ٹیم انڈیا کو لگا بڑا جھٹکا، شاندار کارکردگی کے حامل رویندر جڈیجہ چوٹ لگنے سے ایشیا کپ سے باہر

نئی دہلی//ٹیم انڈیا کو بڑا جھٹکا لگا ہے۔ آل راونڈر رویندر جڈیجہ چوٹ کے سبب ٹی20 ایشیا کپ سےباہر ہوگئے ہیں۔ رویندر جڈیجہ نے اب تک ٹورنا منٹ میں شاندار کارکردگی پیش کی ہے۔ پاکستان کے خلاف انہوں نے 35 رن بناکر ٹیم کو جیت دلانے میں اہم رول نبھایا تھا۔ ہانگ کانگ کے خلاف انہوں نے ایک رن آوٹ کے علاوہ ایک وکٹ بھی لیا تھا۔ ٹیم نے گروپ راونڈ کے اپنے دونوں مقابلے جیت لئے اور سپر-4 میں جگہ بنائی۔ رویندر جڈیجہ کی جگہ بائیں ہاتھ کے اسپنر اکشر پٹیل کو ٹیم میں شامل کیا گیا ہے۔ بی سی سی آئی سکریٹری جے شاہ کی طرف سے جاری پریس ریلیز میں بتایا گیا، رویندر جڈیجہ کے داہنے گھٹنے میں چوٹ لگی ہے اور وہ ٹورنا منٹ سے باہر ہوگئے ہیں۔ وہ فی الحال بی سی سی آئی کی میڈیکل ٹیم کی نگرانی میں ہیں۔ جڈیجہ اس سے پہلے آئی پی ایل 2022 میں بھی چوٹ کے سبب پورے مقابلے نہیں کھیل سکے تھے۔ واضح رہے کہ تیز گیند باز جسپریت بمراہ اور ہرشل پٹیل بھی چوٹ کے سبب ٹورنا منٹ میں نہیں کھیل رہے ہیں۔ 33 سال کے رویندر جڈیجہ بطور آل راونڈر ٹیم کے اہم کھلاڑیوں میں سے ایک ہیں۔ انہوں نے اب تک 64 ٹی20 انٹرنیشنل میچوں میں 457 رن بنائے ہیں۔ اسٹرائیک ریٹ 125 کا ہے۔ اس کے علاوہ اس بائیں ہاتھ کے اسپنر نے 28 کی اوسط سے 51 وکٹ بھی حاصل کئے ہیں۔ 15 رن دے کر تین وکٹ بہترین کارکردگی ہے۔ وہ اوور آل 292 ٹی20 میں 3169 رن بناچکے ہیں۔ دو نصف سنچری لگائی ہے۔ 194 وکٹ بھی حاصل کئے ہیں۔ 16 رن دے کر 5 وکٹ سب سے اچھی کارکردگی رہی ہے۔ اکشر پٹیل اس سے پہلے اسٹینڈ بائے کے طور پر ٹیم میں شامل تھے۔ ان کا ریکارڈ بھی ٹی20 انٹرنیشنل میں بہترین ہے۔ وہ اب تک 25 میچ میں 21 وکٹ حاصل کرچکے ہیں۔ 9 رن دے کر 3 وکٹ بہترین کارکردگی ہے۔ 18 کی اوسط سے 147 رن بنائے ہیں۔ اسٹرائیک ریٹ 137 کا ہے۔ وہ اوور آل ٹی20 کے 191 میچ میں 161 وکٹ حاصل کرچکے ہیں۔ 2 ہزار کے قریب رن بھی بنائے ہیں۔ روہت شرما (کپتان)، کے ایل راہل (نائب کپتان)، وراٹ کوہلی، سوریہ کمار یادو، رشبھ پنت (وکٹ کیپر)، دیپک ہڈا، دنیش کارتک (وکٹ کیپر)، ہاردک پانڈیا، اکشر پٹیل، آر اشون، یجویندر چہل، روی بشنوئی، بھونیشور کمار، ارش دیپ سنگھ، اویش خان۔