سرینگر/پیپلز کانفرنس کے چیئر مین سجاد غنی لون نے سوموار کو روزنامہ گریٹر کشمیر کو دھمکی آمیز فون کالز ملنے کے بعد ادارے کے ساتھ یکجہتی کا اظہار کیا۔
سجاد لون نے اپنی ایک ٹویٹ میں لکھا''گریٹر کشمیر، جموں کے سٹاف کو دھمکانا حد درجہ افسوسناک ہے۔ ہم پریس کی آزادی کے حمایتی ہیں اور اس دھمکی کی مذمت کرتے ہیں۔ ہم گریٹر کشمیر کے ساتھ یکجہتی کا اظہار کرتے ہیں''۔
واضح رہے کہ اتوار کو گریٹر کشمیر کے جمونں بیورو کو نامعلوم نمبر سے کئی دھمکی آمیز فون آئے جن میں فون کرنے والے نے دھمکی دی کہ وہ گریٹر کشمیر کے جملہ اسٹاف کو جان سے مارڈالے گا۔
فون کرنے والے نے کہا کہ وہ جموں اور سرینگر میں قائم گریٹر کشمیر کے دفتر وں کے اندر داخل ہوکر جملہ اسٹاف کو گولیوں سے مار ڈالے گا۔
ادارے نے اس سلسلے میں گاندھی نگر جموں کے پولیس اسٹیشن میں شکایت درج کرلی ہے جہاں ایک دن میں دھمکی دینے والے شخص کی شناخت کی یقین دہانی کرائی گئی ہے۔
