سرینگر// جنوبی کشمیر کے ضلع پلوامہ میں جمعرات کی شام سے جاری مسلح تصادم میں تین جنگجو مارے گئے ہیں۔
فوج نے ایک مختصر بیان جاری کرتے ہوئے مذکورہ معرکہ آرائی کے دوران تین جنگجوﺅں کے جاں بحق ہونے کی تصدیق کی۔
اس سے قبل ضلع پلوامہ کے چیوا الر ترال میں جنگجوﺅں کی موجودگی سے متعلق خفیہ اطلاع ملنے پر سیکورٹی فورسز نے مذکورہ علاقہ میں جمعرات کی شام تلاشی آپریشن شروع کیا۔
تلاشی آپریشن کے دوران ایک مخصوص جگہ کی جانب پیش قدمی کے دوران وہاں موجود جنگجوﺅں نے سیکورٹی فورسز کی پارٹی پر فائرنگ کی۔
فوج کے مطابق سیکورٹی فورسز کی جوابی فائرنگ کے بعد طرفین کے درمیان مسلح تصادم چھڑ گیا جس میں تین جنگجو مارے گئے۔
فوج نے مزید کہا کہ جھڑپ کی جگہ سے اسلحہ و گولہ بارود بر آمد کیا گیا ہے۔
ذرائع کے مطابق یہ جنوبی کشمیر میں رواں ماہ چلایا جانے والا 12 واں جنگجو مخالف آپریشن ہے۔ ان بارہ آپریشنز میں اب تک 33 جنگجو مارے جاچکے ہیں۔
