خواتین کی ترقی ہمارا اہم مشن :بخاری | جموں اور بڈگام میں مختلف جماعتوں کے متعدد سیاسی کارکن اپنی پارٹی میں شامل

؎ جموں//مختلف سیاسی جماعتوں سے وابستہ 100 سے زائد خواتین لیڈران وکارکنان نے سید محمد الطاف بخاری کی موجودگی میں جموںمیں اپنی پارٹی میں شمولیت اختیار کر لی ،جبکہ بڈگام سے درجنوں سیاسی کارکنان بھی اپنی پارٹی میں شامل ہوئے ۔اپنی پارٹی کے ایک پریس بیان کے مطابق جموں میں ایک پروگرام کا اہتمام پارٹی خواتین ونگ صوبہ جموں کی انچارج نمرتہ شرما نے کیاتھا۔ اس موقع پر اپنے خطاب میں الطاف بخاری نے سبھی خواتین کا خیر مقدم کرتے ہوئے امید ظاہر کی کہ وہ خواتین کی ترقی کیلئے کام کریں گے اور خواتین کی ترقی کا مشن اپنی پارٹی کا اہم مشن ہو گا ۔نمرتہ شرما نے مانگ کی کہ جموںوکشمیر میں خواتین کو سیاسی ریزرویشن دی جائے۔ انہوں نے کہاکہ خاص طور سے دیہی علاقہ جات میں خواتین اسکیموں کے بارے میں ناواقف ہیں اور یہ انتظامیہ کی ذمہ داری بنتی ہے کہ انہیں فلاحی پروگراموں کے متعلق بیدارکیاجائے۔ موصوفہ نے صوبہ جموں میں پارٹی خواتین ونگ کو مضبوط بنانے کا عزم کرتے ہوئے کہاکہ جموں وکشمیر میں خواتین کو سیاسی ریزرویشن دی جانی چاہئے ،جنہیں دہائیوں سے نظر انداز کیاگیاہے۔ شمولیت کرنے والوں میں رجنی سنگرہ، کومل وید، منجو مشرا، دیپکا مہاجن، نمرتہ گپتا، پنویت کور، پنکی کماری، ریکھا کماری، مینو شرما وغیرہ قابل ِ ذکر ہیں۔ادھرضلع بڈگام سے تعلق رکھنے والے مختلف سیاسی جماعتوں سے وابستہ درجنوں کارکنان نے بدھ کو جموں وکشمیر اپنی پارٹی میں شمولیت اختیار کر لی۔ ترجمان کی طرف سے جاری بیان کے مطابق اپنی پارٹی میں شمولیت اختیار کرنے والوں میں نیشنل کانفرنس لیڈر اور سابقہ ضلع آرگنائزئر بڈگام ماسٹر محمد مقبول، سابقہ کانگریس نائب صدر ضلع بڈگام عبدالغنی سوداگر اور سابقہ نائب صدر این سی پی پروفیسر (ریٹائرڈ)غلام محمد پال بھی شامل ہیں۔ اِن کا پارٹی صوبائی صدر کشمیر محمد اشرف میر، عبدالمجید پڈر، نور محمد شیخ، منتظر محی الدین، فاروق اندرابی، عرفان نقیب، شوکت غیور اور مشتاق گنائی نے خیر مقدم کیا۔ نئے شامل ہونے والوں نے کہا’’ہمیں جموں وکشمیر اپنی پارٹی کا ایجنڈا عملی لگا جوکہ مساوی ترقیاتی منصوبے پر مبنی ہے۔ ہمارے علاقوں کو انتہادرجے تک نظرانداز کیاگیا اور کم سے کم سہولیات جو کسی بھی مہذب انسانی آبادی کے لئے دستیاب ہونی چاہئے،سے بھی محروم رکھا گیا ، لیکن اب ہمیں پختہ یقین ہے کہ اپنی پارٹی کی زیر ِ قیادت کام کرنے کے دوران ہمارا ضلع کے اندر بھی زندگی کے ہر شعبے میں واضح تبدیلی دیکھنے کو ملے گی ‘‘۔اس موقع پر محمد اشرف میر نے کہاکہ اپنی پارٹی پر اعتماد اور بھروسہ قائم کرنے کیلئے وہ لوگوں کے شکرگذار ہیں۔ انہوں نے کہا اپنی پارٹی لوگوں کی مشکلات ومسائل کو کم کرنے کے لئے کام کرنے کی وعدہ بند ہے اور اِس کے لئے کوئی دقیقہ فروگذاشت نہ چھوڑا جائے گا۔ میر نے کہاکہ ضلع بڈگام خاص طور سے چرار ِ شریف تاریخی اہمیت کا حامل ہے اور اپنی پارٹی اِس کی جامع ترقی کے لئے ہمیشہ کام کریگی۔ انہوں نے اُمید ظاہر کی کہ آج کی جوائنگ سے ضلع بڈگام میں اپنی پارٹی کیڈر مضبوط ہوگا۔ انہوں نے پارٹی ساتھیوں سے اپیل کی کہ وہ لوگوں کے روز مرہ مسائل کو حل کرنے کے لئے ہر جگہ عوامی رابطہ مہم میں تیزی لائیں۔