جموں//وزیر اعلیٰ محبوبہ مفتی کی صدارت میں منعقدہ ایک اعلیٰ سطحی اجلاس میں خطہ پیر پنچال اور چناب میں جاری ترقیاتی سرگرمیوں کا جائزہ لیا گیا جس دوران جہاں ان اضلاع میں کم رقومات خرچ کرنے کی رپورٹوں پر برہمی ظاہر کرتے ہوئے وزیر اعلیٰ نے صوبائی کمشنر جموں کو خطہ کا تفصیلی دورہ کر کے ترقیاتی پروجیکٹوں کی بہتر عمل آوری میں حائل تمام رکاوٹوں کودُور کرنے کی ہدایت دی وہیںصوبائی انتظامیہ جموں کو پونچھ اور راجوری ضلع کے سرحدی مائیگرینٹوں کے لئے اراضی کی نشاندہی کرنے کے لئے کہا تا کہ ان علاقوں میں قائم سکولوں جنہیں فی الوقت عارضی شیلٹروں کے طور استعمال میں لایا جارہا ہے، میں تعلیمی سرگرمیاں متاثر نہ ہوں۔وزیر اعلیٰ نے ہر اسمبلی حلقہ میں ایک ہسپتال کی نشاندہی کر کے افرادی قوت اور مشینری فراہم کر کے انہیں ماڈل صحت مراکز کے طور فروغ دینے کی ہدایت دی ہے تا کہ عوام کو ضلع ہسپتالوں اور مرکزی شہروں کا رُخ نہ کرنا پڑے۔ ڈوڈہ، کشتواڑ اور رام بن ، ریاسی، پونچھ اور راجوری اضلاع میں جاری مختلف اہم ترقیاتی پروجیکٹوں کی پیش رفت کا جائیزہ لینے کے لئے طلب کی گئی ایک میٹنگ سے خطاب کرتے ہوئے وزیر اعلیٰ نے ان ہسپتالوں میں تمام تشخیصی سہولیات کی دستیابی کے علاوہ طبی اور نیم طبی عملے کی معقول تعداد کو تعینات کرنے کی ہدایت دی تا کہ ایمرجنسی اور خراب موسم کے دوران عوام کو لمبی مسافت طے نہ کرنی پڑے اور انہیں ان ہسپتالوں میں ہی ضروری علاج و معالجہ فراہم ہوسکے۔انہوں نے صوبائی کمشنر کوذاتی طور تمام ترقیاتی کاموں کی نگرانی کرنے اور ضرورت پڑنے پر مقامی نمائندوں کی مشاورت حاصل کرنے کی بھی ہدایت دی۔ وزیر اعلیٰ نے گول میں 27 کروڑ روپے کی لاگت والے زیر تعمیر ڈگری کالج، ریونیو کمپلیکس اور انڈور سٹیڈیم کے کام میں سرعت لانے اور بمداسہ دیہات میں ہیلتھ سینٹر کی دوسری منزل کی جلد تکمیل کے احکامات دیئے۔انہوں نے تتہ پانی میں سیاحتی سہولیات کو فروغ دینے اور تھاٹرکر میں وِنڈ انرجی کو فروغ دینے کے احکامات بھی دیئے۔ ایک خصوصی ہدایت میں وزیر اعلیٰ نے چیف سیکرٹری بی بی ویاس کو بی آر او عہدیداروں کے ساتھ جلد ایک میٹنگ طلب کر کے بی آر او کی طرف سے عملائے جارہے مختلف پروجیکٹوں پر کام میں سرعت لانے کو یقینی بنانے کے لئے کہا۔وزیر اعلیٰ نے بانہال قصبہ میں ٹریفک جام پر قابو پانے کے لئے پُل کی کشادگی کے احکامات دیئے۔ انہوں نے بانہال۔ ماہو سڑک کے باقی ماندہ کام کی تکمیل کے لئے31 دسمبر کی ڈیڈ لائین مقرر کی۔محبوبہ مفتی نے علاقہ میں6 ڈاک بنگلوں ، مختلف کالجوں، ہسپتالوں اور سکولوں کے کام کی تکمیل کے احکامات دیئے۔میٹنگ میں بتایا گیا کہ کھلینی گرڈ سٹیشن کی تکمیل سے خطہ میں بجلی سپلائی میں معقولیت آئی ہے اور ایک سال کی مدت میں بھلیسہ اور چنگا میں2 مزید گرڈ سٹیشن قائم کئے جارہے ہیں جس سے بجلی کی سپلائی میں مزید بہتری آئی گی۔میٹنگ میں ضلع کے اراکین قانون سازیہ، چیف سیکرٹری بی بی ویاس، مختلف محکموں کے انتظامی سیکرٹریوں اور دیگر افسران نے شرکت کی جبکہ صوبائی کمشنر جموں ایم کے بھنڈاری اور ان اضلاع کے ڈپٹی کمشنروں اور ضلع افسروں نے ویڈیو کانفرنسنگ کے ذریعے میٹنگ میں شرکت کی۔وزیر اعلیٰ محبوبہ مفتی نے انتظامی سیکرٹریوں کو اکثر فیلڈ دورے کرنے کی ہدایت دی ہے تا کہ زمینی سطح پر ترقیاتی پروجیکٹوں کی عمل آوری یقینی بن سکے اور پروجیکٹوں میں حائل رکاوٹوں کو موقعہ پر ہی دُور کیا جاسکے۔محبوبہ مفتی نے علاقہ میں انسداد سیلاب سے متعلق کاموں کو ترجیح دینے کی ہدایت دیتے ہوئے کاموں کو سینٹرل واٹر کمیشن کے ساتھ اُٹھا کر منظوری حاصل کرنے کے لئے کہا۔ انہوں نے کہا کہ 18 کروڑ روپے کی لاگت والے پونچھ منی سیکرٹریٹ کمپلیکس ، لورن ۔گلمرگ سڑک کی تکمیل اور گلاب گڑھ۔ نندی مرگ سڑک کو ٹریفک کے لئے کھولے جانے سے دونوں خطوں کے عوام کو مزید جوڑنے میں مدد ملے گی۔انہوں نے کلسیاں نوشہرہ میں کھیل میدان کے لئے اراضی کی نشاندہی اور چنگس اور راجوری میں سکولی عمارات کی اپ گریڈیشن کے بھی احکامات دیئے۔وزیر اعلیٰ نے واٹر سپلائی اور لفٹ اری گیشن سکیموں میں اضافی مشینری کی دستیابی پر زور دیا تا کہ خراب ہونے کی صورت میں اسے کام پر لگایا جاسکے۔ میٹنگ میں بتایا گیا کہ دھرماڑی ڈگری کالج کو مارچ2018 سے شروع کیا جائے گا۔ وزیر اعلیٰ نے سارا بگا میں کالج کے قیام کے لئے اراضی کا فوری معاوضہ واگذار کرنے کی ہدایت دی۔میٹنگ میں ضلع کے اراکین قانون سازیہ، چیف سیکرٹری بی بی ویاس، مختلف محکموں کے انتظامی سیکرٹریوں اور دیگر افسران نے شرکت کی جبکہ صوبائی کمشنر جموں ایم کے بھنڈاری اور ان اضلاع کے ڈپٹی کمشنروں اور ضلع افسروں نے ویڈیو کانفرنسنگ کے ذریعے میٹنگ میں شرکت کی۔
خطہ چناب و پیر پنچال میں ترقیاتی سرگرمیاں
