بن تالاب۔امب گھروٹہ اکھنورسڑک خستہ حالی کاشکار

جموں//ریاستی حکومت کی جانب سے رابطہ سڑکوں کو تعمیروترقی کی کلید قراردے کر انہیں بہتربنانے کے ساتھ ساتھ نئی سڑکوں کے پروجیکٹ ہاتھ میں لینے کے بلندبانگ دعوے کیے جارہے ہیں لیکن ان دعوئوں کی قلعی وقتاًفوقتاً کھل جانے سے حکومتی دعوے جھوٹ کے پلندہ ثابت ہوتے ہیں ۔ اگرچہ حکومت نے ریاست کے کچھ اضلاع میں سڑکوں کے ڈھانچے میں خاطرخواہ بہتری لائی ہے لیکن سرمائی راجدھانی جموں کی اہم سڑک جسے بن تالاب۔امب گھروٹہ۔اکھنور روڈ کہاجاتاہے کی خستہ حالی کودورکرنے کی طرف حکومت کی جانب سے پی ڈی پی۔بی جے پی مخلوط حکومت قائم ہونے کے دوسال گذرنے کے باوجود بھی کوئی توجہ نہیں دی گئی ہے جس کی وجہ سے شہرکے بیرونی علاقہ جات سے جموں آنے والے مسافروں کو روزانہ شدیدمشکلات جھیلنے پرمجبورہوناپڑتاہے۔ قابل ذکرہے کہ بن تالاب۔امب گھروٹہ۔اکھنور سڑک جموں سے بذریعہ رنبیر نہرکے بعد جموں سے پونچھ جانے والی دوسری متبادل شاہراہ بھی ہے ۔ اگربراستہ رنبیرنہرجموں ۔اکھنور۔پونچھ شاہراہ آمدورفت کیلئے بندہوجاتی ہے تو بن تالاب۔امب گھروٹہ ۔اکھنورسڑک سے ہی گاڑیاں پونچھ راجوری کارخ اختیارکرسکتی ہیں یعنی یہ سڑک Lifeline کی حیثیت رکھتی ہے۔تفصیلات کے مطابق بن تالاب ۔امب گھروٹہ ۔اکھنو رسڑک کووسعت دینے کرنے کیلئے 8کروڑ 61لاکھ روپے کی رقومات مرکزی حکومت نے چندسال پہلے سنٹرل فنڈنگ سکیم کے تحت منظورکی تھی لیکن بعدمیں منظورشدہ پروجیکٹ کھٹائی میں پڑگیا اوراس سڑک کوبہتربنانے کے سلسلے میں کوئی خاطرخواہ پیش رفت نہ ہوئی۔ فی الوقت سڑک محکمہ پی ڈبلیوڈی (تعمیرات ِعامہ )کی کنسٹرکشن ڈویژن نمبر 2 جموں کے تحت ہے اوراس کی مرمت اوربہتربنانے کاکام چہل کنسٹرکشن کمپنی نے دردست میں لیاہے ۔ ذرائع نے بتایاکہ دوسال پہلے اس سڑک کودولین بنانے کامنصوبہ منظورہواتھا ۔پہلے مرحلے کے تحت چہل کنسٹرکمپنی کو 8 کلومیٹر سٹریچ (حصہ ) دیاگیا تھا جس پر ابھی تک صرف مائرکالج سے لے کر کوٹل جیل تک وائیڈننگ اور کوٹ میں فلنگ دیوار کاہی کام ہواہے۔ مقامی لوگوں کاکہناہے اگر اسی رفتارسے کمپنی کام کرتی رہے گی تو ا س سڑک کی خستہ حالی دورکرنے میں کئی برس لگ جائیں گے۔اس کے علاوہ برن سے آگے اکھنور تک کے حصے کیلئے پی ڈبلیوڈی ڈویژن ۔2 نے تاحال کوئی کام شروع نہیں کیاہے ۔متاثرہ لوگوں کاکہناہے کہ سڑک پرجگہ جگہ کھڈے بنے ہوئے ہیں۔ اس بارے میں سنیل کمار نامی ایک مسافرنے کہاکہ وہ ہرروز اگورسے جموں تک کاسفرمیٹاڈور(منی بس )کے ذریعے کرتا ہے۔انہوں نے کہاکہ سڑک پرجگہ جگہ کھڈے ہونے کی وجہ سے مسافروں کے ساتھ ٹرانسپورٹروں اورڈرائیوروں کوشدیدکوفت کاسامناکرناپڑتاہے۔انہوں نے مزیدکہاکہ مزے کی بات یہ ہے کہ یہ سڑک اسمبلی حلقہ رائے پوردومانہ ، نگروٹہ کے مختلف علاقہ جات کے لوگوں کیلئے کافی اہمیت رکھتی ہے لیکن اس علاقہ کے رکن اسمبلی بالی بھگت اور ممبرپارلیمنٹ جگل کشور شرما نے بھی کبھی اس سڑک کی مرمت کے کام میں دلچسپی نہیں لی ۔اسمبلی حلقہ رائے پوردومانہ، نگروٹہ کے مختلف علاقہ جات کے لوگوں نے محکمہ تعمیراتِ عامہ کے وزیر عبدالرحمن ویری اور کنسٹرکشن ڈویژن ۔2 کے حکام سے مطالبہ کیاہے کہ بن تالاب۔ امب گھروٹہ۔اکھنور سڑک کی مرمت کاکام جلدازجلد مکمل کیاجائے تاکہ مسافروں کی مشکلات میں کسی حدتک تخفیف ہوسکے۔