ییلہانکا،بینگلورو// وزیر دفاع راج ناتھ سنگھ نے بدھ کو چین کا نام لئے بغیر کہا کہ ہندوستان سرحدوں پر صورت حال میں یک طرفہ تبدیلی کرنے کی کوششوں کو کسی حال میں کامیابی نہیں ہونے دےگا اور فوجیں ملک کی سالمیت اور اتحاد کی ہر قیمت پر حفاظت کرنے کےلئے تیار ہیں۔ سنگھ نے آج یہاں ایشیا کے سب سے بڑے ایئر شور ایئرو انڈیا کا باقاعدہ افتتاح کرنے کے موقع پر کہا کہ ہندوستان کو کئی محاذ پر ایک ساتھ چیلنجوں کا سامنا کرنا پڑ رہا ہے۔” ایک طرف سرحد پار سے دہشت گردوں کی ناپاک کوششیں جاری ہیں تو دوسری طرف جہاں سرحدوں کا تعین نہیں ہوا ہے وہاں انہیں بدلنے کی یک طرفہ کوشش کی جارہی ہے“۔انہوں نے کہا،”ہم نے لمبے وقت سے افواج کی طاقت کے دم پر متنازع سرحدوں میں تبدیلی کرنے کی کوششوں کو دیکھا ہے۔ہندوستان چوکس اور محتاط ہے۔ ہم اپنے لوگوں اور سالمیت کی حفاظت اور ان کوششوں کو ہر قیمت پر ناکام کرنے کےلئے پوری طرح تیار ہیں۔“
انہوں نے کہا کہ تین دن تک چلنے والی یہ نمائش ہندوستان کی حفاظت اور ایرواسپیس کے شعبہ میں مسلسل بڑھتی ہوئی طاقت کی علامت ہے اور انہیں یقین ہے کہ یہ خود انحصار ہندوستان کے خواب کو پورا کرنے کی سمت میں میل کا پتھر ثابت ہوگی۔ افواج کی تجدید کاری اور ہندوستان کو حفاظتی مصنوعات کی برآمدات کا گڑھ بنانے کا ذکر کرتے ہوئے انہوں نے کہا کہ اس کےلئے اگلے سات برسوں میں 130 ارب ڈالر کے منصوبے تیار کئے جارہی ہیں۔ مینوفیکچرنگ کی سہولیات کے لئے متعدد یونٹ تعمیر کیے جارہے ہیں جہاں جدید ترین دیسی ہتھیاروں کا نظام بنایا جارہا ہے۔
وزیر دفاع نے کہا کہ ہندوستان میں اب تک کی جانے والی سب سے بڑی ڈیل کے تحت ، ہندوستان ایروناٹکس لمیٹڈ کو فضائیہ کے لئے ہزار کروڑ کی لاگت سے 83 دیسی تیجس مارک 1 اے لڑاکا طیارے بنانے کا حکم دیا گیا ہے۔
