پلوامہ//وادی کشمیر میں دودھ کی روزانہ کی پیداوار میں پہلے نمبر پر آنے والا ضلع پلوامہ وادی کشمیر کا پہلا ایسا ضلع بن گیا ہے جہاں دودھ کا’’ اے، ٹی، ایم(ملک اے ٹی ایم ) نصب کیا گیا ہے ۔اس دوران اے ٹی ایم نصب کرنے کے دوسرے ہی دن یونٹ ہولڈر نے200لیٹردودھ فروخت کیا ۔جنوبی کشمیر کے ضلع پلوامہ میں محکمہ انیمل ہسبنڈری کی مالی معاونت سے ژاٹ پورہ میں دودھ کا ایکATMنصب کیا گیا ، جو کشمیر وادی میں پہلا دودھ کا اے ٹی ایم بن گیا ہے ۔اس دوران چیف انیمل ہسبنڈری آفسر پلوامہ ڈاکٹر محمد حسین وانی نے بتایا کہ محکمہ کے پاس بے روز گار نوجوانوں کے لئے متعدد اسکیمیں ہیں جن کی مدد سے وہ اپنا روز گار کما سکتے ہیں ۔ انہوں نے کہا ایک نوجوان کو ایک اسکیم کے تحت یہ یونٹ چلانے کے لئے کہا گیا ہے جس دوران انہوں نے ملک اے ٹی ایم نصب کیا ، تاکہ وہ اپنا روز گار کما سکے۔ افسر موصوف نے بتایا کہ اس ’’اے ٹی ایم ‘‘کے ساتھ ایک ٹینک لگی ہے جس میں 50لیٹر دودھ جمع رہتا ہے۔ انہوں نے بتایا لوگ یہاں سکہ اور ایک قسم کے خاص اے ٹی ایم کارڑ کا استعمال کر کے دودھ حاصل کر سکتے ہیں ۔ اس دوران ملک اے ٹی ایم کے مالک شبیر احمد وگے نے بتایا منگل کو دوسرا دن تھا جس دوران لوگوں نے اے ٹی ایم سے200لیٹر دودھ حاصل کیا ۔انہوں نے بتایا مجھے امید ہے کہ چند روز میں یہ کار وبار وسیع ہو گا کیوں یہاں پیسوں کے عوض دودھ24گھنٹے دستیاب رہے گا۔خیال رہے ضلع پلوامہ میں روزانہ دودھ کی پیداوار8.5لاکھ لیٹر ہے ۔
پلوامہ میں وادی کا پہلا دودھ کا اے ٹی ایم نصب | لوگوں نے 200لیٹر دودھ حاصل کیا
