نیوز ڈیسک
سرینگر // سعودی عرب نے فریضہ حج کی ادائیگی کیلئے کورونا سے بچا ئوکی ویکسینیشن لازمی قرار دے دی ہے۔ وزارت حج و عمرہ کی جانب سے جاری بیان کے مطابق حج کی ادائیگی کے خواہش مند افراد کو کورونا وائرس سے بچائو کی ویکسین کا مکمل کورس کرنا ہوگا۔ کورونا کی ویکسینیشن نہ کروانے والوں کو حج کرنے کی اجازت نہیں دی جائے گی۔بیان میں مزید کہا گیا ہے کہ حج کیلئے آنے سے قبل عازمین احتیاطاً فلو(انفلوئنزا) کی ویکسین بھی لگوا لیں۔ سعودی عرب نے رواں سال حج کیلئے عازمین کی تعداد پر عائد پابندی ختم کردی ہے۔ گزشتہ دو برسوں سے کورونا کی وبا کو پھیلنے سے روکنے کیلئے عازمین کی تعداد محدود کردی گئی تھی۔حج 2023کیلئے سعودی حکومت نے واضح کردیا ہے کہ ہر ایک برینڈ کے ویکسین کے دونوں ڈوز لگوانا لازمی ہے اور اس کے علاوہ معمول کی ٹیکہ کاری کو بھی مکمل کرنا لازمی ہوگا جن میں پولیو، ٹی بی اور دیگر ویکسین شامل ہیں۔
