شہری ہلاکتیں…….جوڑیشل تحقیقات کیوں نہیں؟

 ریاستی حکومت نے کولگام میں پیش آئی حالیہ شہری ہلاکت کی تحقیقات کےلئے مجسٹریل انکوائری کرانے کے احکامات صادر کئے ہیں اور پارلیمانی امور کے وزیرعبدالرحمٰن ویری نے ایوان اسمبلی میں اس معاملے پر اپوزیشن کی طرف سے زبردست احتجاج کے بعد اسکی تصدیق کرتے ہوئے مذکورہ معاملے میں ملوثیں کےخلاف سنگین کاروائی کرنے کی یقین دہانی بھی کرائی۔ اس سے قبل وزیراعلیٰ محبوبہ مفتی نے اس ہلاکت پر زبردست افسوس کا اظہار کیاتھا۔ یہ واقع اس وقت پیش آیا جب کوکرناگ علاقہ میں ایک مسلح جھڑپ کے دوران مختلف علاقوں میں مظاہرین اور فورسز میں جھڑپیں ہوئی تھیں، لیکن مہلوک شہری کے لواحقین کے مطابق مذکورہ نوجوان کسی احتجاج کا حصہ نہیں تھا۔ یہ ایک حقیقت ہے کہ وزیراعلیٰ محبوبہ مفتی بار بار یہ باور کراتی رہتی ہیں کہ ہلاکتیں کسی بھی مسئلے کا حل نہیں ہے لیکن اسکے باوجود ایسے واقعات آنے کا سلسلہ رُکنے کا نام نہیں لے رہا ہے۔وزیراعلیٰ نے حال ہی میں یہ باور کرانے کی کوشش کی تھی کہ جنگجوئوںکی ہلاکتوں میں ہی کشمیر مسئلے کا حل مضمر نہیں بلکہ لوگوں کے زخموں پر مرہم رکھ کر ایک نئی شروعات کرنے کی ضرورت ہے تاکہ جموںوکشمیر کی ریاست کو سارک ممالک کے اشتراک کاایک نمونہ بنایا جائے۔ ریاستی اسمبلی میں گورنر کے خطبے پر بولتے ہوئے انہوں یہ شکوہ کیا تھا کہ جموںوکشمیر شاہراہ ریشم کا حصہ کیوں نہیں ؟ظاہر بات ہے کہ ایسا اُسی صورت میں ممکن ہوسکتا ہے ، جب بھارت پاکستان کےد رمیان تنازعات ختم ہوں۔ لہٰذا یہ کہنا غلط نہیں ہوگا کہ وزیراعلیٰ مرکزی حکومت اور اسکے ماتحت اداروں اور ایجنسیوں سے مخاطب تھیں۔ ریاستی حکومت اور مرکزی اداروں کے درمیان زمینی صورتحال کے افہام کے بارے میں یہ بُعد المشرکین عوامی مشکلات کا ایک بہت بڑا سبب ہے کیونکہ اس سے صاف ظاہر ہوتا ہے کہ مرکزی ایجنسیاں صورتحال کے تئیں ریاستی سرکار کو خاطر میں لانے کی روا دار نہیں۔ ایسا پہلی مرتبہ نہیں ہوا ہے بلکہ ماضی میں اسکی ایک لمبی تاریخ موجود ہے، جب ریاستی سرکار کے عندیہ اور بعض اوقات معلنہ مؤقف کے برعکس مرکزی اداروں ، خاص کر سیکورٹی ایجنسیوں کو سرگرم عمل دیکھا گیا ہے ۔ ریاستی انتظامیہ نے ان اندوہناک واقعات پر عوامی غیض و غضب کو ٹھنڈا کرنے کی غرض سے فوراً ہلاکتوںمیں ملوث افراد کے خلاف ایف آئی آر درج کرنے اور واقعات کی مجسٹریل تحقیقات کرنے کے احکامات صادر کئے ہیں۔لیکن کیا یہی صورتحال  کو سنبھالنے کا اقدام ہوسکتا ہے؟ خاص کر ایسے حالات میں جب اس نوعیت کے تحقیقاتی عمل سے لوگوں کا اعتبار مکمل طو ر پر اٹھ چکا ہے، کیونکہ ماضی میں بیسیوں ایسے ہی واقعات کی مثالیں دی جاسکتی ہیں، جب مجسٹریل یا پولیس انکوائری کے اعلان کئے گئے، لیکن بعد میں انکا کیا حشر ہوا؟اس کے بارے میں کسی کو کچھ پتہ نہیں۔ یہاں تک کہ دہائیاں گزر چکی ہیں مگرکئی انکوائریاں انجام کو نہیں پہنچیں۔ زیادہ دور جانے کی ضرورت نہیں گزشتہ برس کے ماہ اپریل میں کرالہ پورہ کپواڑہ کے ایک گائوں میں فورسز ارو جنگجوئوں کے درمیان مڈبھیڑ کے بعد عام شہریوں کے مکانات کو نقصان پہنچائے جانے کے خلاف احتجاجی مظاہرہ کرنے والے لوگوں پر وہاں تعینات فوجیوں نے گولیاں چلائیں، جس میں ایک بزرگ شہری جاں بحق ہوا۔ اس واقعہ پر بھی انتظامیہ نے ایک اعلیٰ پولیس آفسر کی سرکردگی میں تفتیش اور مجسٹریل انکوائری کرانے کا اعلان کرکے خاطی اہلکاروں کےخلاف قانونی کاروائی کرنے کا یقین دلایا تھا مگر معاملہ وہیں کاو ہیںہوا ہے۔سال 2017ختم بھی ہوالیکن نہ تو پولیس تحقیقات کے ہی نتائج سامنے آئے اور نہ ہی مجسٹریل انکوائری کی کوئی رپورٹ۔ ایف آئی آر اُس وقت بھی درج ہوا تھا لیکن اب تک کسی اہلکار کو گرفتار نہیں کیا گیا۔ موجودہ معاملہ بھی اس سے کچھ زیادہ مختلف نہیں۔ کیونکہ مذکورہ نوجوان کے لواحقین کا کہنا ہے کہ مہلوک نوجوان کسی احتجاج کا حصہ نہیں تھا۔ اب حقیقت کیا ہے یہ غیر جانبدارانہ تحقیقات سے ہی سامنے آسکتی ہے، لیکن سرکاری تحقیقاتی عمل پر اعتبار کے فقدان کی وجہ سے یہ سب کچھ عوام کے حلق سے اُترنا مشکل ہے اور سماج کے حساس طبقے خون ناحق کے ان واقعات پر زبردست برہم ہیں۔ اور تو اور مین اسٹریم سیاسی جماعتیں تک ان دعوئوں کو تسلیم کرنے کےلئے تیار نہیں ہیںمزاحمتی خیمہ اور عام لوگوں کی تو بات ہی نہیں۔ وزیراعلیٰ محبوبہ مفتی کے بیانات کو اگر ریاستی حکومت کی کلیدی اکائی پی ڈی پی کی پالیسی سوچ مان لیا جائے تو یہ انکی ذمہ داری بنتی ہے کہ وہ مؤثر تحقیقاتی عمل کوزمینی سطح پر روبہ عمل لاکر عوا م کے اعتماد کو بحال کرنےکے جتن کر ے وگرنہ صرف تقاریرسے صورتحال میں کوئی تبدیلی پیدا ہونے کی اُمید نہیں کی جاسکتی۔ خاص طور پر ایسے حالات میں جب سوشل میڈیا اور یک رخی سوچ رکھنے والی میڈیا چینلوں پر حقوق انسانی کی پامالیوں کو مختلف بہانوں سے درست قرار دینے اور وطن کے تئیں خدمت کے طور پر پیش کرنے کا بھوت سوار ہے۔حالیہ شہری ہلاکتوںکے حقائق کو سامنے لانے کےلئے حکومت کو جوڈیشل تحقیقات کرانے کا اقدام کرنا چاہئے، جبھی کسی قسم کے تحقیقاتی عمل پر عوامی اعتماد کو بحال کیا جاسکتا ہے۔