نیوز ڈیسک
سرینگر//نیشنل انویسٹی گیشن ایجنسی نے وادی کے کئی حصوں میں پوسٹر لگائے ہیں جس میں ریزسٹنس فرنٹ کے چار ملی ٹینٹوںکے بارے میں معلومات حاصل کی گئی ہیں۔چار عسکریت پسند، جن میں دو پاکستانی شہری بھی شامل ہیں، این آئی اے کو بھارت میں تشدد کرنے کیلئے جموں و کشمیر کے نوجوانوں کو بنیاد پرستی کی تحریک دینے اور بھرتی کرنے کی سازش کے سلسلے میں مطلوب ہیں۔
تحقیقاتی ایجنسی نے پہلے ہی چار عسکریت پسندوں میں سے ہر ایک کے لیے 10 لاکھ روپے کے نقد انعام کا اعلان کیا ہے۔حکام نے بتایا کہ پوسٹرز میں نواب شاہ، سندھ کے پاکستانی شہریوں سلیم رحمانی عرف ‘ابو سعد’ اور قصور کے چھانگامانگا کے سیف اللہ ساجد جٹ اور سرینگر کے ان کے مقامی ساتھیوں سجاد گل اور جنوبی کشمیر کولگام کے ریڈونی پائین کے باسط احمد ڈار کے بارے میں معلومات حاصل کی گئی ہیں۔این آئی اے نے اپنا ای میل ایڈریس، فون نمبر اور واٹس ایپ اور ٹیلی گرام نمبر بھی دیے ہیں تاکہ عوام کو معلومات فراہم کی جاسکیں۔ اس نے لوگوں کو یقین دلایا ہے کہ اطلاع دینے والے کی شناخت خفیہ رکھی جائے گی۔
