(کشمیریوں کو فوج نے نہیں بچایا :حریت (گ

سرینگر// وزیر اعظم ہندنریندر مودی کے بیان کہ ’’بھارتی فوج نے سیلاب میں کشمیریوں کو بچایا اس کے باوجود کہ بعد میں انہوں نے ان پر پتھر پھینکے ہیں‘‘ پر سخت عمل ظاہر کرتے ہوئے حریت(گ) نے اسے انتہائی مضحکہ اور سفید جھوٹ قرار دیا۔ حریت ترجمان نے کہاکہ کہ فوج نے سیلاب میں ایک بھی کشمیری کو نہیں بچایا اور اس کے باوجود اُس نے ریاستی بجٹ کا ایک بڑا حصہ ہیلی کاپٹر سروس کے نام پر لوٹ لیا۔ بیان کے مطابق افواج کے ہاتھوں کشمیریوں نے صرف دُکھ اور مصیبتیں اٹھائی ہیں اور اس نے کبھی بھی کشمیریوں کے ساتھ انسانوں جیسا سلوک نہیں کیا ہے۔ بیان میں کہا گیا کہ نریندر مودی نے نئی دہلی میں سول سرونٹس کی ایک میٹنگ سے تقریر کرتے ہوئے کشمیریوں سے گِلہ کیا کہ’’ ہماری فوج نے انہیں سیلاب میں بچایا ہے، حتیٰ کہ بعد میں انہوں نے ان پر پتھر مارے‘‘۔ مودی نے ایک ایسے وقت میں یہ بات کی ہے، جب اس کی فوج کشمیریوں کو گاڑی سے باندھ کر انسانی ڈھال کے طور استعمال کررہی ہے۔ سرّراہ ان کی مارپیٹ کرتی ہے اور پھر اس کے ویڈیو بناکر خود انٹرنیٹ پر اپ لوڈ کرتی ہے اور الیکشن ڈرامے کے دن 9شہریوں کو قتل اور 200کو زخمی کرتی ہے۔بیان میںوزیراعظم کے بیان کو اصل میں فوج کے جنگی جرائم پر پردہ ڈالنے کی ایک کوشش سے تعبیر کیا گیا۔ بیان میں یہ بھی کہا گیا کہ سیلاب میںفوج نے صرف اپنے اہلکاروں یا غیر ریاستی ہندوؤں کو نکالا اور کسی کشمیری کو سیلاب سے بچانے کی ایک بھی مثال پیش نہیں کی جاسکتی ہے۔ ہاں اتنا ضرور ہے کہ فوجی ہیلی کاپٹروں نے کہیں کہیں عام لوگوں پر زائد المیعاد بسکٹ پیکٹ گرائے، جو کسی بھی صورت میں کھانے کے قابل نہیں تھے، البتہ بعد میں فوج نے اس کے عوض ریاستی فنڈس کا ایک بڑا حصہ زبردستی ہڑپ لیا اور ریاستی انتظامیہ نے بھی چُپ چاپ یہ رقم واگزار کرائی۔ بیان میں کہا گیا کہ جہاں تک پتھر مارنے کا تعلق ہے، تو یہ صرف ان گولیوں اور پیلٹ کا قدرتی ردّعمل ہے، جو کشمیریوں پر چلائی جارہی ہیں اور جن کے ذریعے انہیں قتل اور اندھا کیا جاتا ہے۔ حریت کانفرنس نے اپنے بیان میں واضح کیا کہ بھارت اور اس کی فوج کشمیر کو صرف ایک کالونی سمجھتی ہے اور وہ یہاں کی زمین پر قابض رہنے کے لیے یہاں کی پوری آبادی کو ہلاک کرنے کے راستے پر گامزن ہے۔