سرینگر// عوامی مجلس عمل نے ممتاز دینی و سیاسی رہنما مہاجر ملت، مفسرقرآن میرواعظ مولانا محمد یوسف شاہ کے 55ویں یوم وصال پر مرحوم رہنما کی ملت کشمیر کے تئیں تاریخ ساز، بے لوث اور بیش بہا خدمات کو زبردست خراج عقیدت ادا کرتے ہوئے میرواعظ مرحوم کے مشن کی آبیاری کا اپنا عہد دہرایا ہے۔ایک بیان میں مرحوم کو انکی گرانقدر خدمات اور کارناموںکو اہل کشمیر کا عظیم سرمایہ قرار دیتے ہوئے کہا گیا کہ مرحوم نے پوری زندگی خلوص اور دیانت کے ساتھ اہالیان کشمیر کو بہتر زندگی فراہم کرانے کیلئے جدوجہد کرتے ہوئے غریب الوطنی میں اپنی جان جان آفریں کے حوالے کر دی۔مرحوم میرواعظ نے دینی، دعوتی ، تبلیغی ، سماجی اور سیاسی خدمات کے ساتھ ساتھ قرآن حکیم کی اپنی مادری زبان میں اولین عام فہم تفسیر لکھ کر مراد خداوندی کو عام لوگوں تک پہنچانے کی ناقابل فراموش خدمت انجام دی جو تا قیام قیامت یاد رکھا جائیگا۔بیان میں کہا گیا کہ 17ماہ رمضان المبارک کی تمام تر تقریبات تاریخ عالی مسجد میں روایتی وعظ وتبلیغ کے دوران واقعہ بدر پر تفصیلی روشنی ڈالنے، شہدائے بدر کو خراج عقیدت ادا کرنے اور میرواعظ مرحوم کے تئیں یادگاری جلسے کا انعقاد، سربراہ تنظیم میرواعظ محمد عمر فاروق کی نظر بندی کے سبب ملتوی کیا گیا ہے تاہم تنظیم کے زیر اہتما م17ماہ رمضان بروز منگلوار جامع مسجد سرینگر میں نماز ظہر سے قبل ایک دعائیہ مجلس کا اہتمام کیا گیا ہے جس میں مہاجر ملت ان کے رفقا ء کے بلند درجات کیلئے قرآن خوانی اور مرحومین کیلئے ایصال ثواب بھی کیا جائیگا۔
