نیوز ڈیسک
نئی دہلی// مرکزی حکومت نے جمعہ کو کہا کہ جموں و کشمیر میں حد بندی کی مشق مکمل ہو گئی ہے جبکہ یہ معاملہ فی الحال زیر سماعت ہے کیونکہ حتمی رپورٹ کو سپریم کورٹ میں چیلنج کیا گیا ہے۔قانون اور انصاف کے وزیر، کرن رجیجو نے ایک سوال کے تحریری جواب میں کہا کہ حد بندی کمیشن نے جموں و کشمیر کے سلسلے میں پارلیمانی اور قانون ساز اسمبلی کے حلقوں کی از سر نو ترتیب سے متعلق حد بندی کی مشق مکمل کر لی ہے اور 14 مارچ 2022 اور 5 مئی 2022کو گزٹ آف انڈیا میں دو احکامات کو مطلع کیا ہے۔ انہوں نے کہا”کمیشن کے احکامات کو20مئی 2022 کو حکومت ہند کے نوٹیفکیشن نمبر S.O. 2223 (E) کو نافذالعمل بنایا گیا ہے‘‘۔انہوں نے مزید کہا کہ سپریم کورٹ میں حاجی عبدالغنی خان کی جانب سے دائر کردہ رٹ پٹیشن (C) نمبر 237/2022 ہے، جس میں حد بندی کمیشن کی تشکیل کو چیلنج کیا گیا ہے اور اس وقت یہ معاملہ سپریم کورٹ میں زیر سماعت ہے۔
