مزید خبریں

سرینگر//مرکزی حکومت کسانوں کی آمدنی دوگنا کرنے کے عزم پر قائم ہے اوراس کیلئے کئی اسکیمیں بھی رائج کی جاچکی ہیں ۔ اس بات کااظہار مرکزی وزیربرائے فوڈ پروسیسنگ پشوپتی کمارپارس، جو عوام تک رسائی کے مرکزی حکومت کے پروگرام کے تحت وادی کے دورے پر ہیں ،نے پٹن میں باغ مالکان کے ساتھ بات کرتے ہوئے کیا۔ اس موقع پر وزیر موصوف نے کاشتکاروں پر زور دیا کہ وہ اپنے شعبوں میں جدید اور سائنسی طریقوں کو اپنائیں اور مزید کہا کہ اس سے پیداواری صلاحیت بڑھے گی ۔سی این آئی کے مطابق مرکزی حکومت کے عوام تک رسائی پروگرام کے ایک حصے کے طور پر مرکزی وزیر برائے فوڈ پروسیسنگ انڈسٹری پشوپتی کمار پارس نے ضلع بارہمولہ کے پٹن علاقے کا دورہ کیا جہاں انہوں نے میوہ اُگانے والوں کے ساتھ بات چیت کی۔اس دوران وزیر نے باغبانی اور دیگر متعلقہ محکموں کی جانب سے لگائے گئے سٹالز کا افتتاح کیا۔وزیر نے پٹن علاقے کے کچھ ترقی پسند کاشتکاروں سے بھی بات چیت کی جس دوران انہوں نے وزیرکو اپنے تاثرات اور کاشتکاری کے تجربات کی جانکاری دی۔وزیر نے ان پر زور دیا کہ وہ اپنے شعبوں میں جدید اور سائنسی طریقوں کو اپنائیں اور مزید کہا کہ اس طرح سے پیداواراور پیداواری صلاحیت میں اضافہ ہوگا۔ انہوں نے کہا کہ فوڈ پروسیسنگ کے شعبے میں بے پناہ صلاحیت ہے اور باغبانی کی مصنوعات کے ویلیو ایڈیشن کی ضرورت ہے تاکہ  زیادہ سے زیادہ منافع حاصل ہو۔ مزید انہوں نے اس بات کا اعادہ کیا کہ مرکزی حکومت کسانوں کی فلاح و بہبود کو یقینی بنانے کے ساتھ ساتھ ان کی آمدنی کو دوگنا کرنے کے لیے پرعزم ہے۔ کاشتکاروں نے کچھ اہم مسائل اور مطالبات بھی اٹھائے جن میں کولڈ سٹوریج کی سہولیت کی فراہمی ، مارکیٹ انٹرونشن اسکیم (ایم آئی ایس) کا جاری رکھنا ، سرینگر جموں شاہراہ پر میوہ سے لدی گاڑیوں کی بلاخلل نقل و حرکت کویقینی بناناشامل ہے ۔وزیر نے یقین دلایا کہ تمام جائز شکایات متعلقہ حکام کے ساتھ ان کے بروقت ازالے کے لیے اٹھائی جائیں گی۔

 

 

 سرینگر// سرینگر میونسپل کارپوریشن  نے تین افراد کے خلاف دستاویزات کی جعلسازی اور دکان الاٹمنٹ سے متعلق دھوکہ دہی کے خلاف ایف آئی آر درج کی ہے۔ تینوں افراد کو پولیس نے حراست میں لے لیاہے۔ کارپوریشن کے احاطے میں تین افراد غیر قانونی اور جعلی دستاویزات کے ساتھ پکڑے گئے جن میں جعلی دستاویزات بشمول الاٹمنٹ لیٹرز ، کرایہ نامے اور ڈپٹی کمشنر سرینگر اور جوائنٹ کمشنر ایس ایم سی کے جعلی دستخطوں کے ساتھ فہرستیں برآمد کی گئیں۔پولیس اسٹیشن شہید گنج میں ایک ایف آئی آر درج کی گئی اور تین افراد کو مزید تفتیش کے لیے پولیس کے حوالے کیا گیا۔ ایس ایم سی نے واضح کیا ہے کہ مجرمانہ جعلسازی یا بدعنوانی کی ایسی کارروائیوں کے لیے صفر رواداری ہوگی۔

 

 

گاندربل//مرکزی وزیر برائے اطلاعات ونشریات انوراگ ٹھاکور نے عوام تک رسائی کے مرکزی حکومت کے پروگرام کے تحت کل گاندربل کا دوروزہ دورہ شروع کیا۔دورے کے پہلے دن مرکزی وزیرنے زوجیلا پر تعمیر کی جارہی سرنگ اور زیڈ موڈ ٹنل پر ہورہے کام کا جائزہ لیا۔زوجیلا سرنگ کے معائنے کے دوران انہوں نے متعلقہ حاکموں پر زوردیا کہ وہ ٹنل کی تعمیر کے کام میں سرعت لائیں اور موسم سرما میں بھی ٹنل کی تعمیر کاکام جاری رکھیں۔انہوں نے معینہ مدت سے قبل ہی پروجیکٹ کو مکمل کرنے کی تاکید کی۔ اس موقعہ پر بولتے ہوئے وزیر نے کام کی رفتار پر اطمینان کااظہار کیااور کہا کہ زوجیلا سرنگ کی تعمیر سے لداخ اور کشمیرکے درمیان ساراسال رابطہ ممکن ہوگااوراس سے دونوں خطوں کی ترقی میں اضافہ ہوگا۔انہوں نے کہا کہ گزشتہ کئی برسوں سے جموں کشمیر میں بنیادی ڈھانچے کو ترقی دینے کے منصوبوں پر کام شدومد سے جاری ہے تاکہ خطے کی اقتصادی اور سماجی زندگی میں ترقی ہو۔زیڈ موڈ ٹنل کی تعمیر کاجائزہ لیتے ہوئے انہیں  این ایچ آئی ڈی سی ایل حکام نے مطلع کیا کہ اس پروجیکٹ کو ڈی بی ایف اوٹی طرزپر تعمیر کیاجارہا ہے اوراس پر2378کروڑ روپے کی لاگت آئے گی۔ اس موقعہ پر وزیر کو بتایا کہ کہ پروجیکٹ کی ایسکیپ ٹنل کی تعمیر کا کام پہلے ہی مکمل کیا جاچکاہے۔اس موقعہ پر وزیر کے ہمراہ ڈپٹی کمشنر گاندربل اور دیگر اعلیٰ حکام بھی تھے۔

 

 

