بارشوں کے پانی سے سرینگر کی سڑکیں جھیلوں میں تبدیل | لالچوک ، خانیار ، بمنہ کالونی اور دیگر مقامات پر لوگوں کا عبور مرور دشوار

سرینگر//وادی میں بارشوںکے نتیجے میں شہر سرینگر اور دیگر اضلاع میں اہم رابطہ سڑکیں زیر آب آگئیں جس کے سبب مکینوں اور مسافروں کو گوناگوں مشکلات کا سامنا کرناپڑا ۔ وادی میںوقفے وقفے سے جاری بارشوں سے سرینگر کے قلب لالچوک کی سڑکیں جھیلوں میں تبدیل ہوگئیں۔ لالچوک ، ریگل چوک،مہاراجہ بازار، ریذیڈنسی روڑ، مولانا آزاد روڑ اور دیگر اہم سڑکوں پر پانی جمع ہونے کی وجہ سے وہاں سے گزرنے والی گاڑیاں جیسے جھیلوں میں کشتیاں چل رہی تھیں ۔ اگرچہ چند ایک جگہوں پر پانی کی نکاسی کیلئے موٹرپمپ لاگئے گئے تھے تاہم پانی کے آگے وہ ناکافی تھے۔ ادھر سرینگر کے خانیار چوک میں بھی پانی جمع تھا جس کی وجہ سے وہاں سے گزرنے والی گاڑیوں اور موٹر سائکل سواروں کو کافی مشکلات پیش آئیں۔سی این آئی کے مطابق پانی کی نکاسی کیلئے کوئی معقول انتظام نہ ہونے پرمقامی لوگوں نے میونسپلٹی کے متعلقہ ذمہ داروں کے خلاف سخت برہمی کااظہار کرتے ہوئے کہا کہ معمولی بارشوں سے خانیار کی سڑکیں سمندر وں کی شکل اختیار کرتی ہیں ۔ سرینگر، اننت ناگ شاہراہ پر بھی ر بارشوں کا پانی جمع ہونے کی وجہ سے لوگوں کا عبور و مرور دشوار بن گیا جبکہ سرینگر بارہمولہ شاہراہ پر بھی کئی جگہوں پر کافی پانی جمع ہونے کی وجہ سے وہاں سے گزرنے والی گاڑیوں کو چلنے پھرنے میں دشواریوں کا سامنا کرنا پڑا۔ ادھر بمنہ کی مختلف کالونیوںکے مکینوں نے سی این آئی کو فون پر بتایا کہ بمنہ کی اکثر کالونیوں کی سڑکیں زیر آب آگئیں اور لوگوں کا گھرو ں سے باہر نکلنا ناممکن بن گیا او ردرجنوں مکانوں میںبارش کا پانی داخل ہوگیا جس کے نتیجے میں وہاں جیسے سیلابی صورتحال پیدا ہوئی ہے ۔