طویل عرصہ بعدکورونا لہر میں ٹھہرائو

 سرینگر //جموں و کشمیر میں پچھلے 24گھنٹوں کے دوران 23ہزار25 افراد کے تشخیصی ٹیسٹ کئے گئے جن میں 232کی رپورٹیں مثبت آئیں اور اسطرح متاثرین کی مجموعی تعداد ایک لاکھ 18ہزار495ہوگئی ہے۔ ان میں 48ہزار694جموں جبکہ 69 ہزار 801کشمیر سے تعلق رکھتے ہیں۔ پیر کو مزید3افراد کورونا وائرس سے فوت ہوگئے۔ متوفین کی مجموعی تعداد 1844 تک پہنچ گئی جن میں 676 جموں صوبے جبکہ 1168 کشمیر میں فوت ہوئے ہیں۔ نئے 232 معاملات میں 103 کشمیر جبکہ 129 جموں صوبے میں سامنے آئے ہیں۔ کشمیر کے 103 متاثرین میں 36سرینگر، 9بارہمولہ، 10بڈگام، 15کپوارہ، 18پلوامہ، 4اننت ناگ، 0بانڈی پورہ، 5گاندربل، 2کولگام اور 4شوپیان سے تعلق رکھتے ہیں۔ جموں صوبے کے 129متاثرین میں 97جموں، 8ادھمپور، 2راجوری، 2ڈوڈہ، 9کٹھوعہ، 0کشتواڑ،2سانبہ،3پونچھ،0رام بن اور 6ریاسی سے تعلق رکھتے ہیں۔ 

 کورونا وائرس سے جموں و کشمیر میں پیر کو مزید 3افراد فوت ہوگئے۔ مرنے والوں میں 2کشمیر جبکہ ایک جموں صوبے میں ایک فوت ہوگیا ہے۔ کشمیر میں فوت ہونے والے متاثرین میں ایک سرینگر اور ایک گاندربل سے تعلق رکھتا ہے۔ سرینگر میں تعینات محکمہ صحت کے ایک سینئر ڈاکٹر نے بتایا ’’نٹی پورہ سے تعلق رکھنے والی ایک 70سالہ معمر خاتون کورونا وائرس سے پیدا ہونے والے نمونیا سے فوت ہوگیا ہے‘‘۔ سینئر ڈاکٹر نے بتایا’’ مذکورہ مریضہ کو چند دن قبل صدر اسپتال میں داخل کیا گیا ہے لیکن وہ پیر کو فوت ہوگئی‘‘۔وسطی کشمیر کے گاندربل میں تعینات محکمہ صحت کے ایک سینئر ڈاکٹر نے بتایا ’’کھلہ مولہ سے تعلق رکھنے والا ایک 70سالہ معمر شخص کورونا وائرس کی وجہ سے سکمز صورہ میں فوت ہوگیا ہے۔ سینئر ڈاکٹر نے بتایا کہ مذکورہ مریض ہائی بلڈپریشر کے علاوہ دیگر بیماریوں میں مبتلا تھا  لیکن اسکی موت وائرس لگنے سے ہوئی ہے۔ادھر جموں صوبے میں بھی پیر کو کورونا وائرس سے ایک شخص فوت ہوا ہے جس کا تعلق ضلع جموں سے ہے۔ 

 سرکاری بلیٹن میں بتایا گیا ہے کہ نوول کورونا وائرس کے1,18,495معاملات سامنے آئے ہیں جن میں سے3,525سرگرم معاملات ہیں ۔ اَب تک1,13,026اَفراد صحتیاب ہوئے ہیں ۔جموں وکشمیر میں کوروناوائرس سے مرنے والوں کی مجموعی تعداد1,844تک پہنچ گئی ،جن میں سے 1,168کا تعلق کشمیر صوبہ سے اور676کاتعلق جموں صوبہ سے ہیں۔اِس دوران پیر کو مزید458فرادشفایاب ہوئے ہیںجن میںجموں صوبے کے192اَفراداور کشمیر صوبے کے 266اَفرادشامل ہیں۔بلیٹن میں مزید کہا گیا ہے کہ اَب تک 35,51,273ٹیسٹوں کے نتائج دستیاب ہوئے ہیں جن میں سے  21؍دسمبر 2020؁ کی شام تک 34,32,778نمونوں کی رِپورٹ منفی پائی گئی ہے ۔علاوہ ازیں اَب تک8,47,084افراد کو نگرانی میں رکھا گیا ہے جن کا سفر ی پس منظر ہے اور جو مشتبہ معاملات کے رابطے میں آئے ہیں۔ اِن میں20,628اَفراد کو ہوم قرنطین میں رکھا گیا ہے جس میں سرکار کی طرف سے چلائے جارہے قرنطین مراکز بھی شامل ہیں ۔3,625  اَفراد کوآئیسولیشن میں رکھا گیا ہے جبکہ27,692اَفراد کو گھروں میں نگرانی میں رکھا گیا ہے۔اِسی طرح بلیٹن کے مطاب7,96,010اَفرادنے 28روزہ نگرانی مدت پوری کی ہے۔