سرینگر//اقوام متحدہ کی جنرل اسمبلی اجلاس میں پاکستان کی جانب سے کشمیر کے مسئلہ کو اجاگر کرنے پر سخت ردعمل کا اظہار کرتے ہوئے اقوام متحدہ میں بھارت کی فرسٹ سکریٹری ودیشہ میترا نے عمران خان کے خطاب کو بھارت کے اندرونی معاملات  مداخلت کی کبھی نہ ختم ہونے والی داستان قراردیا۔انہوں نے پاکستان کے اس مؤقف کو مسترد کردیا کہ مسئلہ کشمیر اقوام متحدہ میں ایک طویل عرصے سے جاری تنازعہ میں سے ایک ہے اور کہا کہ پاکستان کو چاہئے کہ وہ دوسروں کے معاملات میں مداخلت سے پہلے اپنے ملک پر توجہ دے ۔ سی این آئی کے مطابق پاکستان کی جانب سے اقوام متحدہ کی جنرل اسمبلی اجلاس میں جموں و کشمیر کا مسئلہ اْٹھانے کے جواب میں بھارت نے کہا ہے کہ اسلام آباد عالمی سطح پر عسکریت کے مرکز کے طور پر تسلیم کیا جاتا ہے جو شدت پسندوں کو پناہ دینے، تربیت دینے اور نوجوانوں کو عسکریت پسندوں کی صفوں میں شامل ہونے کے لیے ان کا خیر مقدم کرتا ہے۔اقوام متحدہ میں بھارت کی فرسٹ سکریٹری ودیشہ میترا نے عمران خان کے خطاب کو ’’بھارت کے اندرونی معاملات کے بارے میں کبھی نہ ختم ہونے والی داستان بتایا‘‘۔انہوں نے کہا کہ پاکستان کو بھارت کے اندورنی معاملات میں داخل دینے کا کوئی حق نہیں ہے اور اسلام آباد کو شدت پسندی سے نمٹنے پر توجہ دینی چاہئے۔انہوں نے مزید کہا کہ جموں کشمیر بھارت کا اٹوٹ حصہ ہے اور دو سال قبل جموں کشمیر کی خصوصی پوزیشن کو ختم کرکے اسکو مکمل طور پر بھارت میں ضم کر دیا گیا ۔ انہوں نے کہا کہ پاکستان با ر بار جموں کشمیر کے مسئلے کو اٹھاتا ہے تاہم اسکو آ ج تک اس کا کوئی فائدہ حاصل نہیںہوا ہے ۔ انہوں نے مزید کہا کہ اقوام متحدہ کے فورموںمیں پاکستان کاجموں کشمیر کا مسئلہ اٹھانا فضول مشق ہے اور اس سے نہ پاکستان کو آج تک کچھ حاصل ہوا اور نہ ہی آگے ہونے والا ہے ۔ 

 

 

 سرینگر//کشمیر یونیورسٹی کے شعبہ فارماسیوٹیکل سائنسز نے ’عالمی فارماسسٹ ڈے‘ منانے کے لیے 'معاصر وقت میں فارماسسٹ کے ابھرتے  کردارپر ایک ویبینار کا اہتمام کیا۔اس موقع پر وائس چانسلر پروفیسر طلعت احمد مہمان خصوصی تھے۔اپنے صدارتی خطاب میں پروفیسر طلعت نے   فارماسسٹوں پر زور دیا کہ وہ اپنی خدمات پیش کرتے ہوئے خلوص ، پیشہ ورانہ مہارت ، ہمدردی اور لگن کا مظاہرہ کریں۔ انہوں نے ادویات کے معیار ، حفاظت اور تاثیر کو یقینی بنانے میں قابل فارماسسٹ کے کردار کا خاکہ پیش کیا اور ان پر زور دیا کہ وہ اپنی پیشہ ورانہ زندگی میں مہارت اور فضیلت حاصل کریں۔ دوا سازوں کو صحت کی دیکھ بھال کے نظام کا ستون قرار دیتے ہوئے پروفیسر طلعت نے اس بات پر زور دیا کہ فارماسسٹ کو اپنے شعبے کے ہر حصے میں سبقت حاصل کرنے کی ضرورت ہے، چاہے وہ تدریس ، تحقیق ، فارمیسی پریکٹس یا دواسازی کی صنعت ہو۔اپنے افتتاحی خطاب میں ، ڈین تدریسی امور  پروفیسر فاروق مسعودی ، نے فارماسسٹوں سے کہا کہ وہ خود کو انسانیت کی خدمت کے لیے وقف کریں۔ انہوں نے فارمیسی کے گریجویٹس اور پوسٹ گریجویٹس پر زور دیا کہ وہ اپنی مہارت کے شعبوں میں قابل اور ماہر ہوں اور قومی اور بین الاقوامی سطح پر سبقت حاصل کرنے کے لیے اعلیٰ سطح کی مہارت حاصل کریں۔پروفیسر شوبھا رانی ہیرمٹھ ، ڈین آف فارمیسی ، آر جی یو ایچ ایس ، کرناٹک نے ڈرگ سیفٹی مانیٹرنگ اور فارماکوویجیلنس میں فارماسسٹ کے ابھرتے ہوئے کردار کے بارے میں بات کی۔ ڈاکٹر زینت اقبال ، سینئر فیکلٹی فار فارماسیوٹکس ، جامعہ ہمدرد ، نئی دہلی نے ایک پریزنٹیشن پیش کی ، جس میں انہوں نے بدلتے ہوئے عالمی منظر نامے کے نتیجے میں فارماسسٹوں کے لیے تیار ہونے والے اہم نئے شعبوں اور چیلنجوں کو چھوا۔پروفیسر ناہیدہ تبسم جو کہ مہمان خصوصی بھی تھیں ، نے ڈیپارٹمنٹ کی کامیابیوں اور آنے والے چیلنجز پر روشنی ڈالی۔ویبینار کے کنوینر اور ڈیپارٹمنٹ کے سربراہ پروفیسر مبشر حسین مسعودی نے خطبہ استقبالیہ دیا اور محکمہ کے موجودہ پروگراموں اور مستقبل کے منصوبوں کی وضاحت کی۔اپنے افتتاحی کلمات میں ، ویبینار کوآرڈینیٹر پروفیسر گیر محمد اسحاق نے عالمی فارماسسٹ ڈے کی اہمیت اور اس دن کو 1912 سے دنیا بھر کے فارماسسٹوں کے لیے وقف کرنے میں انٹرنیشنل فارماسیوٹیکل فیڈریشن کے کردار پر تفصیل سے روشنی ڈالی۔اس دوران  بین الاقوامی فارماسیوٹیکل فیڈریشن  اور ورلڈ ہیلتھ آرگنائزیشن کے نقطہ نظر کا مشاہدہ کرتے ہوئے ، آرینز کالج آف فارمیسی راجپورہ ، چندی گڑھ  میں عالمی فارماسسٹ ڈے منایا گیا جس کا موضوع فارمیسی،ہمیشہ آپ کی صحت کے لیے قابل اعتماد ہے۔اس  موقع پر ڈاکٹر بکاش میدھی ، پروفیسر ، فارماکولوجی ، پی جی آئی ایم ای آر ، ڈاکٹر پربھا گرگ ، پروفیسر ، شعبہ فارما کوائن فومیٹکس ، این آئی پی ای آر ، ڈاکٹر شیوانی جونیجا بیدی ، سربراہ ، کلینیکل فارماکالوجی ، فورٹیس ہسپتال ، موہالی ، راجیش کمار ، وائس پریذیڈنٹ ، مورپین لیبارٹریز لمیٹڈ اور ڈاکٹر راہول دیشمکھ ، پروفیسر اور ایچ او ڈی ، فارمیسی ڈیپارٹمنٹ ، نے شرکت کی جبکہ ڈاکٹر انشو کٹاریہ ، چیئرمین ، آریانز گروپ نے ویبینار کی صدارت کی۔ڈاکٹر کٹاریہ نے تمام مقررین کو مبارکباد دیتے ہوئے اور اس دن کی اہمیت پر روشنی ڈالتے ہوئے کہا کہ ہر سال 25 ستمبر کو عالمی فارماسسٹ دن عالمی سطح پر منایا جاتا ہے۔ خاص طور پر وبائی امراض کے دوران فارماسسٹ کے مددگار ہاتھ قابل ذکر ہیں ،لہذا دنیا بھر میں فارماسسٹ کی بے لوث خدمات کو عزت دینا اور خراج تحسین پیش کرنا ضروری ہے۔ڈاکٹر میدھی نے کہا کہ فارمیسی کا پیشہ لوگوں کی صحت کی ضروریات کے لیے ایک قابل اعتماد پیشہ رہا ہے اور اب اس وبا کے بعد فارماسسٹ کا کردار زیادہ ہوگا۔ ڈاکٹر گرگ نے روشنی ڈالی کہ مصنوعی ذہانت (اے آئی) جیسے جدید سائنس فارما انڈسٹری میں کاروباری تبدیلی کے بہت سارے مواقع فراہم کر سکتے ہیں۔

