اعلیٰ معیاری باصلاحیت بلے باز سامنے نہ آنے پر افریدی مایوس

 لاہور//پاکستانی کرکٹ ٹیم کے آل راؤنڈر شاہد آفریدی نے پاکستان سپر لیگ کے دوسرے ایڈیشن میں ویسٹ انڈیز کے اسٹار آل راؤنڈر ڈیرن سیمی کی شرکت کا اشارہ دیتے ہوئے کہا کہ انہیں اعلیٰ معیاری باصلاحیت بلے باز سامنے نہ آنے پر مایوسی ہوئی ہے ۔ پشاور زلمی کے شاہد آفریدی کافی عرصے بعد بیٹنگ فارم میں نظر آ رہے ہیں اور گزشتہ میچوں میں انہوں نے پشاور زلمی کیلئے بہترین کارکردگی کا مظاہرہ کیا ہے ۔آفریدی نے کہا کہ پاکستان سپر لیگ کے دوسرے ایڈیشن میں بہترین بیٹنگ ٹیلنٹ سامنے آنا چاہیے تھا کیونکہ ہم سب ہی اس کی توقع کر رہے تھے لیکن ایسا نہیں ہوا۔ حتیٰ کہ گزشتہ سال لیگ کے افتتاحی ایڈیشن میں بھی زیادہ نوجوان کھلاڑیوں نے بیٹنگ سے متاثر نہیں کیا تھا۔ تاہم شاہد آفریدی چند نوجوان گیند بازوں کی کارکردگی سے ضرور متاثر ہوئے جن میں شاداب خان نے 6.61 کی اکانومی سے نو وکٹیں لیں جبکہ اس فہرست میں کراچی کنگز کے لیگ اسپنر اسامہ میر اور فاسٹ بالر عثمان شنواری شامل ہیں۔آل راؤنڈر نے کہا کہ مجھے عثمان اور اسامہ کے خلاف کھیل کر بہت اچھا لگا اور یہ دونوں بہت باصلاحیت بالرز ہیں۔ انہوں نے لیگ میں عمدہ کارکردگی کا مظاہرہ کرنے والے نوجوان کھلاڑیوں کو بہترین طریقے سے پروان چڑھانے پر زور دیا تاکہ قومی ٹیم کے سلیکٹرز ان کی صلاحیتوں سے استفادہ کر سکیں۔ جمعہ کو کراچی کنگز کے خلاف پلے آف کے حوالے سے بات کرتے ہوئے شاہد آفریدی نے کہا کہ پشاور زلمی کے تمام کھلاڑی فٹ ہیں اور میچ کے حوالے سے بہت پراعتماد ہیں۔(یواین آئی)