سرنکوٹ حادثے کے مہلوکین کی آخری رسومات ادا

پونچھ//ضلع پونچھ کے تراڑانوالی میں جمعرات کے روز ایک دردناک سڑک حادثے میں ڈینگلہ چنڈک کے ایک ہی خاندان کے چار افراد سمیت نو لوگوں کی موت ہو گئی تھی۔ ڈینگلہ گائوں سے تعلق رکھنے والے ایک ہی کنبہ کے چار افراد کی نماز جنازہ اور تدفین جمعرات کو انکے آبائی گاوں ڈینگلہ میں ادا کی گئی۔ اس موقعہ پر کثیر تعداد میں عوام نے پہنچ کر جنازے میں شرکت کی اور بالخصوص ضلع انتظامیہ اور گورنر جموں کشمیر سے مطالبہ کیا گیا ہے کہ اس حادثہ میں مارے جانے والے سبھی افراد کے بچوں کو سرکاری نوکری اور امداد فراہم کی جائے کیونکہ یہ سبھی غریب خاندان سے تعلق رکھتے تھے۔لوگوں کا کہنا تھا کی اس حادثہ کی وجہ سڑک کی خستہ حالی بتائی جارہی ہے۔انہوں نے ضلع انتظامیہ سے اس سڑک کی تحقیقات کروائے جانے کا مطالبہ کیا ہے۔بفلیاز تراڑاں والی میں ہوئے سڑک حادثہ پر جموں وکشمیر ٹیچرز جوائنٹ ایکشن کمیٹی ضلع پونچھ کی پوری تنظیم نے گہرے صدمے کا اظہار کیا ہے۔جموں وکشمیر ٹیچرز جوائنٹ ایکشن کمیٹی ضلع پونچھ کے صدر سید شاہ نواز اور ان کی تنظیم کے تمام اساتذہ نے اس سڑک حادثے پر گہرے دکھ کا اظہار کرتے ہوئے کہا کہ یہ حادثہ یقینا تمام لوگوں کے لئے رنج و الم کا ہے، جس میں تقریباً نو قیمتی جانوں کا نقصان ہوا ہے۔ضلع صدر نے کہا کہ اس مشکل وقت میں ہم تمام لواحقین کے ساتھ ہیں جن کے اس حادثے میں احباب داغ مفارقت دے گئے اور اللہ تعالی سے دعا گو ہیں کہ اللہ تعالیٰ اس حادثے میں جو وفات پا گئے ان کو جنت الفردوس میں اعلی مقام عطا فرمائے۔