افسانچے

ہاں میں نے بھی سنا ہے کہ میرا بھائی علیم خان اپنی بیٹی کی بات ماننے سے صاف انکار کر رہا ہے۔ وجہ کیا ہے؟ یہ کسی کو معلوم نہیں ہے۔ یہ بھی سنا ہے کہ خوشبو نے باپ کو دھمکی دی ہے کہ اگر اس کی خواہش پوری نہ کی گئی تو وہ خود کشی کرے گی ۔

عابد خان نے سگریٹ ایشٹرے میں مسلتے ہوئے بیوی سے کہا،اور علیم خان نے کہا ہے کہ وہ خود گولیوں سے بھرا  پستول بیٹی کو دے گا یا خود اس کے لیے زہر خرید کر لایے گا یا پھر خود اس کا گلا گھونٹ کر اس کا خاتمہ کرے گا۔

پتہ نہیں ایسا کیوں۔۔۔ذرا آپ ‌اپنے بھائی سے پوچھ لیں کہ وہ اپنی بیٹی پر ظلم کیوں کر رہا ہے۔ سکینہ بیگم نے شوہر سے کہا۔

دوسرے دن عابد خان نے اپنے بھائی سے پوچھ لیا۔

بھائی صاحب آپ  خوشبو کی شادی میں دیوار بن کر ‌کیوں کھڑے ہیں۔ بات کیا ہے۔ اونچ نیچ، امیری، غریبی،ذات پات مسلکی اختلاف یا  لڑکے میں کوئی نقص۔۔یا پھر۔۔۔

میں خوشبو کو کبھی اس شادی کی اجازت نہیں دوں گا چاہیے وہ خودکشی بھی کرے۔ سمجھتی کیا ہے وہ اپنے آپ کو۔ بڑی الٹرا ماڈرن لڑکی بن چکی ہے۔ ہمارے خاندان کا نام مٹی میں ملاے گی۔ سمجھتی کیا ہے وہ اپنے آپ کو۔۔۔۔

مگر بات کیا ہے۔ آپ کا پرابلم کیا ہے۔ کسی کو معلوم ہی نہیں ہے کہ وہ کیا چاہتی ہے اور آپ کیا چاہتے ہیں۔ عابد خان نے اس کی بات کاٹ کر کہا۔

میں چاہتا ہوں کہ اس کی شادی ہو مگر۔۔۔۔

مگر کیا؟

مگر وہاں نہیں جہاں وہ بے وقوف لڑکی چاہتی ہے۔ وہ پاگل ہو گئی ہے

مگر پرابلم کیا ہے کچھ تو بتائیں!؟

پرابلم۔۔۔۔پرابلم یہ ہے کہ ۔۔۔۔۔۔پرابلم سن کر تمہارے ہوش اڑیں گے زمین میں دھنس جاؤ گے۔۔

ایسی کیا بات ہے۔میں بھی تو سنوں۔

بات یہ ہے کہ تمہاری لاڈلی اور میری چہیتی بیٹی خوشبو اپنی سہیلی سپنا کے ساتھ شادی کرنا چاہتی ہے۔۔۔۔۔۔۔

 

 

سنٹرل لیبارٹری میں تعنیات محمد سلیم اپنے ہمسایہ نور علی کے گھر اس کے کووڑ ٹیسٹ کا نمونہ لینے گیا۔

گھر میں داخل ہوتے ہی نور علی کی بہو نے اس سے کہا؛

سلیم صاحب ہم لٹ گئے، جب سے بوڑھا کووڑ پازیٹیو ہوا تب سے اس‌پر اتنا خرچہ آگیا ہے کہ ہماری ساری جمع پونجی ختم ہوگئی اب ہم قرض لینے پر مجبور ہورہے ہیں۔ سال بھر ہم نے صرف اُبلا ہوا ساگ کھایا اور اب بوڑھے کے لئے گوشت، مرغ، انڈے، پنیر، مچھلی، دودھ، سبزیاں، تازہ اور خشک میوے اور قیمتی دوایاں لا لا کر ہم کنگال ہوگئے ہیں۔ اب ہمارے پاس پھوٹی کوڑی بھی نہیں بچی ہے اسلیے آپ سے گزارش ہے کہ اس بار اگر بوڑھے کی رپورٹ پازیٹو بھی آئے تو اسے نگیٹیو لکھنا۔

یہ سن کر محمد سلیم دوسری منزل میں گیا، جہاں بوڑھا نور علی چھت کے نیچے ایک تنگ و تاریک کوٹھری میں لیٹا ہوا تھا۔۔۔محمد‌سلیم کو دیکھتے ہی وہ سنبھل کر بیٹھا اور  اسکی طرف دیکھ کر کہا

بیٹا! تمہاری بڑی مہربانی ہوگی مجھے پازیٹیو ہی رہنے دینا۔۔۔۔