ایم ڈی جے کے پی سی سی کی ورکر وں کیساتھ میٹنگ

جموں//منیجنگ ڈائریکٹر جے کے پی سی سی وِکاس کنڈل نے ورکرس ایسوسی ایشن جے کے پی سی سی سے ایک میٹنگ کی تاکہ ان کے مسائل اور تحفظات کا جائزہ لینے کے علاوہ فوری انتظامی امور کا جائزہ لیا جاسکے۔منیجنگ ڈائریکٹر نے اَرکان سے آرگنائزیشن کی بہتری کیلئے محنت ، لگن اور دیانتداری کے ساتھ کام کرنے پر زور دیا اوران کے مسائل بروقت حل کرنے کی یقین دہانی کرائی۔ انہوں نے اْنہیں یقین دلایا کہ ملازمین کہ ملازمین کی جائز شکایات کے حل کے لئے ہر ممکن مدد کی جائے گی۔

 

 

 جموں// امتحانی فیس کے جعلی اندراج و اخراج کے جعلی رسید بنانے والے ایک بڑے گروہ کا پردہ فاش کرنے کا دعویٰ کرتے ہوئے جموں وکشمیر پولیس کی کرائم برانچ نے منگل کے روز نجی کالجوں کے دو پروموٹرز کے علاوہ جموں یونیورسٹی کے چار ملازمین کے علاوہ جے کے بینک کے کچھ عہدیداروں کیخلاف مقدمہ درج کیا ہے۔ کرائم برانچ جموں کے ایک ترجمان نے ایک بیان میں کہاکہ یہ مقدمہ غلط اہلکاروں کے خلاف تعزیرات ہند کی متعلقہ دفعات کے تحت گہری تحقیقات کے لئے تحریری شکایت پر درج کیا گیا۔انہوں نے کہا کہ کرائم برانچ نے پرائیویٹ کالجوں کے پروموٹرز اور جے کے بینک برانچ نیو یونیورسٹی کیمپس جموں کے ساتھ جموں یونیورسٹی کے افسران اور عملے کے ساتھ  دھوکہ دہی ، مجرمانہ سازش ، جعلسازی اور سرکاری عہدوں کا غلط استعمال کرکے کالجوں کے امتحانی فیس کے جعلی اندراج و اخراج کے لئے مقدمہ درج کیا۔ترجمان نے بتایا "ان غلط افسران / عہدیداروں کے خلاف باقاعدہ فوجداری مقدمہ درج کیا گیا ہے جو انکوائری کے دوران نامزدگی کی فیس جعلسازی سے جمع کروانے اور واپس لینے میں ملوث پائے گئے تھے"۔ترجمان نے کہا کہ ان اداروں میںکٹھوعہ کا راجیو گاندھی میموریل کالج آف ایجوکیشن کٹھوعہ اور وویکا نندا کالج آف ایجوکیشن لکھن پور کٹھوعہ اور ان کے دوملازمین اشونی کمار کھجوریہ (راجیوگاندھی میموریل کالج آف ایجوکیشن اور وجے کمار(وویکا نندا کالج)کویونیورسٹی ملازمین عبدالغفور ،یوگیشور سنگھ،پردیپ کمار اور سنیل کمار کے ساتھ پرچہ میں نامزد کیاگیا ہے۔ ترجمان نے بتایا کہ جے کے بینک بینک برانچ ، نیو یونیورسٹی کیمپس جموں کے کچھ عہدیداروں پر بھی مقدمہ درج کیا گیا۔ ترجمان نے مزید کہا کہ مزید تفتیش جاری ہے۔

 

 

 

حسین محتشم

پونچھ//برف باری اور بارش کی وجہ جہاں پونچھ میں شدید سردی کی لہر شروع ہوئی ہے وہی مختلف علاقوں میں بجلی کی آنکھ مچولی بھی جاری ہے جس نے عوام کی ناک میں دم کردیا ہے۔بجلی بندش سے چھوٹے کاروبار شدید متاثر ہورہا ہے، مریضوں اورعام عوام کو شدید مشکلات کا سامنا ہے۔ضلع پونچھ کے ملحقہ گنڈی علاقہ میں بجلی کی بندش جاری ہے جو کہ مقامی لوگوں کے لئے ناقابل برداشت ہے ۔مقامی لوگوں کا کہنا ہے کہ گنڈی میں لوڈ شیڈنگ عوام کے ساتھ امتیازی سلوک ہے۔ اعجاز احمد نامی ایک مقامی شخص کا کہنا تھا کہ شدید سردی کی لہر چل رہی ہے اس دوران کی بجلی بندش نے عوام کو تنگ کردیا ہے۔ انہوں نے کہا کہ پہلے تو بجلی آتی نہیں اگر آئے تو ایک گھنٹے بجلی میں ہر پانچ اور دس منٹ بعد مین لائن ٹرف کرجاتی ہے جس کی وجہ سے لوگوں کو مشکلات کا سامنا کرنا پڑ رہا ہے۔ انہوں نے کہابجلی کی انکھ مچولی نے عوام کے ناک میں دم کردیا ہے اگر یہی حال رہا تو عوام احتجاج کرنے پر مجبور ہو جائیں گے۔

 

 

