سرینگر//ششماہی دربامئو کے تحت وادی میں سیکریٹریٹ دفاتر26 اکتوبر کو بند ہوکر5 نومبر کو جموں میں کھلیں گے۔ جی اے ڈی کے ایک حکم نامے کے مطابق ہفتہ میں پانچ دِن کام کرنے والے سرکاری دفاتر سرینگر میں26 اکتوبر2018 بروز جمعہ اور ہفتہ میں6 دن کام کرنے والے سرکاری دفاتر27 اکتوبر بروز سنیچر دفتری اوقات کے بعد سالانہ دربار مؤ کے سلسلے میں بند ہوں گے۔ یہ دفاتر5 نومبر2018 ء بروز سوموارجموں میں دوبار ہ کھلیں گے۔سبھی محکموں سے کہا گیا ہے کہ وہ22 اکتوبر کو ایک گزٹیڈ افسر اور4 سے5نان گزٹیڈ ملازمین پر مشتمل ایڈوانس پارٹی جموں میں ریکارڈ موصول کرنے کیلئے روانہ کریں۔جے اینڈ کے ایس آر ٹی سی کو ہدایت دی گئی ہے کہ وہ جموں کے ملازمین کو 27 اور28 اکتوبر2018ء کوٹرانسپورٹ سہولیت فراہم کرنے کیلئے اچھی حالت میں معقول تعداد میں بسوں کا انتظام کرے۔اسی طرح وادی کشمیر کے ملازمین کیلئے بھی3اور4 نومبر کو ٹرانسپورٹ سہولیات بہم رکھنے کی ہدایت دی گئی ہے۔ایڈوانس ٹکٹوں کی بکنگ22 اکتوبر2018 ء سے سول سیکرٹریٹ اور ایس آر ٹی سی کے مین بُکنگ کاؤنٹر سے کرائی جاسکتی ہے۔اس کے علاوہ ایس آر ٹی سے کو ہدایت دی گئی ہے کہ وہ سرینگر سے جموں کیلئے ریکارڈ کی منتقلی کیلئے مناسب تعداد میں ٹرک دستیاب رکھے۔ایس آر ٹی سی کو ایک کرین اور 2 خالی بسیں اور 2 ٹرک قافلہ کے ہمراہ رکھنے کی ہدایت دی گئی ہے ۔علاوہ ازیں کانوائے کے ساتھ موبائل ورکشاپ بھی رکھنے کی بھی ہدایت دی گئی ہے۔ سرینگر سے جموں سفر کرنے والے ملازمین کی سہولیت کیلئے محکمہ صحت کو قاضی گنڈ، بانہال، رام سو، رام بن، پتنی ٹاپ، کُد، اودہمپور اور جھجر کوٹلی میں طبی سہولیات بہم رکھنے کی ہدایت دی گئی ہے۔ سپیشل مؤ ٹی اے یکساں بنیاد پر15 ہزار روپے فی ملازم ادا کیا جائے گا ۔ مؤ دفاتر میں کام کرنے والے ملازمین کوماہ اکتوبر 2018 ء کی تنخواہ22 اکتوبر کو واگذار کی جائے گی۔جموں میں سول سیکرٹریٹ اور سیکرٹریٹ سے باہر ہفتہ میں پانچ دِن کام کرنے والے دفاتر صُبح9 بجکر30 منٹ سے شام ساڑھے پانچ بجے تک کام کاج کریں گے جب کہ سول سیکرٹریٹ کے باہر ہفتہ میں6 دن کام کرنے والے دفاتر صُبح10 بجے سے شام ساڑھے چار بجے تک کام کریں گے۔
مو دفاتر26 اکتوبر کوبند اور5 نومبر کو جموں میں کھلیں گے