 

 

کشتواڑ//عاصف بٹ// پولیس تھانہ مڑواہ کشتواڑ  نے ایک اور مفرور جیش محمد کے سابق عسکریت پسند کو گرفتار کرنے کا دعویٰ کیا ہے جو گزشتہ 20 سال سے گرفتاری سے بچ رہا تھا۔کشتواڑ پولیس کو قابل اعتماد ذرائع سے موصول ہونے والی مخصوص معلومات پر پولیس تھانہ مڑواہ کی ایک خصوصی ٹیم نے مڑواہ میں مشتبہ مقامات پر چھاپے مار کر مفرور کو گرفتار کر لیا۔ گرفتار مفرور سابق عسکریت پسند کی شناخت بشیر احمد عرف جعفر خان ولد محمد شعبان ساکنہ نوگام مڑواہ کشتواڑ کے طور ہوئی جو ایف آئی آر زیرنمبر 42/2001 زیردفعہ  302،364/120 بی آر پی سی 7/27 آئی اے میں مطلوب تھاجس پر پولیس سٹیشن مڑواہ  میں مقدمہ درج تھا۔ مفرور کو عدالت میں پیش کیا گیا ہے اور عدالت کے حکم پر ملزم کو عدالتی حراست میں رکھا گیا ہے۔ واضح رہے کہ کل بھی کشتواڑ پولیس نے سابقہ مفرور حزب المجاہدین کے عسکریت پسند کو گرفتار کیا تھا۔

 

 

ادھم پور//جموں و کشمیر سے دفعہ 370 کو منسوخ کرنے کے بعد ترقی کے میدان میں بہت سی تبدیلیاں نظر آرہی ہیںکی بات کرتے ہوئے مرکزی وزیر مملکت برائے امور خارجہ اور تعلیم ڈاکٹر راج کمار رنجن سنگھ نے کہا کہ موجودہ حکومت جموں و کشمیر کو ترقی کے شاندار راستے پر لانے کی پوری کوشش کر رہی ہے۔ جموں کے ادھم پورہ ضلع میں عوامی آوٹ ریچ پروگرام کے تحت مرکزی وزیر مملکت برائے امور خارجہ اور تعلیم ڈاکٹر راج کمار رنجن سنگھ گورنمنٹ ہائی سکول دیہاری میں منعقدہ پروگرام کے دوران عوامی مطالبات سنے۔اس موقعہ پر انہوںنے کہا کہ جموں و کشمیر سے آرٹیکل 370 کو منسوخ کرنے کے بعد ترقی کے میدان میں بہت سی تبدیلیاں نظر آرہی ہیں جیسے میگا پروجیکٹوں کی تکمیل ، جاری ترقیاتی کاموں کی پیش رفت اور جموں و کشمیر میں مختلف مرکزی اسپانسر اسکیموں پر عمل درآمد ہے ۔ انہوں نے کہا کہ موجودہ حکومت جموں و کشمیر کو ترقی کے شاندار راستے پر لانے کی پوری کوشش کر رہی ہے۔جموں و کشمیر کے قدرتی اثاثوں اور قدرتی خوبصورتی پر تبصرہ کرتے ہوئے ڈاکٹر رنجن نے کہا کہ جموں خطے میں سیاحت کی بہت بڑی صلاحیت ہے اور ساتھ ہی سبزیوں کی مقامی پیداوار کو ایک منظم منصوبے میں تبدیل کرنے کی صلاحیت ہے۔عوامی آوٹ ریچ پروگرام کے دوران لوگوں سے بات چیت کرتے ہوئے ، وزیر نے علاقے میں تمام سرکاری اسکیموں کے نفاذ کی صورتحال پر تفصیلی رائے لی۔ انہوں نے کہا کہ اس آوٹ ریچ پروگرام کا بنیادی مقصد مرکزی طور پر سپانسر کردہ سکیموں کے نفاذ کا جائزہ لینا اور لوگوں سے رائے لینا ہے۔نئی تعلیمی پالیسی 2020 کی اہمیت پر زور دیتے ہوئے انہوں نے مزید کہا کہ نئی پالیسی تعلیم کے شعبے میں اصلاحات کی راہ ہموار کرتی ہے اور حکومت طلباء کو معیاری تعلیم کی فراہمی کے لیے پرعزم ہے۔

 

 

