سرینگر//جنوبی کشمیر میں سیکورٹی فورسز اور جنگجوﺅں کے مابین دو مختلف معرکہ آرائیوں کے دوران8جنگجو جاں بحق ہوگئے۔یہ دونوں معرکہ آرائیاں گذشتہ روز شروع ہوئیں تھیں جن میں سے ایک ختم ہوگئی جبکہ دوسری جاری ہے۔
شوپیان کے امام صاحب علاقے میں واقع بنڈپاوا نامی گاﺅں میں گذشتہ روز شروع ہوئی معرکہ آرائی میں ابھی تک5جنگجو جاں بحق ہوگئے۔اس معرکہ میں گذشتہ روز ایک جبکہ آج مزید4جنگجو جاں بحق ہوگئے۔
فوج نے ایک مختصر بیان جاری کرتے ہوئے بنڈپاوا نامی گاﺅں میں5جنگجو ہلاکتوں کی تصدیق کرتے ہوئے کہا کہ ابھی جنگجو مخالف آپریشن جاری ہے۔
سیکورٹی فورسز اور جنگجوﺅں کے مابین یہ معرکہ کل اُس وقت شروع ہوا جب فورسز نے بنڈ پاوا میں تلاشی آپریشن شروع کیا جس کے دوران جنگجوﺅں اور فورسز کا آمنا سامنا ہوگیا اور طرفین نے ایک دوسرے پر گولیاں چلائیں۔
ادھر ضلع پلوامہ کے پانپور علاقے میں واقع میج نامی گاﺅں میں بھی کل ہی ایک معرکہ شروع ہوگیا جو آج ختم ہوگیا۔ اس معرکہ آرائی کے ابتداءمیں ہی ایک جنگجو جاں بحق ہو اتھا جبکہ دو جنگجوﺅں نے مقامی مسجد میں پناہ لے رکھی تھی۔
آئی جی پی کشمیر وجے کمار نے ایک ٹویٹ میں کہا کہ محصور جنگجوﺅں کیخلاف مسجد کا تقدس برقرار رکھتے ہوئے کوئی بارودی مواد استعمال نہیں کیا گیا اور اُن کیخلاف صرف آنسو گیس استعمال کی گئی جس سے دونوں جاں بحق ہوگئے۔اس طرح یہاں جاں بحق ہونے والے جنگجوﺅں کی تعداد تین ہوگئی۔
دونوں مقامات پر جاں بحق ہوئے جنگجوﺅں کی شناخت کے بارے میں تاہم حکام نے کچھ نہیں کہا۔
