ہندوارہ میں مسجد تعمیر کے دوران 3افراد زخمی

عظمیٰ ویب ڈیسک
ہندوارہ/شمالی کشمیر کے ہندوارہ کے کشیری علاقے میں آج صبح مسجد کے انہدام کے دوران کم از کم تین افراد زخمی ہو گئے۔تفصیلات کے مطابق، یہ واقعہ اس وقت پیش آیا جب مقامی لوگ پرانی مسجد کو منہدم کرکے نئی تعمیر کے لیے جگہ صاف کر رہے تھے۔
انہدامی کارروائی کے دوران اچانک دھماکہ ہوا جس سے تین افراد زخمی ہو گئے۔ انہیں فوری طور پر نزدیکی صحت مرکز منتقل کیا گیا، جہاں ان کی حالت مستحکم بتائی جا رہی ہے۔زخمیوں کی شناخت مدثر احمد میر ساکن نطنوسہ، غلام احمد تنترے ساکن کچری اور اویس احمد ساکن ہدی پورہ کے طور پر ہوئی ہے۔
دھماکے کے فوراً بعد سیکورٹی فورسز موقع پر پہنچ گئیں اور علاقے کو گھیرے میں لے لیا۔ پولیس کی ایک ٹیم دھماکے کی نوعیت اور اس کی اصل وجہ جاننے کی تحقیقات کر رہی ہے۔ایس پی ہندوارہ نے کے این او کو بتایا کہ دھماکے کی وجہ معلوم کی جا رہی ہے اور تحقیقات جاری ہیں۔