جسٹس مہیشوری اور جسٹس کھنہ نے سپریم کورٹ کے جج کا حلف لیا

 نئی دہلی//جسٹس دنیش مہیشوری اور جسٹس سنجیو کھنہ نے آج سپریم کورٹ کے جج کے عہدہ کا حلف لیا۔ چیف جسٹس رنجن گوگوئی نے عدالت کے چیمبر نمبر ایک میں دونوں ججوں کو حلف دلایا ۔ اس کے ساتھ ہی عدالت عظمی میں ججوں کی مجموعی تعداد 28ہوگئی جب کہ تین عہدے اب بھی خالی ہیں۔ سپریم کورٹ کے جج کے طور پر ترقی پانے سے پہلے جسٹس مہیشوری کرناٹک ہائی کورٹ کے چیف جسٹس اور جسٹس کھنہ دہلی ہائی کورٹ کے جج تھے ۔ان دونوں ججوں کی ترقی دینے کے کالیجے ئم کے فیصلے کی مخالفت بھی ہوئی تھی ۔ اس کی وجہ سے بعض ماہرین قانون اور سابق ججوں نے اعتراضات درج کراتے ہوئے کہا تھا کہ جسٹس گوگوئی کی صدارت والی پانچ رکنی کالیجئم میں دہلی ہائی کورٹ کے چیف جسٹس راجندر مینن اور راجستھان ہائی کورٹ کے چیف جسٹس پردیپ نندراجگوگ کو نظر انداز کیا ہے ۔ اس کی وجہ سے وکلاء کی اعلی ترین تنظیم بارکونسل آف انڈیا اور مختلف وکلاء تنظیموں نے بھی کالیجئم کے اس معاملے پر دس جنوری کے فیصلے پر سوالات کھڑے کئے ہیں۔ اس دوران قانون و انصاف کی وزارت نے کالیجے ئم کی سفارش صدر رام ناتھ کووند کے پاس بھیجی تھی، جنہوں نے گذشتہ 16جنوری کو اس پر دستخط کردئے ۔ پندرہ مئی 1958کو پیدا ہوئے جسٹس مہیشور ی نے راجستھان یونیورسٹی سے فزکس میں گریجویشن کی ڈگری حاصل کی ۔ وہ 1980 میں جودھ پور یونیورسٹی سے قانون میں گریجویٹ ہوئے اور 8مارچ 1981 کو وکیل کے طور پر رجسٹرڈ ہوئے ۔ جسٹس مہیشوری 13فروری 2018کو کرناٹک ہائی کورٹ کا چیف جسٹس بننے سے پہلے 24فروری 2016سے 12 فروری 2018 تک میگھالیہ ہائی کورٹ کے چیف جسٹس رہے ۔ جسٹس کھنہ کی پیدائش 14 مئی 1960کو نئی دہلی میں ہوئی تھی۔ وہ 24 جنوری 2005 سے 17جنوری 2019تک دہلی ہائی کورٹ کے جج رہے ۔یو این آئی