اختتام کے فوراً بعد ہو گا۔ تصدق حسین میر نے ایک تقریب کے موقع پر صحافیوں سے بات کرتے ہوئے کہا کہ جاری امتحانات کے اختتام کے فوراً بعد نیا تعلیمی سیشن شروع ہو جائے گا۔انہوں نے کہا کہ ہم نئے تدریسی سیشن کے لیے تیار ہیں اور ہم نے ٹائم لائنز بھی مقرر کر دی ہیں۔ان مہینوں کی ٹرانسپورٹ فیس کے بارے میں پوچھے جانے پر جن کے دوران اسکول بند تھے، انہوں نے کہا کہ پرائیویٹ اسکول کے طلباء ان مہینوں کے دوران ان خدمات کی ادائیگی کے ذمہ دار نہیں ہیں۔
انہوں نے کہا کہ پہلے، تعلیمی سیشن دسمبر میں ختم ہوتا تھا لیکن اب یہ مارچ میں تبدیل ہو گیا ہے۔ اورجاری سیشن بورڈ امتحانات کے اختتام کے بعد ختم ہو جائے گا۔کچھ نجی اسکولوں کی طرف سے داخلہ فیس وصول کرنے کے لیے حکومتی ہدایات کی خلاف ورزی کے بارے میں، ڈاکٹر تصدق حسین میرنے کہا کہ جہاں بھی انہیں تحریری شکایات موصول ہوں گی، وہ خلاف ورزی کرنے والوں کے خلاف سخت کارروائی کریں گے۔انہوں نے مزید کہا کہ نجی کوچنگ مراکز کو کوئی رجسٹریشن نہیں دی ہے۔انہوںنے بتایا ’’ہم نے یہاں سری نگر میں کوئی کوچنگ سنٹر رجسٹر نہیں کیا ہے اور نہ ہی ہم نے کوئی فیس مقرر کی ہے‘‘۔ ناظم تعلیم نے کہا کہ کوچنگ سنٹر من مانی طریقے سے چلائے جا رہے ہیں اور مالکان بھی اپنے طور پر فیس وصول کر رہے ہیں۔ ناظم تعلیم نے کہا کہ محکمہ اسکولی ایجوکیشن تمبا کو نوشی کو ختم کرنے کیلئے اقدامات اٹھا رہی ہے اور خاص طور پر اسکولوں کے قریب اس کی فروخت کو قطعی اجازت نہیں ہوگی۔
