سری نگر//ڈپٹی کمشنر سری نگر محمد اعجاز اسد نے سری نگر شہر میں مجوزہ الیکٹرک بس سروس کے لیے روٹ پلاننگ کے لیے ریجنل ٹرانسپورٹ اتھارٹی کی ایک میٹنگ کی صدارت کی۔ڈپٹی کمشنر جو کہ آر ٹی اے سری نگر کے چیئرمین بھی ہیں نے متعلقہ افسران کو ہدایت کی کہ وہ الیکٹرک بسوں کے روٹوںاور اسٹیشنوں کو حتمی شکل دینے کے حوالے سے ایک جامع منصوبہ تیار کریں۔ انہوں نے الیکٹرک بسوں کے چارجنگ اسٹیشنوں کی نقشہ سازی کے لیے بھی کہا۔ڈی سی نے لائن ڈپارٹمنٹ کے افسران سے یہ بھی کہا کہ وہ الیکٹرک بسوں کے ٹرائل رن کے لیے تمام ضروری تیاری کریں۔انہوں نے افسران کو مزید ہدایت دی کہ وہ الیکٹرک بسوں کے کامیاب آپریشن کے لیے ایک موثر ایکشن پلان تیار کریں۔ڈی سی نے ریجنل ٹرانسپورٹ آفیسر کو ہدایت کی کہ وہ میٹنگ میں اٹھائے گئے مشاہدے کے تناظر میں ایک موثر روٹ پلان کو حتمی شکل دینے کے لیے ایس آر ٹی سی، ٹریفک پولیس اور دیگر متعلقہ افراد کے ساتھ مشاورت کے ساتھ مشق کریں تاکہ ٹریفک پر قابو پانے کے لیے بہتر ٹریفک مینجمنٹ سسٹم کو نافذ کیا جا سکے۔میٹنگ میںسینئر سپرنٹنڈنٹ آف ٹریفک جاوید کول، کمشنر سری نگر میونسپل کارپوریشن اطہر امیر خان، ریجنل ٹرانسپورٹ آفیسرکشمیر ساجد یحییٰ نقاش، ایڈیشنل ڈپٹی کمشنر سری نگر خورشید احمد شاہ، ایس ڈی ایم ایسٹ اویس مشتاق،جنرل منیجر جے کے آر ٹی سی اور دیگر متعلقہ حکام نے شرکت کی۔
شہر میں الیکٹرک بسوںکی مشق جلد | ترقیاتی کمشنر کی روٹ پلان کو حتمی شکل دینے کی ہدایت
