تہران //ایران اور عراق کے سرحدی علاقوں میں خوفناک زلزلے سے 450 افراد ہلاک اور 7000 سے زائد زخمی جب کہ 70 ہزار سے زیادہ بے گھر ہوچکے ہیں۔ شدید زلزلہ سے لینڈ سلائیڈنگ ہوئی جس کے نتیجے میں اب تک 450 سے زائد افراد ہلاک ہوچکے ہیں جب کہ سات ہزار سے زائد زخمی ہیں۔ زلزلے کی شدت 7.3 ریکارڈ کی گئی ہے۔زیادہ تر ہلاکتیں ایران میں ہوئی ہیں اور اس کے 14 صوبے متاثر ہوئے۔ ایران کے قدرتی آفات سے نمٹنے والے ادارے کے مطابق 328 افراد وہاں ہلاک ہوئے ۔ سب سے زیادہ تباہی ایرانی صوبے کرمان شاہ میں ہوئی جہاں تین روزہ سوگ کا اعلان کردیا گیا ہے۔ کرمان شاہ کے شہر سرپل ذھاب میں 236 ہلاکتیں ہوئیں اور ہلاکتوں کی تعداد بڑھ رہی ہے۔ یہ شہر عراقی سرحد کے قریب ہے۔ دوسری جانب عراق میں 6 افراد کی ہلاکت اور 50 کے قریب زخمیوں کی اطلاع ہے۔زلزلے کی وجہ سے متعدد عمارتیں اور مکانات زمین بوس ہوگئے جب کہ بہت سے دیہات ہی صفحہ ہستی سے مٹ گئے۔ متاثرہ علاقوں میں امدادی کارروائیاں جاری ہیں اور ملبے تلے دبے افراد کو باہر نکالا جارہا ہے۔ متعدد زخمیوں کی حالت تشویش ناک ہے جس کی وجہ سے ہلاکتوں میں اضافے کا خدشہ ہے۔زلزلے کا مرکز عراق کے کرد علاقے سلیمانیہ میں تھا جس کی گہرائی 33 کلو میٹر تھی۔ زلزلہ اس قدر شدید نوعیت کا تھا کہ اسے عراق کے دارالحکومت بغداد اور پڑوسی ممالک میں بھی محسوس کیا گیا۔ایران کے سرکاری ٹی وی کے مطابق عراق کی سرحد سے متصل کئی صوبوں میں زلزلہ آیا ہے جس کے باعث 8 دیہات تباہ ہوگئے ہیں۔
ایران اور عراق میں زلزلے نے قہر ڈھایا، 450افراد لقمہ اجل
