نیوز ڈیسک
نئی دہلی// مرکزی وزیر برائے سیاحت جی کشن ریڈی نے پیر کو کہا کہ سال 2022 کے پہلے 6مہینوں میں ایک کروڑ سے زیادہ سیاح جموں و کشمیر کا دورہ کر چکے ہیں۔پیرکوشروع ہونے والے پارلیمان کے مونسون اجلاس کے پہلے روزلوک سبھا کی رکن مالا رائے کے ایک سوال کا جواب دیتے ہوئے مرکزی وزیرنے بتایاکہ جموں و کشمیر میں سیاحت کا شعبہ معیشت کے بنیادی شعبوں میں سے ایک ہے۔انہوں نے کہاکہ جموں وکشمیر حکومت کی طرف سے نجی اور سرکاری شعبوں میں اٹھائے گئے اقدامات کے نتیجے میں کووڈ19 چیلنجوں کے باوجود مرکزی زیرانتظام جانے والے سیاحوں کی تعداد میں نمایاں اضافہ ہوا ہے۔
مرکزی وزیرسیاحت نے کہا کہ سال 2020 میں سیاحوں کی تعداد41ہزار267 تھی جو کیلنڈر سال 2022 کے پہلے 6 مہینوں (جنوری تا جون) کے دوران بڑھ کر ایک کروڑ5ہزار ہو گئی ہے۔انہوں نے کہا کہ جموں و کشمیر نے اس عرصے کے دوران تمام موسموں میں سیاحوں کی آمد دیکھی ہے اور وہ بھی اعلیٰ درجے کے سیاح، جنہیں معیاری خدمات کا اچھا تجربہ ہے۔ مرکزی وزیر سیاحت نے مزید کہا کہ سیاحوں کی اس زیادہ آمد کابلاواسطہ اور بالواسطہ طور پر مقامی آبادی بشمول دور دراز علاقوں میں رہنے والے لوگوں کو فائدہ پہنچا ہے۔
