سوپور // سوپور کے مضافاتی گائوں میں مسلح تصادم آرائی کے دوران 2جنگجو جاں بحق ہوئے جبکہ مقام جھڑپ پر مظاہرین اور فورسز میں پتھراو اور شلنگ ہوئی نیز معمول کی سرگرمیاں ٹھپ ہوکر رہ گئیں۔اس دوران انتظامیہ نے سوپور میں افواہ بازی پر قابو پانے کی خاطر موبائل انٹرنیٹ سروس کومعطل کردیا۔ ادھرایڈیشنل ڈپٹی کمشنر سوپورعاشق حسین نے تمام کالجوں اور ہائر اسکینڈری اسکولوں کے علاوہ تحصیل زینہ گیر کے تحت آنے والے ہائر اسکینڈری اسکولوں میں کام کاج معطل رکھنے کے احکامات صادر کئے ہیں۔ فوج کی 22آر آر، سی آر پی ایف اور جموں وکشمیر پولیس کے اسپیشل آپریشن گروپ سے وابستہ اہلکاروں نے جمعرات کی صبح ڈانگر پورہ کے بونہ پورہ محلے کا اُس وقت سخت محاصرہ عمل میں لایا جب انہیں علاقے میں لشکر طیبہ سے وابستہ 2جنگجوئوں کی موجودگی کی اطلاع ملی۔پولیس کے مطابق اس دوران فورسز نے علاقے میں داخل ہوکر گھر گھر تلاشی کا باضابطہ آغاز کیا۔پولیس کا کہنا ہے کہ جونہی فورسز کی رسائی مشتبہ مقام تک ممکن ہوئی تو یہاں چھپے بیٹھے اسلحہ برداروں نے زبردست فائرنگ کی اور فورسز نے بھی جوابی کارروائی کی اور یوں مسلح تصادم آرائی شروع ہوئی۔طرفین کے درمیان گولیوں کا تبادلہ کئی گھٹنوں تک جاری رہنے کے بعد اختتام پذیر ہوا۔جس کے بعدپولیس نے دو جنگجوئوں کی لاشیں برآمد کیں۔ پولیس نے بتایا کہ مارے گئے جنگجوئوںکی شناخت نصیر احمد میر ولد محمد یوسف ساکن براٹھ کلاں اور آصف احمد وار ولد غلام محمد ساکن وار پورہ سوپور کے بطور ہوئی ہے، جن کا تعلق لشکر طیبہ سے تھا اور ان کی تحویل سے قابل اعتراض مواد کے علاوہ اسلحہ و گولہ بارود بھی ضبط کرلیا گیا۔نصیر احمد 17نومبر 2017کو جنگجوئوں کی صف میں شامل ہوا تھاجبکہ آصف 2فروری 2019 کو سرگرم ہوا۔
جھڑپیں، ہڑتال
جھڑپ شروع ہونے کیساتھ ہی نوجوانوں کی مختلف ٹولیوں نے سڑکوں پر نکل کر فورسز کارروائی کیخلاف سخت احتجاج کیا۔ مظاہرین نے فورسز کارروائی میں رخنہ ڈالنے کی خاطر کئی اطراف سے سنگ باری کی جس کے جواب میں علاقے میں کچھ دیر کیلئے افرا تفری کا ماحول پیدا ہوا۔ مظاہرین نے اسلام، آزادی کے حق میں نعرے لگاتے ہوئے جائے جھڑپ کی جانب پیش قدمی شروع کرنے کی کوشش کی تاہم فورسز اہلکاورں نے مظاہرین کی کوشش کو ناکام بناتے ہوئے درجنوں آنسو گیس کے گولے داغے۔ ڈانگرپورہ بونہ پورہ علاقے میں جھڑپ شروع ہونے کے ساتھ ہی یہاں آناً فاناً دکانیں اور تجارتی مراکز بند ہوگئے جبکہ سڑکوں سے ٹریفک کی نقل و حمل بھی بہت حد تک متاثر ہوگئی۔ اس دوران ایڈیشنل ڈپٹی کمشنر سوپورعاشق حسین نے تازہ حکم نامہ جاری کرتے ہوئے قصبہ سوپور کے تحت آنے والے تمام کالجوں اور ہائر اسکینڈری اسکولوں کے علاوہ تحصیل زینہ گیر کے تحت آنے والے ہائر اسکینڈری اسکولوں میں کام کاج کو معطل رکھنے کے احکامات صادر کئے۔
