سری نگر// جنوبی کشمیر کے ضلع شوپیان کے سگھو ہندہامہ نامی گاﺅں میں بدھ کی صبح ہونے والے ایک مسلح تصادم میں تین جنگجو مارے گئے ۔
یہ ضلع شوپیان میں گذشتہ چار دنوں کے دوران تیسری جنگجو مخالف کارروائی تھی جس میں تین جنگجو جاں بحق ہوگئے۔ قبل ازیں 7 اور 8 جون کو بالترتیب ربن اور پنجورہ نامی علاقوں میں 9 جنگجو مارے گئے تھے۔ اس طرح سے ضلع شوپیان میں گذشتہ چار دنوں کے دوران مارے جانے والے جنگجوﺅں کی تعداد 12 ہوگئی ہے۔
جموں وکشمیر پولیس کے ایک ترجمان نے بتایا کہ شوپیان کے سگھو ہندہامہ میں بدھ کی علی الصبح چھڑنے والا مسلح تصادم تین جنگجوﺅں کی ہلاکت پر ختم ہوگیا ۔ انہوں نے مزید کہا کہ مہلوک جنگجوﺅں کی شناخت معلوم کی جارہی ہے نیز مسلح تصادم کی جگہ سے اسلحہ و گولہ بارود برآمد کیا گیا ہے۔
سری نگر میں قائم فوج کی پندرہویں کور کے ترجمان نے بتایا کہ جموں وکشمیر پولیس کو ملنے والی خفیہ اطلاع پر سیکورٹی فورسز نے سگھو ہندہامہ میں منگل اور بدھ کی درمیانی رات قریب پونے دو بجے کارڈن اینڈ سرچ آپریشن شروع کیا۔ انہوں نے کہا کہ بدھ کی علی الصبح قریب ساڑھے پانچ بجے طرفین کے درمیان فائرنگ کا تبادلہ شروع ہوا جو تین جنگجوﺅں کی ہلاکت پر رک گیا۔
سرکاری ذرائع نے بتایا کہ شوپیان پولیس، فوج کی 44 راشٹریہ رائفلز اور سی آر پی ایف نے گذشتہ رات دیر گئے سگھو ہندہامہ میں تلاشی آپریشن شروع کیا۔ انہوں نے کہا کہ جوں ہی سیکورٹی فورسز کی ایک پارٹی مشتبہ جگہ کے نزدیک پہنچی تو وہاں موجود جنگجوﺅں نے اس پر فائرنگ کی جس کے بعد طرفین کے درمیان مسلح تصادم چھڑ گیا۔
ذرائع نے بتایا کہ قریب تین گھنٹوں تک جاری رہنے والے فائرنگ کے تبادلے میں تین جنگجو مارے گئے جن کی شناخت معلوم کی جارہی ہے۔ انہوں نے مزید کہا کہ تصادم کے دوران سیکورٹی فورسز اور عام شہریوں کا کوئی جانی نقصان نہیں ہوا۔
دریں اثنا ضلع شوپیان میں موبائل انٹرنیٹ خدمات معطل کی گئی ہیں۔
