سرینگر//جموں و کشمیر کے11اضلاع میں کسی کی رپورٹ مثبت نہیں آئی ہے جبکہ وادی میں مسلسل دوسرے دن بھی کورونا وائرس متاثرین کی تعداد 10 سے کم ہے۔ پچھلے 24 گھنٹوں کے دوران کورونا وائرس کی تشخیص کیلئے 40 ہزار 59ٹیسٹ کئے گئے جن میں 3 مسافروں سمیت مزید 19افراد کی رپورٹیں مثبت آئی ہیں۔ متاثرین کی مجموعی تعداد 4لاکھ 53ہزار 422 ہوگئی ہے۔ اس دوران مسلسل 8 ویں دن بھی جموں و کشمیر میں کوروناوائرس سے کسی کی موت نہیں ہوئی ہے۔ متوفین کی مجموعی تعداد 4749 ہوگئی ہے۔ محکمہ صحت کی جانب سے فراہم کئے گئے اعداد و شمار کے مطابق جموں و کشمیر میں کورونا وائرس سے متاثر ہونے والے 19 افراد میں جموں میں 10جبکہ 9 کشمیر سے تعلق رکھتے ہیں۔ کشمیر کے 5 اضلاع میں کسی کی رپورٹ مثبت نہیں آئی ہے جبکہ دیگر 5اضلاع میں 9افراد کی رپورٹیں مثبت آئی ہیں۔ کشمیر میں مثبت قرار دئے گئے 9افراد میں سے 2بیرون ریاستوں سے سفر کرکے واپس لوٹے جبکہ دیگر 7 مقامی سطح پر رابطے میں آنے کی وجہ سے متاثر ہوئے ہیں۔ کشمیر میں متاثر ہونے والے 9افراد میں سرینگر میں 5، بڈگام میں 1، پلوامہ میں 1، بانڈی پورہ میں ایک اور کولگام میں ایک کی رپورٹ مثبت آئی جبکہ بارہمولہ، کپوارہ، اننت ناگ، گاندربل اور شوپیان میں کسی کی رپورٹ مثبت نہیں آئی ہے۔ کشمیر میں متاثرین کی مجموعی تعداد 2لاکھ 87ہزار 251ہوگئی ہے۔ اس دوران وادی میں مسلسل 17ویں دن بھی کورونا وائرس سے کسی کی موت نہیں ہوئی ہے۔ متوفین کی مجموعی تعداد 2423بنی ہوئی ہے۔ جموں صوبے کے ادھمپور، راجوری، ڈوڈہ، سانبہ، رام بن اور ریاسی میں کسی کی رپورٹ مثبت نہیں آئی ہے جبکہ دیگر 4اضلاع میں10افراد کی رپورٹیں مثبت آئی ہیں۔ جموں صوبے میں مثبت قرار دئے گئے 10افراد میں ضلع جموں میں 6،کٹھوعہ میں 2، کشتواڑ میں 1 جبکہ پونچھ میں 1شخص کی رپورٹ مثبت آئی ہے۔ جموں صوبے میں متاثرین کی تعداد 1لاکھ 66ہزار 171ہوگئی ہے۔ اس دوران جموں صوبے میں مسلسل 8ویں دن بھی کورونا وائرس سے کسی کی موت نہیں ہوئی ہے۔ متوفین کی مجموعی تعداد 2326بنی ہوئی ہے۔
نئے 3,614 کیسز 100ہلاکتیں
یو این آئی
نئی دہلی// ملک میں کورونا وائرس کے یومیہ کیسز کے مقابلے اس سے صحتیاب ہونے والوں کی تعداد رہنے سے فعال کیسز کم ہو کر اب تقریباً 40ہزار رہ گئے ہیں۔ گذشتہ 24 گھنٹوں میں ملک میں 18 لاکھ 18ہزار 511 کووڈ ویکسین دی گئی ہے ۔ اس کے ساتھ ہی 179 کروڑ 91 لاکھ 57 ہزار 486 کووڈ ویکسین دی جا چکی ہے ۔وزارت نے کہا کہ کووڈ کے تین ہزار 614 نئے مریض سامنے آئے ۔ اس کے ساتھ ہی ملک کے مختلف اسپتالوں میں زیر علاج کورونا مریضوں کی تعداد کم ہو کر 40 ہزار 559 ہو گئی ہے ۔ اس دوران ملک میں اس مہلک وائرس کی وجہ سے 100 مریضوں کی موت ہوئی ۔
