ہم حکومت اور بی سی سی آئی کے فیصلے کے ساتھہیں:وراٹ

وشاکھاپٹنم/ہندوستانی کرکٹ ٹیم کے کپتان وراٹ کوہلی نے پلوامہ میں سی آر پی ایف جوانوں پر دہشت گردانہ حملے کے بعد ہندستان اور پاکستان کے درمیان انگلینڈ میں ہونے والے ورلڈ کپ میچ کو لے کر ہفتہ کو اپنی خاموشی توڑتے ہوئے کہا کہ وہ اس معاملے میں حکومت اور ہندستانی کرکٹ کنٹرول بورڈ (بی سی سی آئی) کے فیصلے کے ساتھ جائیں گے ۔وراٹ نے اتوار کو وشاکھاپٹنم میں آسٹریلیا کے خلاف ہونے والے پہلے ٹوئنٹی -20 مقابلے کی شام پریس کانفرنس میں اس معاملے پر اپنی رائے رکھی۔پاکستان کے ساتھ ورلڈ کپ میں کھیلنے کو لے کر وراٹ نے کہاکہ دہشت گرد حملے میں شہید ہوئے سی آر پی ایف جوانوں کے اہل خانہ کے تئیں ہماری ہمدردی ہے ۔ ہم ملک اور بی سی سی آئی کے فیصلے کے ساتھ ہیں۔ ہمارا خیال ہے کہ اس بارے میں حکومت ہند اور بی سی سی آئی جو فیصلہ لے گا ہم اس کی قدر کریں گے اور ان کے فیصلے کے ساتھ جائیں گے ۔وراٹ سے پہلے ہندستانی ٹیم کے کوچ روی شاستری نے بھی اس معاملے پر بی سی سی آئی کے فیصلے کے ساتھ جانے کی بات کہی۔شاستری نے کہاکہ میچ کھیلنا ہے کہ نہیں یہ مکمل طور پر بی سی سی آئی اور حکومت ہند کے فیصلے پر منحصر ہے ۔ ان کو پتہ ہے کہ حالات کیسے ہیں اور ان حالات میں کیا کرنا ہے ۔ اگر حکومت کہتی ہے کہ معاملہ انتہائی حساس ہے اور ہمیں ورلڈ کپ میں نہیں کھیلنا چاہیے تو میں حکومت کے فیصلے کی حمایت کروں گا۔یو این آئی ۔