 محمد بشارت 

کوٹرنکہ // سب ضلع کوٹرنکا و بدھل میں محکمہ صحت کے ساتھ ساتھ بھیڑپالن ،زراعت ،آبپاشی و جل شکتی محکموں کے علاقہ محکمہ تعلیم کی زمینیں سکڑتی چلی جارہی ہیں۔ کوٹرنکہ کمینوٹی ہیلتھ سنٹر کی  17 کنال کے قریب اراضی تھی جو سکڑ کر تین کنال کے قریب رہ گئی ہے لیکن محکمہ صحت بے بسی  اور لاچارگی میں مبتلا ہے وہیں شیپ ہسبنڈری بدھل کی زمین بھی سکڑ کر چند مرلے ہی رہ گئی ہے۔ کوٹرنکہ میں سینکڑوں کنال  پر محیط کاہچرائی زمین کو اثر رسوخ رکھنے والے لوگوں نے ہڑپ کیا ہے اور محکمہ مال کے ملازمین پر چند کھوٹے سکوں کی خاطرسرکاری زمینوں کے جعلی اندارج کر کے سرکاری زمینوں کو فروخت کر نے کا الزام ہے ۔حالت یہ ہے کہ کوٹرنکہ اور بدھل میں بیت الخلاء تعمیر کرنے کے لیے سرکاری زمین دستیاب نہیں ہے ۔بلاک ڈیولپمنٹ افسر بدھل اولڈ کوٹرنکہ چوہدری سلام دین نے کشمیر عظمیٰ سے بات کرتے ہوے کہا کہ   بیت الخلاء کے لیے ہمارے پاس رقم موجود ہے اور محکمہ مال جگہ کی نشاندہی کرنے میں لیت لعل سے کام لے رہا ہے۔ انہوں نے کہا کہ محکمہ مال ہمیں جگہ کی نشاندہی کر کے دے ، ہم اج ہی بیت الخلاء کا کام شروع کریں گے۔

 

٭٭٭

 

 

بختیار حسین

سرنکوٹ// سنئی سے پیر کریم شاہ غازی کی درگاہ تک جانے والی 2 کلو میٹر سڑک ہنوز مرمت کی منتظر ہے۔ 2014 سیلاب کی وجہ سے سڑک دریا برد ہوگئی تھی جبکہ مذکورہ سڑک کی ایک پلی بھی دریا میں بہہ گئی تھی جس سے سڑک رابطہ منقطع ہو گیاتھا تاہم ابھی تک محکمہ پی ڈبلیو ڈی کی جانب سے سڑک کی بحالی کیلئے کوئی ٹھوس قدم نہیں اٹھایا گیا۔ خالد شاہ نامی نوجوان نے بتایا کہ پیر کریم شاہ کی درگاہ پر بڑی تعدا دمیں عقیدت مند آتے ہیں لیکن سڑک رابطہ نہ ہونے کی وجہ سے لوگ درگاہ پر نہیں پہنچ پارہے ہیں۔ مقامی لوگوں نے مطالبہ کیا کہ یا اس سڑک کی مرمت کی جائے یا پھر متبادل سڑک جلد از جلد بنائی جائے۔ ان کا کہنا تھاکہ اگر سڑک رابطہ وجود میں نہیں لایا گیاتو وہ احتجاج کا راستہ اختیار کرینگے۔

 

 

 

 

 

 عشرت حسین بٹ

منڈی// سرحدی ضلع پونچھ میں بھی متعدد اعلیٰ تعلیم یافتہ لوگ سرکاری نوکریاں نہ ملنے کے بعد مزدوری پیشہ اپنائے ہوئے ہیں تاکہ وہ اپنا اور اپنے اہلِ خانہ کا پیٹ پال سکیں۔ ضلع پونچھ میں متعدد نوجوان ایسے بھی ہیں جنہوں نے آرٹس اور سائینس مضامین میں ماسٹرس ڈگریاں حاصل کی ہیں اور سرکاری نوکری نہ ملنے پر مزدوری کر کے اپنا وقت گزار رہے ہیں۔ تحصیل منڈی کے ایک اعلیٰ تعلیم یافتہ عمار احمد نامی ایک نوجوان نے کشمیر عظمی کوبتایاکہ انہوں نے فارسی میں ماسٹرس ڈگری حاصل کی ہے اور ساتھ میں انہوں نے بی ایڈ کا امتحان بھی اچھے نمبرات سے پاس کیا ہے جس کے بعد متعدد بار سرکاری نوکری کے لیے بھی فارم بھر مگر ابھی تک انہیں سرکاری ملازمت نہیں ملی۔ ان کا کہنا تھا کہ ان کے والدین نے انہیں محنت مشقت کر کے اعلیٰ تعلیم دلوائی اور اعلیٰ تعلیم حاصل کر کے اب وہ نوکری نہ ملنے کے باعث دن بھر محنت مزدوری کرکے اپنے والدین کااور اپنا پیٹ پال رہے ہیں۔ انہوں نے کہا کہ ان جیسے سینکڑوں نوجوان اعلیٰ تعلیم حاصل کر کے مزدوری کر کے اپنے اہل و عیال کا پیٹ پال رہے ہیں۔ انکا کہنا تھا کہ کچھ ایسے بھی نوجوان ہیں جو اعلیٰ تعلیم حاصل کر کے عمر کی بالائی حد بھی عبور کر چکے ہیں۔ایسے متعدد اعلیٰ تعلیم یافتہ نوجوانوں نے گورنر انتظامیہ سے اپیل کی ہے کہ ان کے لیے جامع پالیسی کے تحت نوکر یاں فراہم کی جائیںتاکہ وہ بہتر ڈھنگ سے اپنی زندگی گزار سکیں۔