کولگام// جنوبی ضلع کولگام کے ناو پورہ میر بازار علاقے میں بدھ کی سہ پہر جاری ایک تصادم آرائی میں مزید ایک جنگجو مارا گیا ہے، جس کے بعد مہلوکین کی تعداد دو ہو گئی ہے، جبکہ علاقے میں آپریشن جاری ہے۔
پولیس کے ایک ترجمان نے بتایا کہ جنوبی ضلع کولگام کے ناو پورہ میر بازار علاقے میں جنگجووں کے چھپے ہونے کی ایک خاص اطلاع موصول ہونے کے بعد پولیس اور سیکورٹی فورسز نے اس علاقے کو اپنے محاصرے میں لے کر انہیں ڈھونڈ نکالنے کے لئے تلاشی کارروائی کا آغاز کیا۔انہوں نے بتایا کہ خود کو سلامتی عملے کے گھیرے میں پاکر ملی ٹینٹوں نے اندھا دھند گولیاں برسا کر فرار ہونے کی بھر پور سعی کی تاہم سیکورٹی فورسز کی کارگر حکمت عملی نے انہیں فرار ہونے کا کوئی موقع فراہم نہیں کیا اور اس طرح سے طرفین کے مابین جھڑپ شروع ہوئی۔
کشمیر زون پولیس نے ایک ٹویٹ کر کے کولگام تصادم میں اب تک دو جنگجو کے مارے جانے کی تصدیق کی۔
پولیس ترجمان نے بتایا کہ جائے تصادم کے آس پاس علاقوں کو پوری طرح سے سیل کرکے فرار ہونے کے سبھی راستوں پر پہرے بٹھا دئے گئے ہیں۔ذرائع نے بتایا کہ علاقے میں ابھی بھی ایک سے دو ملی ٹینٹ موجود ہو سکتے ہیں۔آخری اطلاعات موصول ہونے تک علاقے میں گولیوں کا تبادلہ جاری تھا۔
اس سلسلے میں مزید تفصیلات کا انتظار ہے۔