 کشتواڑ //جموں و کشمیر یو ٹی میں مرکزی حکومت کے عوامی رسائی پروگرام کے ایک حصے کے طور پر مرکزی وزیر مملکت برائے جل شکتی اور قبائلی امور بشیشور ٹوڈو نے اپنے تین روزہ دورے کے دوسرے دن ضلع کشتواڑ کا دورہ کیا ۔ ضلع کشتواڑ کے دور دراز پاڈر علاقے کا طویل دورہ اور سب ڈویژن پاڈٖر کے گلاب گڑھ میں اسکول اور سیاحت سہولت مرکز میں این ٹی پی ایچ سی کی عمارت کا افتتاح کرنے کے علاوہ وہاں عوامی شکایت کے ازالہ کیمپ کی صدارت کی ۔دورے کے دوران انہوں نے پی آر آئی ، بزرگ شہریوں ، ہمالیائی بدھسٹ سوسائیٹی ، سیاسی جماعتوں کے علاوہ ایس ایچ جی اور یوتھ کلب کے ارکان کے ساتھ ٹی ایف سی گلاب گڑھ پاڈر میں ایک انٹرایکٹو میٹنگ بھی کی ۔ قبل ازیں مرکزی وزیر نے نیو ٹائپ پرائمری ہیلتھ سنٹر ( این ٹی پی ایچ سی ) سوہل کی نئی تعمیر شدہ عمارت کا افتتاح کیا جسے پی ڈبلیو ڈی ڈویژن پاڈر نے تقریباً 171.45 لاکھ روپے کی لاگت سے تعمیر کیا ہے اور گلاب گڑھ میں سیاحت سہولت مرکز ( پی ایم ڈی پی ) کے تحت 244.08 لاکھ روپے کی تخمینہ لاگت کے ساتھ لیا گیا ہے جو کہ ایجنسی کشتواڑ ڈیولپمنٹ اتھارٹی نے تعمیر کیا ہے ۔ اس موقع پر انہوں نے پاڈر کے لوگوں کو مبارکباد دی کیونکہ اس سے سوہل اور ملحقہ علاقوں کی طبی امداد میں اضافہ ہو گا اس کے علاوہ ٹی ایف سی گلاب گڑھ بیس کیمپ مچیل ماتا یاترا میں سیاحوں اور یاتریوں ک ضروریات کو پورا کرے گا ۔ دریں اثنا بی ڈی او آفس گلاب گڑھ میں شکایات کے ازالے کے پروگرام کے دوران مرکزی ایم او ایس نے مقامی پی آر آئی کی قیادت میں مختلف وفود کی شکایات سُنیں ۔ وزیر نے ان کی شکایات اور مطالبات کو سُنا اور انہیں یقین دلایا کہ ان کے جائیز مطالبات کو مرحلہ وار بنیادوں پر حل کیا جائے گا ۔گلاب گڑھ پاڈر میں آؤٹ ریچ کیمپ کے دوران مقامی فنکاروں کی جانب سے رنگا رنگ ثقافتی پروگرام پیش کئے گئے جو کہ پروگرام کی مرکزی توجہ بنے رہے ۔ اس موقع پر خطاب کرتے ہوئے مرکزی وزیر نے کہا کہ مرکزی حکومت جموں و کشمیر کی ترقی اور یو ٹی کے لوگوں کی ہر ممکن مدد کرنے کی پابند ہے ۔ دریں اثنا مرکزی وزیر نے مقامی مصنوعات اور محکمانہ نمائشوں کیلئے مختلف محکموں کی جانب سے لگائے گئے سٹالز کا بھی معائینہ کیا ۔ دورے کے دوران ان کے ہمراہ ڈپٹی کمشنر کشتواڑ ، ایس ایس پی کشتواڑ ، ڈی ڈی سی ممبر پاڈر ہری کرشنا ، ڈی ڈی سی ممبر ناگسنی محمد اشرف ، اے ڈی سی کشتواڑ اور دیگر محکموں کے افسران تھے ۔  

 

 

ٹنگمرگ// مشتاق الحسن//مرچی پورہ ٹنگمرگ میں تیندوے نے اتوار شام بھیڑوں کے ریوڑ پر حملہ کرکے دوبھیڑوں کو چٹ کرلیا۔تفصیلات کے مطابق مرچی پورہ میں محمد رمضان گنائی کے بھیڑ ایک ہی جگہ جمع تھے کہ شام دیر گئے ایک تیندوااچانک نمودار ہوااوربھیڑوں کے ریوڑ میں گھس گیااورموقعہ پر ہی دوبھیڑوں کو ہلاک کیا۔جونہی بھیڑوں کی رکھوالی کرنے والے نے شورمچایا تولوگ لاٹھیاں لے کر گھروں سے باہر آئے جنہیں دیکھ کر تیندواایک بھیڑ کو منہ میں دبائے بھاگ گیا۔

 

 

سری نگر//کوٹرنکا راجوری میں درخت کی شاخ کاٹنے کے دوران 33کے وی ترسیلی لائن چھونے سے ایک نوجوان لقمہ اجل بن گیا۔ کے این ایس کے مطابق اتوار کو کوٹرنکا راجوری میں17سالہ محمد شعیب ولد محمد شکور ساکنہ کوئل راجوری درخت کی شاخیں کاٹ کررہا تھا جس دوران اس کا ہاتھ 33kvترسیلی لائن کو چھو گیا اور اسے زوردار جھٹکالگا اور نیچے گرکر اس کی موقع پر ہی موت واقع ہوگئی۔ ایس ایچ او کوٹرنکا حبیب پٹھان نے کہا کہ پولیس نے لاش کا پوسٹ مارٹم کرکے اسے آخری رسومات کیلئے لواحقین کے سپرد کیا۔ انہوںنے کہاکہ پولیس نے دفعہ174سی آر پی سی کے تحت کیس درج کرکے معاملہ کی تحقیقات شروع کی ہے۔ 

 

 

ارشاداحمد

 

گاندربل//لاراوراس سے ملحقہ گاندربل ضلع کے کئی علاقوں میں مویشیوں میں منہ اور کھر کی بیماری پھوٹ پڑنے سے متعددمویشی لقمہ اجل بن گئے ہیں یابیمارپڑگئے ہیں۔مقامی لوگوں کے مطابق لار،ریپورہ،واتل باغ،خرانہامہ،ژونٹھ ولی وارسمیت دیگر کئی علاقوں میں مویشیوں میں پچھلے ایک ماہ سے منہ اور کھر کے علاوہ کوئی اور پراسرار بیماری پھوٹ پڑی ہے جس کی وجہ سے اب تک ان علاقوں میں متعددمویشی مرگئے ہیں۔ایک ڈیری فارم کے مالک آفاق اشرف وانی نے اس نمائندے کو بتایا کہ کئی سال قبل اُس نے ایک ڈایری فارم شروع کیا لیکن پچھلے ایک ماہ سے اُس کی کئی گائیں منہ اورکھر اور نہ جانے او ر کس بیماری میں مبتلاء ہوکر مرگئیںاوراس طرح اُسے لاکھوں روپے کانقصان ہوا۔اشرف وانی نے کہا کہ حال ہی میں اس کی ایک گائے جس کی قیمت ایک لاکھ بیس ہزارروپے تھی،اچانک بیمار ہوئی اورچند ہی گھنٹوں میں مرگئی۔ایسی ہی صورتحال لار سے ملحقہ دیگر علاقوں میں بھی پائی جاتی ہے۔مقامی لوگوں کے مطابق لار میں اگرچہ بلاک ویٹرینری سینٹر موجود ہے لیکن وہاں کا عملہ دوردرازعلاقوں کارہنے والا ہے جب تک وہ موقع پر پہنچتے ہیں تب تک مویشی ہلاک ہوچکے ہوتے ہیں۔اس بارے میں بلاک ویٹرنری افسر لار نے بتایا کہ ہمارے پاس جب بھی کسی مویشی کے بیمار ہونے کی اطلاع پہنچتی ہے ،ہماری ٹیم فوری طور پر اس علاقہ یا گھر میں پہنچ جاتی ہے اور مویشیوں کاعلاج کیاجاتا ہے۔ 

