۔8جولائی تحریک کشمیر کا ایک سنگِ میل:مزاحمتی خیم۔ہ

سرینگر//تحریک حریت،سالویشن مومنٹ ،پیروان ولایت،مسلم کانفرنس ،،محاذ آزادی ، ینگ مینز لیگ اور مسلم لیگ نے8جولائی کو تحریک آزادی کشمیر میں ایک سنگِ میل سے تعبیر کیا ہے۔ تحریک حریت نے برہان مظفر وانی کی برسی پر پیر پنچال اور وادی چناب سے لیکر گریز ٹنگڈار تک وادی کویرغمال بنانے کی مذمت کرتے ہوئے کہا کہ 8جولائی تحریک آزادی کشمیر میں ایک اہم سنگ میل کی حیثیت اختیار کرگیا ہے اور لوگوں کی تحریک آزادی کے ساتھ والہانہ وابستگی کا بھرپور اظہار بھارت کے حکمرانوں کیلئے ایک نوشتہ دیوار ہے۔موصولہ بیان کے مطابق بھارت کے حکمران جموں کشمیر کے عوام کے جذبے اور جنون سے بخوبی واقف ہیں، اسی لئے بھارتی حکمرانوں اور فوجی افسروں نے نہتے عوام کے خلاف جنگ چھیڑرکھی ہے، جس کے نتیجے میں گزشتہ مہینوں سے فورسز خصوصی طور سے نہتے اور پُرامن مظاہرین کے سینوں کو گولیوں سے چھلنی کررہے ہیں۔ اس سب کے باوجود جموں کشمیر کے عوام کے جذبہ¿ آزادی میں کوئی کمی نہیں ہوئی، بلکہ بھارتی فورسز کے مظالم سے عوامی جذبے کو مزید تقویت اور جلا ملی۔ تحریک حریت نے کہا کہ 8جولائی 2017 ایک ریفرنڈم تھا جس سے بھارت میں کھلبلی مچ گئی۔ تحریک حریت نے تنظیم کے لیڈر محمد یوسف مکرو آرونی کے گھر رات کے اندھیرے میں فوج اور پولیس کے چھاپے کی مذمت کی۔ بیان کے مطابق فوج نے ان کے اہل خانہ کو خوف ودہشت کا شکار بنایا۔ سالویشن مومنٹ چیئرمین ظفر اکبر بٹ نے برہان کی برسی کے موقع پر حکومتی سطح کی پابندیوں ،سوشل میڈیا پر پابندی ،گرفتاریوں اور قدغن کی مذمت کرتے ہوئے کہا کہ ساری ریاست بشمول چناب وادی کو ایک قید خانے میں تبدیل کرلیا گیا تھا ۔انھوں نے ان اطلاعات پر سخت غم و غصہ کا اظہار کیا کہ برہان کے والدکو انتباہ دیا گیا تھا کہ وہ کسی بھی صورت میں بیٹے کی یاد میں کسی مذہبی تقریب کا انعقاد نہ کریں ۔پیروان ولایت نے 2016 میں برہان مظفر وانی سمیت دیگر جاں بحق ہوئے افراد کو ان کی پہلی برسی پرخراج تحسین پیش کیا ہے۔ تنظیم کے سیکریٹری جنرل آغا سید یعسوب نے برہان وانی کو تحریک آزادی کشمیر کا ایک عظیم ہیرو قرار دیتے ہوئے کہا کہ جس طرح برہان وانی نے عزم وہمت اور بہادری کے ساتھ تحریک کا رخ بدل دیا وہ اپنی مثال آپ ہے۔مسلم کانفرنس کے ایک دھڑے کے چیئرمین شبیر احمد ڈار کی صدرات میں جناب صاحب صورہ میں ایک تعزیتی مجلس منعقد کی گئی ۔مجلس میں محاز آزادی کے صدر محمد اقبال میر، ینگ مینز لیگ کے چیئرمین امتیاز احمد ریشی کے علاوہ مسلم لیگ لیڈر حیات احمد ڈار اور دیگر قائدین نے شرکت کی۔ اس موقع پر عوام سے مخاطب ہوکر شبیر احمد ڈار نے کہا کہ برہان وانی نے بلا شک تحریک کا بیانیہ ہی تبدیل کردیاہے ۔انہوں نے کہا کہ برہان کو خراج عقیدت ادا کرنے کا بہترطریقہ یہ ہے کہ جدو جہد آزادی کی شمع کو فروزاں رکھا جائے ۔