قلیل مدت میں چوری کے معاملات حل | چیئرمین جموں کشمیر بنک نے پولیس کے رول کو سراہا

سرینگر// جموںو کشمیر بینک کے چیئرمین و منیجنگ ڈائریکٹر راجیش کمار چھبرنے نقدی رقوم کے چوری کا ایک معاملہ حل کرنے پرجموں و کشمیر پولیس کی سراہنا کرتے ہوئے کہا کہ پولیس کی بر وقت کارروائی سے اُن پر عوام کے اعتماد کو توقیت پہنچی ہے۔ یونیورسٹی کیمپس جموں میں واقع جموں و کشمیر بینک کی شاخ سے دس لاکھ روپے کی چوری ہوئی تھی اور CCTVفوٹیج کی مدد سے ایس ایچ او گاندھی نگر گرنام سنگھ اور انچارج پولیس پوسٹ نہرو مارکیٹ سمت شرما کی مدد سے دو افراد کو کٹھوعہ سے گر فتار کر لیا گیا جن کے قبضے سے صرف تین دنوں میں چوری کی ہوئی رقم کو بر آمد کیا گیا۔ اسی طرح کے ایک اورواقع میں خمینی چوک بمنہ میں قائم اے ٹی ایم سے 8لاکھ 90ہزار6سو  روپے کی چوری ہوئی تھی اور ایس پی ویسٹ شہزاد سلاریا کی قیادت میں ایس ڈی پی او مظفر جان اور انکی ٹیم نے چوری کی رقم کو ATMمیں تعینات ایک سکیورٹی گارڈ سے وصول کیا۔ پولیس کی ان دو کامیاب کارروائیوں پر خوشی کا اظہار کرتے ہوئے جے کے بینک چیئرمین نے پولیس سربراہ دلباغ سنگھ کو ٹیلی فون کرکے مبارکباد دے دی اور کہا کہ جموں و کشمیر پولیس پر بینک کو ناز ہے ۔