جموں میںتقریب منعقد

جموں//پی ڈی پی کایوم ِ تاسیس خطہ جموں میں بھی منایاگیا۔اس سلسلے میں سرمائی راجدھانی میں منعقدہ تقریب سے خطاب کرتے ہوئے پی ڈی پی کے سینئر لیڈر اور خوراک ، شہری رسدات ، امور صارفین اور اطلاعات کے وزیر چودھری ذوالفقار علی نے کہا کہ پیپلز ڈیموکریٹک پارٹی نے ریاست میں واحدجماعت کی اجارہ داری کو ختم کر کے حقیقی معنوں میں جمہوریت کو بحال کیا ۔ پارٹی کے یومِ تاسیس پر پارٹی ہیڈ کوارٹر جموں میں کارکنوں سے خطاب کرتے ہوئے چودھری ذوالفقار علی نے کہا کہ ریاست میں ایک ہی پارٹی کی اجارہ داری قایم تھی اور لوگوں کے پاس دوسرا کوئی متبادل نہیں تھا ۔ انہوں نے کہا کہ مرحوم مفتی محمد سعید نے پی ڈی پی کی شکل میں لوگوں کے سامنے ایک متبادل رکھا ۔ چودھری ذوالفقار علی نے کہا کہ پی ڈی پی نے پچھلے 18 برسوں کے دوران اپنے موقف سے انحراف نہیں کیا ہے ۔ انہوں نے کہا کہ پی ڈی پی نے چاہے بی جے پی یا کانگریس کے ساتھ سرکار بنائی تا ہم پارٹی کا موقف کبھی تبدیل نہیں ہوا ۔ انہوں نے کہا کہ پی ڈی پی نے مسئلہ کشمیر کے حل کیلئے مذاکرات کی وکالت کی ہے اور پارٹی نے نئی دہلی ، جموں اور سرینگر میں ایک ہی زبان بولی ہے ۔ بی جے پی کے ساتھ مخلوط سرکار بنانے کے مرحوم مفتی محمد سعید کے متحرک فیصلے کی سراہنا کرتے ہوئے ذوالفقار نے کہا کہ اُس وقت کی صورتحال اور لوگوں کے منڈیٹ کو مدِ نظر رکھتے ہوئے بی جے پی کے ساتھ مخلوط سرکار تشکیل دینا پڑی تا ہم یہ فیصلہ بعد میں صحیح ثابت ہوا ۔ انہوں نے کہا کہ جموں کشمیر ملک کی ایک ایسی ریاست ہے جہاں دو ایمز قائم کئے جا رہے ہیں اور جموں و سرینگر کو سمارٹ سٹیز کیلئے منتخب کیا گیا ہے ۔ انہوں نے مزید کہا کہ پچھلے اڑھائی برسوں کے دوران ریاست میں کئی ترقیاتی پروجیکٹ شروع کئے گئے جن میں سے بیشتر پایہ تکمیل کو پہنچ چکے ہیں ۔ پی ڈی پی کے سینئر لیڈر نے کہا کہ موجودہ مخلوط سرکار ریاست میںباہمی رواداری اور بھائی چارے کی ایک مثال بن گئی ہے ۔ انہوں نے کہا کہ دونوں جماعتیں ایجنڈا آف الائینس کی پابند ہیں ۔ اس موقعہ پر پی ڈی پی کے جنرل سیکرٹری وید مہاجن نے مفتی سرکار کے تین سال اور موجودہ حکومت کے دو سال یاد کرتے ہوئے کہا کہ ریاست میں محبوبہ مفتی کی قیادت میں تعمیر و ترقی کا انقلاب آیا ہے اور ریاست کے تینوں خطوں کی یکساں ترقی کو یقینی بنایا جا رہا ہے ۔ اس موقعہ پر پارٹی کے دیگر کئی لیڈروں نے اپنے خیالات کا اظہار کیا ۔