ٹیم کی کارکردگی سے بے حد خوش ہوں :وراٹ کوہلی

لیڈز/ سری لنکا کو ورلڈ کپ میں گروپ مرحلے کے اپنے آخری میچ میں سات وکٹوں سے شکست دینے اور پوائنٹس ٹیبل میں سرفہرست مقام پر رہنے کے بعد ہندستانی ٹیم کے کپتان وراٹ کوہلی نے کہا ہے کہ وہ ٹیم کی کارکردگی سے بے حد خوش ہیں اور انہیں اپنی اس ٹیم پر فخر ہے ۔ ہندستان کا اب سیمی فائنل میں مقابلہ چوتھے نمبر کی ٹیم نیوزی لینڈ سے نو جولائی کو مانچسٹر میں ہوگا۔ میچ کے بعد وراٹ نے کہاکہ ہم اچھی کارکردگی کرنا چاہتے تھے ۔ ایمانداری سے کہوں تو میں نے توقع نہیں کی تھی کہ ہم سرفہرست جگہ پر رہتے ہوئے سیمی فائنل میں جائیں گے لیکن ٹیم کی مسلسل اچھی کارکردگی اور محنت کی وجہ سے یہ ممکن ہو سکا ہے ۔ واقعی میں اپنی ٹیم کی کارکردگی سے مطمئن ہوں اور کافی فخر محسوس کر رہا ہوں۔ ہندستان کے لئے کھیلنا ہم سب کے لئے انتہائی اعزاز کی بات ہے ۔ کپتان نے کہاکہ آگے کی آزمائش کے لئے ٹیم تیار ہے لیکن ہم ہمیشہ ایک پہلو کو لے کر نہیں چل سکتے ہیں۔ میرے خیال سے ٹیم تبدیلی کے لئے تیار ہے اور زیادہ موقع ملنے سے وہ اپنے کھیل کو نئے طول و عرض دے سکتے ہیں۔ میچ میں پچ کا اہم رول ہوتا ہے تو ہمیں اس کے حساب سے ایک متوازن ٹیم رکھنی ہوگی اور جو بھی کمبی نیشن حالات کے حساب سے فٹ بیٹھے ہم اس کے ساتھ آگے بڑھیں گے ۔ انہوں نے کہاکہ ہم میچ میں کافی اعتماد کے ساتھ کھیلتے ہیں۔ ہم پہلے بیٹنگ یا بولنگ دونوں میں سے کچھ بھی کرتے ہیں تو اس میں ہم حالات کو دیکھتے ہوئے ٹیم میں تال میل رکھتے ہیں اور اس کے حساب سے ہم جہاں پہنچے ہیں میں اس سے خوش ہوں۔ سیمی فائنل کے اپنے حریف کے لئے وراٹ نے کہاکہ ہمیں اس سے کوئی فرق نہیں پڑتا کہ ہمارا مقابلہ کس ٹیم سے ہے اور نہ ہی ہم اس پر اپنی توجہ مرکوز کرتے ہیں۔ اگر ہم اچھا نہیں کھیلیں گے تو کوئی بھی ٹیم ہمیں ہرا سکتی ہے اور اگر ہم بہتر کارکردگی کا مظاہرہ کریں گے تو ہم کسی بھی ٹیم کو شکست سے دو چار کر سکتے ہیں۔ انہوں نے کہاکہ ٹیم کی توجہ صرف اپنے کھیل پر مرکوز ہے اور ہمیں اپنی قابلیت پر پورا بھروسہ ہے ۔ ہم صرف چاہتے ہیں کہ ٹیم سیمی فائنل میں اپنے کھیل سے بہترین کارکردگی کرے اور ایک ٹیم کی حیثیت سے اپنی طاقت دکھائے ۔ لہذا اس بات پر توجہ مرکوز کرنا کہ ہمارا مقابلہ کس ٹیم سے ہے اس کا کوئی جواز نہیں ہے ۔ ہمیں اچھا کھیل کھیلنا ہے اور نتیجے اپنے حق میں رکھنے ہیں۔ آل راؤنڈر ہردک پانڈیا کے لئے وراٹ نے کہاکہ پانڈیا نے شاندار کھیل کا مظاہرہ کیا ہے ۔ خاص طور پر پہلے 3-4 میچ میں دباؤ میں آنے کے بعد ان کے کھیل میں بہت سدھار ہوا ہے ۔ پانڈیا نے بہترین طریقے سے واپسی کی ہے اور بہت متاثر کیا ہے ۔ وہ ایک بلے باز کی طرح سوچتے ہیں۔ جب وہ بولنگ کرتے ہیں تو اپنے آپ کو بلے باز کی جگہ پر رکھ کر سوچتے ہیں کہ وہ وہاں ہوتے تو کیا کرتے ۔ یہ سوچ کر ہی وہ مختلف طریقے سے بولنگ کرتے ہیں۔ انہوں نے کہاکہ جب پانڈیا بلے بازی کرتے ہیں تو پہلی ہی گیند پر جارحانہ ہوکر کھیلنا پسند کرتے ہیں ۔ پانڈیا جیسے کھلاڑی کا ٹیم میں ہونا بہت اہم ہے ۔ امید ہے کہ آگے کے مقابلوں میں بھی وہ ایسا ہی کریں گے ۔ فی الحال وہ انتہائی شاندار کارکردگی کا مظاہرہ کر رہے ہیں۔یو این آئی