نئی دہلی/ بے شمار دولت سے بھرپور انڈین پریمیر لیگ (آئی پی ایل ) کا پورا 13 واں سیزن متحدہ عرب امارات (یو اے ای ) میں ہوسکتا ہے اور ہندوستانی کرکٹ کنٹرول بورڈ (بی سی سی آئی) نے اس کے لئے 26 ستمبر سے سات نومبر تک کی غیرسرکاری ونڈو طے کی ہے ۔ بی سی سی آئی اس سلسلے میں حتمی فیصلہ تبھی کرے گا جب بین الاقوامی کرکٹ کونسل (آئی سی سی ) 18 اکتوبر سے 15 نومبر تک آسٹریلیا میں ہونے والے ٹی ٹوئنٹی عالمی کپ کو ملتوی کرنے کا اعلان کرے جس کا امکان ظاہر کیا جارہا ہے ۔ کرک انفو کے مطابق سمجھا جارہا ہے کہ بی سی سی آئی نے ہندوستانی حکومت کو خط لکھ کر ٹورنامنٹ کو یو اے ای میں کرانے کی اجازت مانگی ہے ۔ بورڈ نے ساتھ ہی ٹیم کے کھلاڑیوں اور حکام کے سفر کے لئے ضروری اجازت بھی مانگی ہے ۔ آئی پی ایل کو اس سال 29 مارچ سے ہونا تھا لیکن کورونا وائرس کے سبب آئی پی ایل کو غیرمعینہ مدت کے لئے ملتوی کردیا گیا تھا۔
امارات میں آئی پی ایل کا 13 واں سیزن کھیلے جانے کا امکان
