دلیپ کمار کی حالت تشویشناک

 ممبئی// مشہور ومعروف اداکار دلیپ کمار کی اہلیہ سائرہ بانو نے امید ظاہر کی ہے کہ بزرگ اداکارجلدازجلد صحت یاب ہوں گے جن کے بارے میں خبر ہے کہ ان کے گردے کام نہیں کررہے ہیں اور پیشاب میں بھی تکلیف ہے۔فی الحال دلیپ صاحب لیلاوتی اسپتال کے آئی سی یو میں ہیں۔انہوں نے مزید کہا کہ یوسف صاحب کی صحتیابی کے لیے اہل خانہ اور ان لاکھوں کروڑوں پرستار دعاگو ہیں اور انہیں امید ہے کہ وہ انشا اللہ جلد ٹھیک ہوجائیں گے۔انہوں نے یہ بیان دیا کیونکہ گزشتہ دوروز سے بزرگ اداکار کی صحت کے بارے میں تشویش ناک خبریں موصول ہورہی ہے۔ واضح رہے کہ معروف اداکار کی صحت کے بارے میں رپورٹ موصول ہورہی ہیں کہ ان گردے صحیح ڈھنگ سے کام نہیں کررہے ہیں اور ان کے فیملی ڈاکٹرجلیل پرکار اہل خانہ سے رابطہ میں ہیں۔ گزشتہ روز انہیں بخار بھی تھا اور ان کی بھتیجی شاہین نے بھی سوشل میڈیا پر مطلع کیاکہ یوسف انکل ٹھیک ہوجائیں گے۔ یو این آئی