سری نگر//کولگام میں عسکریت پسندوں کے ذریعہ ایک سرپنچ کو گولی مار کر ہلاک کرنے کے ایک دن بعد، آئی جی پی کشمیر وجے کمار نے ہفتہ کو جنوبی کشمیر کے ضلع میں سیکورٹی کا تفصیلی جائزہ لیا۔
وادی کے اعلیٰ پولیس افسر نے ڈی آئی جی پولیس اور ڈی آئی جی سی آر پی ایف اننت ناگ کے ساتھ کولگام کا دورہ کیا اور ڈی سی کولگام، ایس ایس پی کولگام، کولگام میں سی آر پی ایف کے تمام سی اوز اور دیگر پولیس افسران سے ملاقات کی۔
ایک پولیس افسر نے بتایا، "پنچایتی راج اداروں اور محفوظ افراد کا تفصیلی سیکورٹی جائزہ لیا گیا،" انہوں نے مزید کہا، "ان کے دوروں کی نگرانی کے لیے نئے اقدام پر بھی تبادلہ خیال کیا گیا۔"
افسر نے مزید کہا کہ اس کے علاوہ عسکریت پسندی کے خلاف کارروائیوں کو بڑھانے اور عسکریت پسندوں کے رینک میں نئی بھرتیوں کو کم کرنے کے لیے مخصوص ان پٹ پیدا کرنے پر توجہ دی گئی۔