 

 

رام بن//ضلع رام بن میں کووڈ پروٹوکول کو نافذ کرنے کے لیے نافذ کرنے کی مہم کو جاری رکھتے ہوئے انفورسمنٹ ٹیموں نے خلاف ورزی کرنے والوں کو چہرے کے ماسک پہننے کے بغیر گھومنے اور جسمانی فاصلہ برقرار نہ رکھنے پر جرمانہ کیا۔نافذ کرنے والی ٹیموں نے اپنے متعلقہ دائرہ کار میں معائنہ کے دوران 22ہزار800 روپے جرمانہ وصول کیا ۔انفورسمنٹ افسران نے لوگوں پر زور دیا کہ وہ چہرے کے ماسک پہنیں اور جسمانی فاصلہ برقرار رکھیں اس کے علاوہ اپنے قریبی سی وی سی پر کوویڈ ویکسی نیشن کی خوراکیں لیں۔ ضلع امیونائزیشن آفیسر ڈاکٹر سریش نے بتایا کہ ضلع رام بن میں آج 3140 افراد کو پہلی اور دوسری کوویڈ ویکسین کی خوراک دی گئی۔یف میڈیکل آفیسر ڈاکٹر محمد فرید بھٹ کی طرف سے جاری کردہ روزانہ بلیٹن کے مطابق محکمہ صحت نے 1419 نمونے جمع کیے ہیں جن میں 302 RT-PCR اور 1117 RAT نمونے شامل ہیں اس کے علاوہ 3140 افراد کو کوویڈ ویکسین ضلع کے مخصوص ویکسی نیشن مراکز میں دی گئی ہے۔

 

محمد تسکین

 

بانہال // سنیچر وار کی رات قریب نو بجے جموں سرینگر شاہراہ پر جموں سے جنوبی کشمیر کے اننت ناگ کی طرف آرہی ایک سکارپیو گاڑی ڈگڈول کے نزدیک شاہراہ سے لڑھک کر کم از کم 600 فٹ گہری کھائی میں گر گئی جس کے نتیجے میں گاڑی میں سوار ایک ستراں سالہ لڑکی سمیت دو افراد کی موت موقع پر ہی واقع ہوگئی تھی جبکہ گاڑی میں سوار پانچ اور دس سال کی عمر کے دو بچے شدید زخموں کے ساتھ معجزاتی طور بچ نکلے تھے ۔  پولیس نے سنیچروار کی رات اس حادثے میں لقمہ اجل بنے مسافروں کی شناخت ستراں سالہ روبینہ بانو دختر محمد سلیم مغل ساکنہ سلطان ڈھکی اوڑی ضلع بارہمولہ اور چالیس سالہ ڈرائیور امتیاز احمد قادری ولد غلام رسول قادری ساکنہ بٹ پورہ کھنہ بل ضلع اننت ناگ کے طور کی یے۔ بتایا جاتا ہے کہ امتیاز احمد قادری ضلع پولیس اننت ناگ میں بطور ایس آو تعینات تھا۔ پولیس نے کہا کہ اس حادثے میں زخمی ہوئے پانچ سالہ محسن احمد ولد امتیاز قادری اور دس سالہ عنایت احمد ولد محمد اقبال قادری ساکنان اننت ناگ کو کل رات ہی ضلع ہسپتال رامبن سے گورنمنٹ میڈیکل کالج اننت ناگ منتقل کیا گیا تھا اور ان کی حالت مستحکم بتائی جاتی ہے۔ 

 

 

 

 

 

 

 

 

 

سید اعجاز 

ترال//اکمل ہائی سکول ترال میں اتوارکو یوم والدین کے حوالے سے ایک تقریب منعقد ہوئی جس میں سکول میں زیر تعلیم بچوں کے والدین اور کئی معزز شخصیات نے شرکت کی ۔تقریب میں ادارے کے بچوں نے رنگا رنگ پروگرامات پیش کئے۔ عبد المجید اندرابی ،ڈی ایس پی ترال ڈاکٹر اعجاز ملک کے علاوہ متعدد علمی و ادابی شخصیات نے تقریب میںشرکت کی ہے ۔ سکول انتظامیہ نے والدین کو یقین دلایا کہ ان کے بچوں کو بہتر سے بہتر تعلیم فراہم کرنے کیلئے ادارہ وعدہ بند ہے ۔

 

 

 

 

سید اعجاز 

ترال//میونسپل کمیٹی ترال کی جانب سے اتوار کو صفائی مہم کا آغاز کیا گیا جو2اکتوبرتک جاری رہے گی ۔ اس مہم کے دوران صفائی کے ساتھ ساتھ دیگرفلیگ شپ پروگراموں کے حوالے سے لوگوں کو آگاہ کیا جائے گا ۔میونسپل کمیٹی ترال کے صدر نے لوگوںسے قصبے کو صاف و شفاف رکھنے کیلئے اس مہم میں بڑ چڑ کر حصہ لینے کی اپیل کی ۔انہوں نے بتایا کہ اس مہم کے علاوہ فلیگ شپ پروگرام سے لوگوں کو مستفید ہونے کی دعوت دی جا رہی ہے ۔میونسپل کمیٹی نے PMAY.Uکے تحت پہلی قسط حاصل کرنے والے لوگوں سے اپیل کی ہے کہ وہ زیر تعمیر مکانوں کو فوری طور پرپائیہ تکمیل پہنچا کر دوسری قسط حاصل کریں ۔انہوں نے پی ایم سیواندھی کے تحت مائیکرو کریڈٹ فیسلٹی کے طور10ہزار کی رقم حاصل کرنے والوں سے کہا کہ وہ بنکوں سے رسید حاصل کر کے مزید 20ہزار کی رقم حاصل کریں۔صدر نے ہائوسنگ فار آل اسکیم (PMA)کے تحت مستفیدہونے والوں کو میعاد بند مدت کے اندر تعمیر مکمل کرنے کی تاکید کی ۔انہوںنے دونوں فلیگ شپ پروگراموں سے استفادہ نہ کرنے والوں سے اُن کے دفتر کے ساتھ رابطہ قائم کرنے کے لئے کہا ۔

 

 

 

