کٹھوعہ معاملہ : پٹھا نکوٹ عدالت میں گواہوں کی پیشی آج

جموں//ریاستی پولیس آج پٹھانکوٹ ضلع عدالت میں رسانہ عصمت دری و قتل معاملہ کے گواہوں کو پیش کرے گی جب کہ ایس ایس پی کرائم برانچ جموں بھی عدالت میں حاضر رہیں گے۔ واضح رہے کہ عدالت نے اس معاملہ کے 261میں سے 17گواہوں کے نام سمن جاری کیا تھا لیکن وہ جمعہ کے روز پیش نہ ہو سکے تھے جس پر فاضل جج نے ایس ایس پی کرائم کو اصالتاً عدالت میں حاضر ہونے کے لئے کہا ۔ پیر کے روز تین گواہوں کے عدالت میں پیش ہونے کی توقع ہے جب کہ متاثرہ بچی کے والدین کو چند دیگران کے ہمراہ منگل کو عدالت میں پیش کیا جا سکتا ہے ۔ ذرائع کا کہنا ہے کہ بیشتر گواہوں کا تعلق خانہ بدوش طبقہ سے ہے جو موسمی نقل مکانی کے معمول کے مطابق پہاڑی علاقوں کی طرف کوچ کر گئے ہیںاس لئے عدالتی سمن کی تعمیل کروانے میں تاخیر ہو گئی ہے ۔ عدالت نے جمعرات کو آٹھ میں سے 7ملزمان کے خلاف الزامات طے کئے تھے جن میں سانجھی رام اس کا بیٹا وشال، ایس پی او دیپک کھجوریہ، سریندر ورما، پرویش کمار، کانسٹبل تلک راج اور سب انسپکٹر اروند دتہ شامل ہیں۔ آٹھویں ملزم کو فی الحال نابالغ قرار دیا گیا ہے جب کہ کرائم برانچ کا دعویٰ ہے کہ وہ بالغ ہے اور اس کی عمر کے تعین کیلئے جموں ہائی کورٹ میں معاملہ درج کیا ہوا ہے ۔ ادھر وکلاء صفائی نے پرویش کمار عرف منو کے بھی نابالغ ہونے کا دعویٰ کرتے ہوئے پٹھانکوٹ سیشن کورٹ میں عرضی دائر کر رکھی ہے جس پر آج سماعت کی توقع ہے ۔