سرینگر//نظامت اطلاعات و رابطہ عامہ کے سرینگر دفترمیں قائم میڈیا کمپلیکس میں کل کئی سرگرمیوں کا انعقاد کیا جارہا ہے جن میں نادر تصاویر اور جموں وکشمیر سے شائع ہونے والے آزادی سے قبل کے اخبارات کی نمائش کا انعقاد بھی شامل ہے۔ڈی آئی پی آر کے اہتمام سے تقریبات کے دوران ریفرنس لائبریری کم ریڈنگ روم کا سنگ بنیاد، جدید سہولیات سے لیس کانفرنس ہال کا افتتاح، ویڈیو کانفرنسنگ سہولیات کا بھی افتتاح کیا جائے گا۔محکمہ اطلاعات کی طرف سے جاری ایک پریس بیان میں کہا گیا ہے کہ میڈیا کمپلیکس میں موجود جدید طرز کے آڈیٹوریم میں200 افراد کے بیٹھنے کی گنجائش موجود ہے۔اس دوران اطلاعات، خوراک، سول سپلائیز اور امور صارفین کے وزیر چودھری ذوالفقار علی ریاستی حکومت کے اشتہاری پورٹل کی بھی شروعات کریں گے۔محکمہ حکومت، ذرائع ابلاغ اور لوگوں کے درمیان ایک استفصار کے طور پر کام کرتے ہوئے حکومت کی سرگرمیوں کو اُجاگر کرنے کے ساتھ ساتھ پرنٹ ،الیکٹرانک، ڈیجیٹل، سوشل اور آؤٹ ڈور میڈیا کے ذریعے لوگوں تک جانکاری عام کرنے میں کلیدی رول ادا کرتا ہے۔سرینگر میں جامع میڈیا کمپلیکس قائم کرنے کا تصور مرحوم مفتی محمد سعید نے اُس وقت مارچ2015 میں پیش کیا تھا جب دوسری مرتبہ انہوں نے وزیر اعلیٰ کا عہدہ سنبھالا تھا۔محکمہ اطلاعات ضلع ہیڈ کوارٹروں پر بھی میڈیا سینٹرس قائم کرنے پر عمل پیرا ہے اور اس طرح کا ایک مرکز پہلے ہی ضلع کٹھوعہ میں قائم کیا گیا ہے۔پریس نوٹ میں مزید کہا گیا ہے کہ محکمہ نے صحافی برادری کے لئے کئی بہبودی سکیمیں شروع کی ہیں جن میں صحافیوں کے لئے ویلفیئر فنڈ قائم کرنا بھی شامل ہے جسے جلد ہی نوٹیفائی کیا جائے گا۔ریاست میں کام کرنے والے صحافیوں نے بھی اُن کے لئے ایک پنشن اور انشورنس سکیم وضح کرنے کی وکالت کی ہے جس کے لئے حکومت کی طرف سے خدو خال طے کئے جارہے ہیں۔
میڈیا کمپلیکس میں 4جولائی سے نادر اخبارات اور تصاویر کی نمائش