سرینگر// انجمن فروغ اردو جموں و کشمیر اور پرائیوٹ اسکولز ایسوسی ایشن جموں و کشمیر کے باہمی اشتراک سے انجمن کے صدر دفتر واقع ہولی ہوم اسکول چرار شریف بڈگام میں 'اردو اساتذہ کی صلاحیت سازی' پر مبنی دو روزہ ورکشاپ اتوار و اختتام پذیر ہوا ہے ۔ورکشاپ کے دوسرے دن وادی کے مختلف اضلاع سے تعلق رکھنے والے ماہر ین نے متنوع تربیتی موضوعات کے حوالے سے اپنے تجربات و مشاہدات شرکائے مجلس کے سامنے پیش کئے ۔ڈاکٹر نصرت جبین (اسسٹنٹ پروفیسر اردو، مرکزی جامعہ کشمیر، گاندربل) نے نشست کی ابتدا میں 'شاعری کی تدریس کے توجہ طلب پہلو' کے موضوعات کے کم و بیش تمام تر اہم اور غور طلب عناصر کو بڑی خوش اسلوبی سے سامنے لایا اور اردو میں موجود روزگار کے امکانات پر تفصیلی روشنی ڈالی۔میرساجد رمضان (لکچرر اردو، ڈائٹ اننت ناگ، حکومت جموں و کشمیر) نے 'اردو اساتذہ کی پیشہ ورانہ خوبیاں' کے موضوع کے سلسلے میں اپنی گفتگو پیش کی۔انہوں نے نئی تعلیمی پالیسی کے تناظر میں اسکول پر مبنی تشخیص پر طویل گفتگو کی اور طلبہ کی کثیر جہتی آموزش کو موضوع بنایا۔دوسرے دن کی آخری تکنیکی نشست میں ڈاکٹر محمد امتیاز احمد (مدرس شعبہ ارود ، گورنمنٹ ڈگری کالج ، شوپیان) نے 'اردو زبان سکھانے کا معروضی طریقہ' کے موضوع سے متعلق جدید اور موثر انداز میں اپنے زریں خیالات کا اظہار کیا۔ ان کی پیشکش کو حاضرین مجلس اور دوسرے شرکا نے خوب سراہا۔ورکشاپ کی الوداعی تقریب کی صدارت پرائیویٹ اسکولز ایسوسی ایشن کے صدر غلام نبی وار نے کی۔ انہوں نے اس طرح کے پروگراموں کو وقت کی اشد ضرورت کہتے ہوئے اس پروگرام کے منتظمین کو مبارک بادی پیش کی اور اس طرح کی تقاریب میں اپنا تعاون پیش کرنے کا بھروسہ دلایا اور بڈگام کے علاوہ ریاست کے تمام اضلاع میں اس نوعیت کے ورکشاپوں کے اہتمام پر زور دیا تاکہ پرائمری اور اسکنڈری سطح سے وابستہ اردو اساتذہ کی تعمیر و تربیت کے اس عمل کو مزید فروغ نصیب ہو۔اس دوران کئی ایک شرکا اور مہمانوں نے اس دو روزہ پروگرام کی مختلف سرگرمیوں کے حوالے سے اپنے تاثرات پیش کر کے اردو اساتذہ کے لیے اس ورکشاپ کو انتہائی مفید، اپنی نوعیت کا پہلا اور منفرد پروگرام قرار دیا۔انجمن فروغ اردو جموں و کشمیر اور پرائیوٹ اسکولز ایسوسی ایشن جموں و کشمیر کے منتظمین اور اراکین کے علاوہ نذر لاسلام (چیئرمین لائف اسکول، چرار شریف بڈگام)، ضلع بڈگام کے مختلف تعلیمی زونز کے پرائیوٹ اسکولوں سے وابستہ اساتذہ کرام اور کئی ایک ریسرچ اسکالرز نے شرکت حاصل کی۔اس موقع پر حاضرین مجلس نے ورکشاپ کے منتظمین اورانجمن کے سرپرست اعلیٰ میر علی محمد شیدا اور صدر ڈاکٹر الطاف انجم کی کوششوں اور کاوشوں کو سراہتے ہوئے انہیں خراج تحسین پیش کیا۔

 

 

 

گاندربل//مرکزی وزیر برائے اطلاعات و نشریات ، نوجوانوں کے امور اور کھیل انوراگ سنگھ ٹھاکر نے زیڈ پی ای او اور زونل پلے فیلڈ کا سنگِ بنیاد رکھا اور کِچپورہ کنگن میں پی ایم جی ایس وائی سڑک کا افتتاح کیا ۔ وزیر نے کِچپورہ کنگن کا دورہ کیا جہاں انہوں نے زونل فزیکل ایجوکیشن آفس ( زیڈ پی ای او ) اور 1.14 کروڑ روپے کی لاگت سے منظور شدہ زونل لیول پلے فیلڈ کا سنگِ بنیاد رکھا ۔ اجتماع سے خطاب کرتے ہوئے وزیر نے کہا کہ جموں و کشمیر میں قابلیت کی کوئی کمی نہیں ہے لیکن ضرورت اس بات کی ہے کہ اس پرتیبھا کو آگے بڑھایا جائے ۔ انہوں نے مزید کہا کہ جموں و کشمیر کے نوجوانوں کو سہولیات کی ضرورت ہے اور مرکزی حکومت تمام سہولیات کو یقینی بنائے گی تا کہ اس بات کو یقینی بنایا جا سکے کہ علاقے میں ٹیلنٹ پھلتا پھولتا رہے ۔ انہوں نے کہا کہ مرکزی حکومت موجودہ کھیلوں کے بنیادی ڈھانچے اور یو ٹی کیلئے سہولیات کو مزید مضبوط بنانے کیلئے پُر عزم ہے تا کہ زیادہ سے زیادہ نوجوان کھیلوں میں شامل ہوں اور مختلف سطحوں پر جموں و کشمیر کی نمائندگی کریں ۔ انہوں نے کہا کہ ایسا کرنے کیلئے مرکزی حکومت نے پی ایم ڈیولپمنٹ پلان کے تحت پلے فیلڈز اور انڈور سٹیڈیم کی ترقی کیلئے 200 کروڑ روپے مختص کئے ہیں ۔ انہوں نے مزید کہا کہ جموں و کشمیر میں مصنوعی ٹرفز ، ہاکی اور فُٹ بال گراؤنڈز کی تیاری کیلئے مزید 33 کروڑ روپے منظور کئے گئے ہیں ۔ انہوں نے اجتماع پر زور دیا کہ وہ یکم اکتوبر 2021 سے شروع ہونے والے ملک بھر کے ’’ کلین انڈیا مشن ‘‘ میں شامل ہوں ۔ مرکزی وزیر کا استقبال کرتے ہوئے لفٹینٹ گورنر کے مشیر فاروق احمد خان نے مرکزی حکومت کی اس میگا آؤٹ ریچ پروگرام کو جموں و کشمیر یو ٹی میں منعقد کرنے کی کوششوں کی تعریف کی ۔ اس موقع پر ڈپٹی کمشنر گاندر بل کرتیکا جیوتسنا ، ڈائریکٹر یوتھ سروسز اینڈ سپورٹس ، ایس ایس پی گاندر بل اور محکمہ کے دیگر حکام بھی موجود تھے ۔ بعد ازاں وزیر نے کچپورہ کنگن میں منعقدہ ایک رنگا رنگ تقریب کے دوران طلباء میں سرٹیفکیٹ ، یاد گار اور کھیلوں کی کٹس تقسیم کیں ۔ اس موقع پر وزیر نے ثقافتی پروگرام اور مارشل آرٹس ، ٹگ آف وار ، کبڈی اور والی بال میں کھیلوں کے مختلف مقابلوں کا ڈیمو بھی دیکھا ۔ وزیر نے کنگن کا بھی دورہ کیا جہاں انہوں نے بونی باغ کنگن میں 136.67 لاکھ روپے کی لاگت سے تعمیر شدہ پی ایم جی ایس وائی سڑک کا افتتاح کیا جو بانی ناغ بالا رہائش گاہ کو ہائی وے سے جوڑتی ہے ۔ اس دوران انہوں نے بونی باغ کے مقامی لوگوں سے بھی بات چیت کی اور علاقے میں ترقیاتی ضروریات کے بارے میں دریافت کیا ۔ مقامی لوگوں نے وزیر کا علاقہ کا دورہ کرنے اور مذکورہ سڑک کا افتتاح کرنے پر ان کی تائید کی جو کہ مقامی لوگوں کی دیرینہ مانگ تھی ۔ 

