سمت بھارگو
راجوری// چیف سیکریٹری اٹل ڈولو نے منگل کے روز راجوری کے دورے کے دوران میڈیا سے گفتگو کرتے ہوئے کہا کہ جموں و کشمیر میں اس وقت تقریباً 9500 بنکرز دستیاب ہیں، تاہم مزید بنکروں کی تعمیر کی ضرورت محسوس کی جا رہی ہے، خصوصاً شہری علاقوں میں جیسے راجوری اور پونچھ، جو حالیہ شیلنگ سے متاثر ہوئے ہیں۔انہوں نے بتایا کہ شہری علاقوں میں بنکروں کی مانگ بڑھ گئی ہے کیونکہ یہ پہلی بار ہے کہ ان علاقوں کو بھی سرحد پار سے شیلنگ کا نشانہ بنایا گیا ہے۔موصوف نے کہاکہ’’ ہم اس پر سنجیدگی سے غور کر رہے ہیں تاکہ شہریوں کی جان و مال کا تحفظ یقینی بنایا جا سکے‘‘۔چیف سیکریٹری نے بتایا کہ شلنگ سے بے گھر ہونے والے خاندانوں کو ہر ممکن سہولیات فراہم کی جائیں گی، جن میں رہائش، کھانا، اور نقل و حمل شامل ہے تاہم انہوں نے واضح کیا کہ ان خاندانوں کی گھروں کو واپسی فورسز کی کلیئرنس کے بعد ہی ممکن ہو سکے گی، کیونکہ کئی علاقوں میں زندہ گولہ بارود کی موجودگی کا خدشہ ہے، جو خطرناک ثابت ہو سکتا ہے۔انہوں نے اس موقع پر گورنمنٹ میڈیکل کالج (جی ایم سی) راجوری میں بنیادی سہولیات، ڈھانچے اور عملے کی قلت کے بارے میں پوچھے گئے سوال پر تسلیم کیا کہ ’’ڈاکٹروں کی کمی موجود ہے، اگرچہ اس سے مریضوں کے علاج پر فوری اثر نہیں پڑ رہا، مگر تدریسی سرگرمیوں پر فرق پڑتا ہے‘‘۔اٹل ڈولو نے بتایا کہ اس کمی کو پورا کرنے کے لئے ڈاکٹروں کی ترقی، نئی بھرتیوں اور عارضی تقرریوں جیسے اقدامات کیے جا رہے ہیں تاکہ جی ایم سی راجوری کو مکمل صلاحیت کے ساتھ فعال رکھا جا سکے۔چیف سیکریٹری کے اس دورے کے دوران انہوں نے سرحدی علاقوں میں سلامتی، صحت، اور بنیادی ڈھانچے کے معاملات کا جائزہ لیا اور عوامی تحفظ کو یقینی بنانے کے لئے مربوط اقدامات کا عزم ظاہر کیا۔
چیف سیکریٹری کا شلنگ سے متاثرہ علاقوںکا دورہ، امدادی اقدامات کا جائزہ | متاثرہ خاندانوں کو مکمل تعاون کی یقین دہانی، بنکروں کی تعمیر اور طبی سہولیات کا معائنہ
رمیش کیسر
راجوری//چیف سیکریٹری اٹل ڈولو نے نوشہرہ تحصیل کے کلسیاں پنچایت کا دورہ کیا، جو لائن آف کنٹرول کے قریب واقع ہے اور حالیہ سرحد پار شیلنگ میں یہاں کئی مکانات کو نقصان پہنچا ہے۔دورے کے دوران، چیف سیکریٹری نے متاثرہ لوگوںسے ملاقات کی، ان کی خیریت دریافت کی اور یقین دلایا کہ انتظامیہ کی طرف سے انہیں ہر ممکن مدد فراہم کی جائے گی۔ انہوں نے اس مشکل گھڑی میں متاثرین کے ساتھ یکجہتی کا اظہار کرتے ہوئے کہا کہ حکومت ان کی سلامتی اور فلاح و بہبود کو یقینی بنانے کے لئے پْرعزم ہے۔بعد ازاں، چیف سیکریٹری نے گورنمنٹ میڈیکل کالج راجوری کا دورہ کیا، جہاں انہوں نے زخمیوں سمیت تمام مریضوں سے ملاقات کی۔ انہوں نے جی ایم سی پرنسپل کو ہدایت دی کہ تمام مریضوں کو بہترین طبی سہولیات فراہم کی جائیں اور ہسپتال کی مجموعی کارکردگی کا بھی جائزہ لیا۔انہوں نے سرحدی علاقوں میں بنکروں کی دستیابی اور حالت کا معائنہ بھی کیا اور متعلقہ افسران کو ہدایت دی کہ جہاں ضرورت ہو، وہاں فوری طور پر نئے بنکروں کی تعمیر کی جائے۔ انہوں نے زور دیا کہ ان تعمیراتی کاموں میں اعلیٰ معیار کو یقینی بنایا جائے تاکہ شہریوں کی جانوں کا تحفظ ممکن ہو۔چیف سیکریٹری نے ضلع انتظامیہ کو درپیش چیلنجز کے بارے میں بھی معلومات حاصل کیں اور ہر ممکن تعاون فراہم کرنے کی یقین دہانی کرائی۔انہوں نے حالیہ شیلنگ کے دوران انتظامیہ کی بروقت اور مؤثر کارروائی کی تعریف کرتے ہوئے کہا کہ ضلع انتظامیہ نے حالات کو عمدگی سے سنبھالا۔اس سے قبل، ڈپٹی کمشنر راجوری، ابھیشیک شرما نے چیف سیکرٹری کو ضلع کی سول ڈیفنس تیاریوں پر تفصیلی بریفنگ دی اور بارہ اہم خدمات ،وارڈن سروس، ریسکیو، حادثہ، فائر فائٹنگ، ٹرانسپورٹ، سروے کمیٹی، سپلائی سروسز، ویلفیئر، ہیڈکوارٹر، کمیونی کیشن، ڈسپوزل اور ٹریننگ سروسز کی صورتحال پر روشنی ڈالی۔اس اجلاس میں ڈی آئی جی راجوری-پونچھ رینج تیجندر سنگھ، ایس ایس پی راجوری، گوروو سکاروار، اے ڈی سی کوٹرنکہ دل میر، اے ڈی سی راجوری چندر پرکاش، اے سی آر محمد جہانگیر، اے سی پی شیراز چوہان، ڈپٹی ڈائریکٹر ایمپلائمنٹ محمد نواز، اے سی ڈی عقیل نوید اور دیگر اعلیٰ ضلعی و سیکٹورل افسران نے شرکت کی۔
