نئی دہلی//وزیر داخلہ امت شاہ نے جموں و کشمیر میں اپوزیشن پارٹیوں کو آڑے ہاتھوں لیتے ہوئے منگل کو کہا کہ کانگریس اور گپکار الائنس جموں و کشمیر کو ایک بار پھر سے دہشت اور افرا تفری کے دور میں لے جانا چاہتا ہے۔
گپکار اعلامیہ برائے عوامی اتحادکی سرگرمیوں کے سلسلے میں شاہ نے سلسلے وار ٹویٹ کرکے ااس اتحاد میںشامل سبھی پارٹیوں کی سخت مذمت کی اور کہا ” یہ چاہتے ہیں کہ غیرملکی طاقتیں جموں و کشمیر میں مداخلت کریں“۔ انہوں نے کانگریس صدر سونیا گاندھی اورپارٹی رہنما راہل گاندھی سے گپکار الائنس کے سلسلے میں اپنا رخ واضح کرنے کو کہا۔
شاہ نے ٹویٹ میں کہا”گپکار گینگ عالمی ہورہاہے۔ وہ چاہتے ہیں کہ غیر ملکی طاقتیں جموں و کشمیر میں مداخلت کریں۔ گپکار گینگ نے ہندوستانی ترنگے کی توہین کی ہے۔کیا سونیا جی اور راہل جی گپکار گینگ کے ان اقدامات کی حمایت کرتے ہیں؟انہیں ملک کے لوگوں کے سامنے اپنا رخ واضح کرنا چاہئے۔“
انہوں نے مزید کہا”کانگریس اور گپکار گینگ کشمیر کو ایک بار پھر دہشت اور اتھل پتھل والے دور میں لے جانا چاہتے ہیں۔وہ دلتوں ،خواتین اور قبائلیوں کے حقوق کو چھیننا چاہتے ہیں جو ہم نے آرٹیکل 370 کو ہٹاکر یقینی بنائے ہیں۔ اسی لئے لوگ انہیں ہر جگہ خارج کر رہے ہیں۔“
وزیر داخلہ نے زور دے کر کہا”جموں و کشمیر ہندوستان کا لازمی حصہ رہا ہے،اور ہمیشہ رہےگا۔ہندوستان کے لوگ قومی حقوق کے خلاف کسی بھی ناپاک اتحاد کو اب اور برداشت نہیں کریں گے۔یا تو گپکار گینگ قومی موڈ کے ساتھ چلے ورنہ لوگ اسے ڈبو دیں گے۔“