 

 

 

بانڈی پورہ//کُنن بانڈی پورہ میں بزمِ شعبان بانڈی پورہ کے اہتمام سے ’’یومِ شعبان‘‘ کا انعقاد کیا گیا۔ تقریب میں کئی ادیبوں، قلمکاروں اور شاعروںنے شرکت کی۔ تقریب کی صدارت ڈپٹی چیف ایجوکیشن افسر بانڈی پورہ شیخ غلام محمد نے کی جبکہ شہباز ہاکباری اور صدرِ بزم ڈاکٹر محمد امین پرہ بھی ایوانِ صدارت میں موجود تھے۔ تقریب پر ڈاکٹر فردوس احمد پرے نے شعبان بنڈپوری کی شاعری پر مقالہ پیش کیا۔جس پر مجید مجازی اور مہتاب منظور نے اپنے تاثرات پیش کئے۔اس دوران حلقہ ادب سوناواری حاجن کے صدر شاکر شفیع کو ’’سندِ شعبان2021‘ سے نوازا گیا۔ یہ اعزاز اُن کو علمی، ادبی،ثقافتی اور دینی کاوشوںکیلئے دیا گیا۔ شاکر شفیع نے اپنے تاثرات میں کشمیری لسانی تحریک کے ساتھ وابستہ رضاکاروں کو لگن اور تن دہی سے آگے بڑھنے کی گزارش کی۔تقریب کی دوسری نشست میں محفلِ مشاعرہ کا انعقاد بھی ہوا جس میں کئی شعراء نے شرکت کی۔ 

 

 

مشتاق الحسن 

ٹنگمرگ //ٹنگمرگ میں ماہر امراض خواتین ڈاکٹر جمشید احمد نے ٹنگمرگ کے جواں سال تاجر مرحوم ظہور احمد بٹ کی یاد میں مفت طبی کیمپ کا انعقاد کیا جس میں قریب دوسو خواتین کا چیک اپ کے علاوہ ان میں قریب دو لاکھ روپئے مالیت کی ادویادت بھی مفت تقسیم کی گئیں ۔یہ طبی کمپ صبح نو بجے سے شام پانچ بجے تک جاری رہا ۔ڈاکٹر جمشید احمد نے گزشتہ سال بھی اسی طرح کا میڈیکل کیمپ مرحوم تاجر کی یاد میں منعقد کیا تھا ۔معلوم رہے کہ مرحوم ظہور احمد بٹ گزشتہ سال حرکت قلب بند ہونے سے فوت ہوا تھا ۔ادھر سماجی حلقوں کے علاوہ ٹریڈرس ایسوسی ایشن کے صدر آصف رشید جان نے ڈاکٹر جمشید کی طرف سے مرحوم تاجر کی یاد میں مفت میڈیکل کیمپ منعقد کرنے پر ان کا شکریہ ادا کیا۔

 

 

 

سرینگر//حقانی میموریل ٹرسٹ کے سرپرست اعلیٰ سید حمید اللہ حقانی نے کہا ہے کہ موجودہ دور میں اتحادوقت کی اہم ترین ضرورت ہے ۔انہوں نے کہا کہ اہل سنت والجماعت کی صفوں میں اختلاف وانتشار کے جو حالات پیش آرہے ہیں وہ کسی سے ڈھکے چھپے نہیںہیںاورہمارے آپسی عدم اتفاق کی وجہ سے مسلمانوں میں انتشار و اختلافات کے زہر آلود بیج بوئے جارہے ہیں جو کہ مسلم امت کیلئے سم قاتل ہے۔حقانی شوپیان میںتنظیم کے ایک اجلاس سے خطاب کررہے تھے۔ انہوں نے کہا کہ دور اندیشی سے ملت کو مزید تقسیم در تقسیم ہونے سے سے بچانے کیلئے عملی اقدامات کریں اور فروعی اختلافات سے بچانے کی خاطر طویل مدتی پالیسی وضع کریں۔

 

 

سرینگر// فوج کی جانب سے 24 ستمبر سے 26 ستمبر 2021 تک پریہاسپورہ میں تین روزہ میوزک فیسٹیول کا اہتمام کیا گیاجس میں مقامی گلوکارعابد عالی،وقار خان اور ساجد شیخ نے شرکت کی جبکہ مشہور صوفی گلوکارشفیع سوپوی نے خوبصورت انداز میں لوگوں کے دل موہ لئے۔بالی ووڈ شہرت کے التمش فریدی نے بھی اپنی پرجوش گائیکی سے سامعین کو محظوظ کیا۔ کشمیر میں ان کی کارکردگی مقامی لوگوں کے لیے حوصلہ افزا ہے جو میوزیکل فیسٹیول سے لطف اندوز ہوئے جس میں صوفی ، لوک اور بالی ووڈ میوزک کا فیوژن پیش کیا گیا۔سینئر فوجی ، سول اور پولیس کے معززین نے بھی اس موقع پر شرکت کی۔اس موقع پرمقامی ٹیلنٹ کو موقع فراہم کیا گیا۔ مقامی لوگوں نے فوج اور سول انتظامیہ سے درخواست کی ہے کہ وادی میں اس طرح کے مزید پروگرام باقاعدگی سے منعقد کیے جائیں۔

 

 

 

