وادی میں ہر جگہ سیکورٹی کے سخت انتظامات

سرینگر// پولیس کے انسپکٹر جنرل وجے کمار کا کہنا ہے کہ یوم آزادی کے پیش نظر وادی کشمیر میں ہر جگہ سیکورٹی کے سخت انتظامات کئے گئے ہیں۔انہوں نے کہا کہ وادی کے ہر ضلع ہیڈ کوارٹر پر یوم آزادی کی تقاریب کے پر امن انعقاد کو یقینی بنایا جائے گا۔موصوف نے ان باتوں کا اظہار یہاں جمعہ کے روز نامہ نگاروں کے ساتھ بات چیت کے دوران کیا۔ انہوں نے کہا ’’پندرہ اگست کو لے کر ہر جگہ سیکورٹی کے سخت انتظامات کئے گئے ہیں، اس سلسلے میں چیکنگ کی جا رہی ہے اور ڈرون سرویلنس کا بھی انتظام کیا گیا ہے ‘‘۔وجے کمار نے کہا کہ لوگوں کو گھبرانے کی کوئی ضرورت نہیں ہے پاکستان امن خراب کرنے کی ایسی کوششیں کرتا رہتا ہے ۔انہوں نے کہا کہ سیکورٹی فورسز تمام چلینجز کا مقابلہ کرنے کے لئے تیار ہیں۔قابل ذکر ہے کہ پولیس نے سری نگر اور گرد و نواح علاقوں کی فضائی نگرانی کے لئے جمعرات کو لالچوک کے نزدیک واقع پرتاب پارک میں ڈرونز کا تجربہ کیا۔اس موقع پر پولیس کے ایک سینیئر عہدیدار کے مطابق 15 اگست کے پیش نظر سول لائنز علاقوں کی ڈرونز کے ذریعے فضائی نگرانی کی جائے گی۔انہوں نے کہا کہ 15 اگست کی تقریب کے پیش نظر ہر جگہ سیکورٹی بڑھا دی گئی ہے۔ لوگوں کی تلاشی لی جا رہی ہے، نگرانی ڈرون کے ذریعے کی جاتی ہے، ہم تکنیکی نگرانی کر رہے ہیں ۔ادھرجمعہ کو شیر کشمیر کرکٹ سٹیڈیم میں فل ڈرس رہرسل کی گئی جس کے دوران مختلف سیکورٹی ایجنسیوں سے وابستہ ٹکٹریوں اور سکولی بچوں نے رنگا رنگ پروگرام پیش کئے۔فل ڈرس رہرسل کا پروگرام کئی گنٹوں تک جاری رہا۔جموں وکشمیر کے لیفٹیننٹ گورنر منوج سنہا شیر کشمیر کرکٹ اسٹیڈیم میں منعقد ہونے والی یوم آزادی کی مرکزی تقریب میں پرچم کشائی کریں گے ۔اس دوران جموں کشمیر انتظامیہ نے اس بات کی ہدایات دی ہیں کہ نہ صرف ہر ایک سرکاری و پرائیویٹ سکولوں بلکہ سبھی سرکاری دفاتر پر ترنگا لہرانے کی رسم انجام دی جائیگی ۔