یوکرین بحران | وزیر اعظم نے صورتحال پر اعلیٰ سطحی میٹنگ کی

نئی دہلی// وزیر اعظم نریندر مودی نے یوکرین کی صورتحال کے سلسلے میں منگل کو نئی دہلی میں ایک بار پھر اعلیٰ سطحی میٹنگ کی۔ یہ اطلاع دیتے ہوئے سرکاری ذرائع نے بتایا کہ میٹنگ میں یوکرین میں پھنسے ہندوستانیوں کو نکالنے کے لیے چلائے جارہے آپریشن کا خصوصی طور پر جائزہ لیا گیا۔خود وزیر اعظم مودی یوکرین پر روس کی فوجی کارروائی کے بعد وہاں پھنسے ہوئے ہندوستانی شہریوں کو واپس لانے کے آپریشن کی مسلسل نگرانی کر رہے ہیں۔ انہوں نے مرکزی وزراء ہردیپ پوری، جیوتیرآدتیہ سندھیا، کرن رجیجو اور جنرل وی کے سنگھ سے کہا ہے کہ وہ یوکرین کے مختلف پڑوسی ممالک میں جا کر ہندوستانی شہریوں کو یوکرین سے نکالنے کے آپریشن میں تعاون کریں اور طلباء کی مدد کریں۔وزیر اعظم مودی گزشتہ کئی دنوں سے اس طرح کی اعلیٰ سطحی میٹنگوں کا انعقاد کر رہے ہیں، منگل کی میٹنگ میں وزیر خارجہ ایس جے شنکر اور خارجہ سکریٹری ہرش وردھن شرنگلا بھی موجود تھے ۔ آپریشن گنگا اس کے ہمسایہ ممالک کے ذریعہ یوکرائن سے ہندوستانی شہریوں کو نکالنے کے لئے ہے جس میں ائر انڈیا، انڈگو اور ائرانڈیا ایکسپریس سمیت کئی ایئر لائنز کے طیارے لگائے گئے ہیں۔وزیر اعظم مودی نے اس مہم میں فضائیہ کے بڑے سائز کے ٹرانسپورٹ طیاروں کو بھی تعینات کرنے کی ہدایت دی ہے ۔ وہاں سے اب تک سات پروازیں ہندوستان آچکی ہیں۔ یوکرین میں کل 18000 ہزار ہندوستانی تھے جن میں زیادہ تر طلباء ہیں۔