ذہنی تنائواورسدباب

گاندربل//سینٹرل یونیورسٹی کشمیر کے شعبہ اسٹوڈنٹس ویلفیئر کے زیر اہتمام طلبہ ، اسکالروں ، فیکلٹی ممبران اور عملے کے لئے دماغی صحت سے متعلق ’’اعصابی تناؤ سے متعلق امراض‘‘کے موضوع پر آن لائن لیکچر کا انعقاد کیا گیا۔ گورنمنٹ میڈیکل کالج سرینگر کے نفسیاتی شعبہ کے سربراہ ڈاکٹر محمد مقبول نے لیکچردیا۔اس موقع پر وائس چانسلر پروفیسر معراج الدین نے کہا کہ کووڈ-19 وبائی امراض کی وجہ سے طلباء برادری بری طرح متاثر ہوئی ہے کیونکہ وہ اپنے گھروں تک ہی محدود ہوگئے ہیں۔انہوں نے طلبہ سے مطالبہ کیا کہ وہ دباؤ کو دور کرنے کے لئے مختلف جسمانی ورزش اور کتاب پڑھنے سمیت گھروں میں ہی مختلف سرگرمیوں میں پوری طرح مصروف رہیں۔ پروفیسر معراج الدین نے کہا کہ یونیورسٹی موجودہ حالات کی وجہ سے پیدا ہونے والی پریشانی اور تناؤ پر قابو پانے کے طریقوں اور ذرائع کے بارے میں طلباء کے لئے اس طرح کے مزید پروگراموں کا انعقاد کرے گی۔گورنمنٹ میڈیکل کالج سرینگر کے شعبہ نفسیات کے سربراہ ڈاکٹر محمد مقبول ڈار نے’’اعصابی اور تناؤ سے متعلق امراض‘‘کے موضوع پر گفتگو کرتے ہوئے ایک تفصیلی خاکہ پیش کرتے ہوئے کہا کہ محکمہ نفسیات میں کووڈ 19 وبائی بیماری کی وجہ سے لاک ڈاؤن شروع ہونے کے بعد متعدد اضطراب اور اعصابی تناؤ کی بیماریوں میں اضافہ دیکھنے میں آیا۔ڈاکٹر مقبول نے مزید کہا کہ تناؤ ہائی بلڈ پریشر ، موٹاپا ، ذیابیطس ، سر درد ، افسردگی اور اضطراب اور معدے کی پریشانیوں سمیت دیگر بیماریوں کا سبب بنتا جارہا ہے۔ انہوں نے مختلف قسم کے نفسیاتی امراض اور ان کے علاج کے طریقوں اور ذرائع پر بھی تبادلہ خیال کیا۔ پروفیسر ایم افضل زرگر رجسٹرار یونیورسٹی نے اپنے خطاب میں کہا کہ کسی بھی قسم کے نفسیاتی عارضے میں مبتلا افراد کوفوری طور پر ڈاکٹروں سے  صلاح لینی چاہئے۔شعبہ اسٹوڈنٹس ویلفیئر کے سربراہ ڈاکٹرمعراج الدین شاہ نے اپنے استقبالیہ خطبہ میں کہا کہ لوگ وبائی مرض میں مبتلا ہیں جس کی وجہ سے وہ مشکل ترین وقت میں گزر رہے ہیں اور لوگ خصوصا طلباء میں زبردست تناؤ ، اضطراب اور ذہنی عارضے پیدا ہوتے جارہے ہیں جس پر فوری طور پر توجہ دینے کی ضرورت ہے‘‘۔