سرینگر//جموںوکشمیر رورل ڈیولپمنٹ سوسائٹی چیئرمین مبارک گل نے صوبہ کشمیرمیں سوسائٹی کی ماہانہ سرگرمیوں اور کارکردگی کا جائزہ لیا۔موصولہ بیان کے مطابق سوسائٹی کا ایک آن لائن اجلاس منعقد ہوا جس میںتنظیم کے متعدد پروگرام اورسرگرمیاں زیر بحث آئیں۔ میٹنگ میں سوسائٹی کے سینئر نائب چیئرمین (کشمیر)محمد اشرف خان، شمالی کشمیر کے چیئرمین خواجہ محمد شفیع، چیئرمین یوتھ ونگ اینڈ پیپلز ہیلپ گروپ انیشیٹیو ایڈوکیٹ یونس مبارک گل، چیئرمین وسطی کشمیر محمد رفیق خان، چیف آرگنائزر شمالی کشمیر و ضلع چیئرمین بارہمولہ عبدالمجید آخون، کور گروپ ممبر و چیف آرگنائزر بڈگام میر پرویز احمد، ترجمان فصل ریاض گل، ضلع چیئرمین کپوارہ محمد سکندر میر، ضلع چیئرمین اننت ناگ پیرزادہ عبدالحمید، ضلع چیئرمین بڈگام علی محمد ڈار، لیگل سیل وائس چیئرپرسن ایڈوکیٹ نیلوفر مسعود، ضلع چیئرمین سرینگر فاروق سازنواز، ضلع نائب چیئرمین بارہمولہ غلام احمد بٹ، ضلع سرینگر وائس چیئرمین نثار گل، ضلع وائس چیئرمین بانڈی پورہ عبدالرحمان ڈار، تحصیل چیئرمین اوڑی بشیر احمد وتھلو، ضلع نائب چیئرمین بڈگام عابد فارق، سید صباح شفیع، امیش تلاشی، رضوان احمد رنگریز اور عمران ہاشمی نے شرکت کی۔ اجلاس سے خطاب کرتے ہوئے مبارک گل نے جموںوکشمیر میںرورل ڈیولپمنٹ کی جانب سے حالیہ ختم ہوئی ٹیکہ کاری مہم، مصوری مقابلہ اور دیگر سرگرمیوںپر اطمینان کااظہار کیا۔ انہوںنے مصوری مقابلوں میں جیتنے والوں کیلئے مبارکبادی کی تقریب جو 29ستمبر کو ٹیگور ہال سرینگر میں منعقد ہونے والی ہے،کا جائزہ لیا۔ 

 

 

سرینگر// انجمن شرعی شیعیان کے صدر آغا سید حسن نے حوزہ علمیہ قم کے بلند پایہ استاد ،عالم دین ،فلسفی آیت اللہ حسن زادہ عاملی کی وفات پر گہرے صدمے کا اظہار کرتے ہوئے امام خامنہ ای ، حوزہ علمیہ قم کے اساتذہ و طلاب اور مرحوم کے لواحقین و پسماندگان سے تعزیت کا اظہار کیا۔انہوں نے آیت اللہ حسن زادہ عاملی کی تدریسی خدمات اور تدریسی صلاحیتوں کوخراج عقیدت پیش کرتے ہوئے کہا کہ مرحوم عرصہ دراز تک حوزہ علمیہ قم میں مصروف خدمت رہے اور ہزاروں طلاب نے ان سے شرف تلمذ حاصل کیا جو اس وقت دنیا کے مختلف ممالک میں  خدمت دین میں مصروف ہیں ۔دریں اثناء آغا سید حسن نے اہلیہ نذیر احمد دار ٹکی پورہ بڈگام کی وفات پر رنج و غم کا اظہار کرتے ہوئے مرحومہ کے شوہر اور دیگر پسماندگان سے تعزیت کی ہے ۔انہوں نے مرحومہ کے بلند درجات اور جنت نشینی کی دعا کی ۔انہوںنے پسماندگان سے دلی ہمدردی کا اظہار کرتے ہوئے کہا ’’ مجھے اور میرے اہل خانہ کے لئے مرحومہ کی جدائی ایک تلخ اور ناقابل فراموش صدمہ ہے کیونکہ مرحومہ نے ساری زندگی ہمارے گھر میں گزاری وہ میرے نزدیک کنبے کے ایک فرد کی حیثیت رکھتی تھیں‘‘۔

 

 

بڈگام//کشمیر مرکزادب وثقافت ،کلچرل یونٹ محکمہ اطلاعات و تعلقات عامہ اور محکمہ سیاحت کے باہمی اشتراک  سے خوبصورت سیاحتی مقام دودھ پتھری بڈگام میں ایک ادبی سمینار کا اہتمام کیا گیا ۔ ادبی سمینار میں ایڈوکیٹ بابا خالق کی طرف سے حضرت شیخ العالمؒپر لکھی گئی تصنیف’ سخنات الحیات‘ اور پروفیسر محمد زمان آزردہ کی تصنیف ’ننہ پوش‘ کے جدید ایڈیشن کی رسم رونمائی کے علاوہ محفل مقالات اور محفل مشاعرہ بھی ہوا ۔ سمینار میں وادی کے سرکردہ ادیب ، شعراء ، دانشور اور ادب نواز شخصیات نے شمولیت کی ۔ 25ماہ ستمبر کی شام آٹھ بجے سے لیکر گیارہ بجے رات تک محفل مشاعرہ منعقد کیا گیا جس کی صدارت پروفیسر شاد رمضان نے کی جس میں مقتدر شعراء نے کلام پڑھا جن میں علی احسن  ، یونس وحید ، مشتاق محرم ، پروفیسر فاروق فیاض ،پروفیسر زمان آزردہ، سید شکیل شان اور دیگر قابل ذکر ہیں۔ نظامت  کے فرائض عنایت گل نے انجام دئے ۔مجلس کی صدارت ادبی مرکز کمراز کے صدر محمد امین بٹ نے کی جبکہ مہمان خصوصی پروفیسر محمد زمان آزردہ تھے ۔ ایوان صدارت میں پروفیسر شاد رمضان اور سید شکیل شان بھی موجود تھے۔ کتاب پر مشتاق محرم ، علی احسن اور عنایت گل نے مقالے پڑھے ۔ اس کتاب کے حوالے سے یہ بات قابل توجہ ہے کہ سات سو صفحات پر مشتمل کتاب جس میں کلام شیخ العالم اور فقیر صدر کا نادر صوفیانہ کلام درج کیا گیا ہے ۔ بعد ازاں ساہتیہ اکیدیمی ایوارڈ پانے والی پروفیسر محمد زمان آزردہ کی لکھی کتاب ’ننہ پوش‘کی رسم رونمائی انجام دی گئی ۔اس مجلس کی صدارت کے فرائض  پروفیسر فاروق فیاض نے انجام دئے جبکہ ایوان صدارت میں پروفیسر شاد رمضان اور مشتاق محرم بھی موجود تھے ۔ اس موقع پر انفارمیشن محکمہ کے کلچرل شعبے کی طرف سے محفل موسیقی کا بھی اہتمام کیا گیا تھا۔یہ شاندار سمینار انتہائی خوش اسلوبی کے ساتھ اختتام پذیر ہوا۔ آخر پر یونس وحید نے ٹورازم ڈیولپمنٹ اتھارٹی دودھ پتھری نے تمام مہمانوں کا شکریہ کیا ۔ مرکز ادب کے زعما نے الیکٹرانک و پرنٹ میڈیا کا شکریہ ادا کیا گیا جو ایسے پروگراموں کو مشتہر کرنے میں ہمیشہ پیش پیش رہتے ہیں ۔